އިދިކޮޅު ހަދަން ދަތި އިދިކޮޅު: މަތީފަޑީގެ ވައްކަމުގެ ލަދުގައި ހިންދެމި ނުލެވިފައި

ނާއިބް ރައީސް އަޙްމަދު އަދީބު އިސްވެ ހުންނަވާ ހިންގެވި އެމްއެމްޕީއާރްސީ ޚިޔާނާތުގައި 90 މިލިޔަން ޑޮލަރު ވަގަށް ނެގިއެވެ. 2018 ގައި އެމްޑީޕީއާއި ރައީސް އިބްރާހިމް މުޙައްމަދު ޞާލިޙް ވެރިކަމަށް ވަޑައިގަތީ ރައީސް ޢަބްދުﷲ ޔާމިންގެ ވެރިކަމުގައި ހިންގި މި ބޮޑު ޚިޔާނާތް ބަލާ، ތަޙްޤީޤުކޮށް، ފައިސާތައް އަނބުރާ ހޯއްދަވާނެ ވަޢުދު ވަމުންނެވެ. ނަމަވެސް، މިއަދު އެމްޑީޕީ ބަރުހެލިވެފައިވަނީ ޕާޓީ ހިންގާން ތިބި ލީޑަރުންގެ ތެރެއިންވެސް ބައެއް މީހުން އެމްއެމްޕީއާރްސީ ފައިސާގައި ޖެހުނު 300 އެއްހާ މީހުންގެ ތެރޭގައިވާ ހިމެނޭތީއެވެ.

އަދީބު ގެންގުޅުއްވި ފޯނެއްގެ ހުރިހާ ޓެކްސްޓް މެސެޖުތައް ލީކުވީއިރު ފެންނާން އޮތީ މީހުން މެރުމާއި، ހުޅުޖެހުމާއި، ވައްކަމާއި، ފޭރުމުގެ އިތުރުން ޙައްޖު، ޢުމްރާއަށް މީހުންގެ ގެންދިއުމުގެ ނަމުގައި ސްކޭމް ހިންގާންވެސް މަޖާޒީގޮތެއްގައި ނަމަވެސް މުޢާމަލާތް ކޮށްފައި ހުރި ކަމެވެ. 

އެހެނަސް އެމްޑީޕީގެ ބައެއް ސީނިއަރ ބޭފުޅުން އާދިބުފައިލްސް ސިފަކުރައްވަނީ "ފޯކަސް ނަގާލަން"، "ރައްޔިތުންގެ ސަމާލުކަން އަނބުރާލަން" ސަރުކާރުން ރާވައިގެން ލީކުކޮށްލި ޑޭޓާ ކަމަށެވެ. އެކަމަކު ފޯކަސް ނަގާލަން ނުވަތަ ސަމާލުކަން އަނބުރާލަން އުޅެނީ ކޮންކަމަކުން ބާވައެވެ؟ ބަލަގަ އެމެސެޖުތަކުގައި ހިމެނިފައިވާ މީހުންގެ 80 އިންސައްތައަކީ އަދުގެ ސަރުކާރަށް ނިސްބަތްވާ މީހުންނެވެ. މިނިސްޓަރުންނާއި، ސިޔާސީ ޢައްޔަނީންނާއި، ވެރިކަންކުރާ ޕާޓީގެ އިސް އޮފިޝަލުންނާއި، ރައްޔިތުންގެ މަޖިލީހުގެ މެންބަރުންނެވެ. އެހެންކަމަށްވާނަމަ، މިލީކުން ސަރުކާރަށް ވާން އޮތީ ގެއްލުމާއި ހަލާކެވެ. 

ރައްޔިތުން އެކަމުގެ މައްޗަށް ކަންބޮޑުވު ވާއިރު، މޫނު އަނބުރާލައި، އެއީ ބޭކާރު ވާކަތަކެއްކަމަށް ސިފަކުރާން އުޅުމީ އެމްޑީޕީގެ އަޑު ރައްޔިތުން ނާހާ ސަބަބުތަކުގެ ތެރެއިންވާ ކަމެކެވެ. ކަރަޕްޝަނާއި ޚިޔާނާތަކީ ވަކި ޕާޓީއަކަށް ނިސްބަތްވާ ކަމެއް ނޫންކަމާއި، އެމްޑީޕީގެ ތެރޭގައިވެސް އެނަހަމަ ނުފޫޒުތަކުގައި ޖެހި އަވަދިވެފައިވާ މީހުން ތިބިކަމުގެ ހިތި ޙަޤީޤަތް ޤަބޫލުނުކޮށް، ޢާންމުންނަށް ފެންނަނީ ޕާޓީއިން ހައްތަހާ ހާސަރު ދިގުކުރާ ތަނެވެ. ޢުޒުރު ދައްކާ ތަނެވެ.  

ޙަޤީޤަތަކާ ކުރިމަތިލާނަމަ، އަދީބުގެ މުއްފަތުން އުޅުނު މީހުން އަދު އެމްޑީޕީގައި ތިބިކަމާއި، 2018 ގައި ވެރިކަމަށް އަންނާންވީ އިންޞާފުގެ ވަޢުދު ނުފުދޭކަމާއި، ރައީސް ޞާލިޙް ވެރިކަމުން ވަކިވެވަޑައިގަތުމުގެ އަދީބު މިނިވަންކުރުމުގެ ގޮތްކުޑަ ނިންމެވުން ނިންމަވާ، ތަންފީޒުކުރެއްވިކަން، އެމްޑީޕީއިން ޤަބޫލުކުރަން ޖެހެއެވެ. އެކަން ކުރަން އުނދަގޫ ވަނީއެވެ.

އެމްޑީޕީ އުފެއްދީ ރައީސް މައުމޫން ޢަބްދުލް ޤައްޔޫމްގެ ވެރިކަމުގެ ސިފަތަކާ ދިމާ ދެކޮޅަށެވެ. ޕާޓީ ބިނާކުރީ މިނިވަންކަމާއި، ތަފާތު ޚިޔާލާއި، ދެފުށްފެނުމާއި، ހެޔޮ ވެރިކަމުގެ އަސާސްތަކުގެ މައްޗަށެވެ. އެމްޑީޕީއަކީ ޚުދުމުޚުތާރުކަމާއި، ކޮރަޕްޝަނާއި، ޢާއިލީ ވެރިކަމާއި، ވަކިމީހަކަށް ވަކި ގޮތް ހެދުމާ ދެކޮޅު ޕާޓީއެވެ.

ނަމަވެސް، އެމްއެމްޕީއާރްސީގެ މައްސަލަ އެކަށީގެންވާ ގޮތުގައި ބަލާ، ފިޔަވަޅު ނޭޅުނީ އެކަންޏެއް ނޫނެވެ. ރައީސް ޞާލިޙްގެ ވެރިކަމުގެ ކޮރަޕްޝަންވެސް ޔާހަބޭސް ވީއެވެ. ކޮރަޕްޝަނަށް ކެތް ނުވެގެން، ލޯމަރާލައިގެން ނުތިބޭންވެގެން ސިޔާސީ ޢައްޔަނިން ސަރުކާރުން ކެނޑެމުން ދިޔަ އިރުވެސް ފަރުވާލެއް ނެތެވެ. ފެނަކަ އިގެ ޑެޕިއުޓީ މެނޭޖިންގް ޑިރެކްޓަރުކަމުން އިބްރާހިމް ވަޙީދު ކެނޑުނީ ވައްކަމާއި ޚިޔާނާތުގެ ކުޅިގަނޑު ތަނުގައި ބޮޑުވެގެން، ރަސްމީ ސިޓީއަކުން އެކަމުގެ ޝަކުވާ ރައީސް ޞާލިޙަށް ހުށަހަޅުއްވާފައެވެ. އޭނާއަކީ މިއަދު އެމްޑީޕީގެ ޗެއާރޕާސަންގެ ނާއިބެވެ. 

ވައްކަމާއި ކޮރަޕްޝަނާ ދެކޮޅު ޕާޓީވީ ރައީސް ޔާމިންގެ ވެރިކަމުގައި ހިންގި ބާވަތަށް ކަންކަން ތަކުރާރުކޮށް، ތަރުތީބުކުރި ޕާޓީއަކަށެވެ. ނަތީޖާއަކީ އިތުބާރު ގެއްލުމެވެ. ރައީސް ޔާމިނެކޭ، އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެކޭ އެމްޑީޕީއެކޭ ތަފާތެއް ނެތުމެވެ. އަދި ޖޯޝާއި ފޯރީގައި މަގުތަކަށް ނުކުމެ، އެމްޑީޕީގެ ފަހަތުގައި ރުކުރުވާލި ގަދަފަދަވެގެންވީ، މީސްގިނަ ސަފުތައް ސޮހޮލުވެ، ވަޅޯވުމެވެ. 

އެއްކޮޅުން މިސަރުކާރު ޖަވާބުދާރީ ކުރުވާން ޖެހެއެވެ. ކުރަމުންދާ ފީކަޅާ ކަންކަން ފާހަގަކޮށް، ރައްޔިތުންނަށް އޮޅުންފިލުވައިދީ، ކުށްވެރިކޮށް، ހުއްޓުވާން ހިންމަތްކުރާން ޖެހެއެވެ. މީގެ ތެރޭގައި ކޮރަޕްޝަނާއި، ބޭކާރު ޕްރޮޖެކްޓުތަކާއި، ބޭކާރު ޚަރަދާއި، ހަމަނުޖެހިގެން އުޅޭ ދަރަނީގެ ކަންކަން ހިމެނެއެވެ. އަދި މައި ސަރުކާރުގެ މުށުތެރެއަށް ބާރުތައް ޖަމާކުރުމާއި، ލާމަރުކަޒީ ނިޒާމު ބަލިކަށިކުރުމާއި، ސުޕްރީމް ކޯޓު އަތްދަށުލުމާއި، މިނިވަން މުއައްސަސާތަކުގެ ދަތާއި ވަކި އުފުރުން ހިމެނެއެވެ. މިފަދަ ވިޔާނުދާ ކަމާއި ދެކޮޅު ހަދާ، މަދަނީ ބަސްނޭހުންތައް ރާވާ، ކާމިޔާބުކަމާއެކު އިހަށް ހިންގި، އެމްޑީޕީ ފެންނަނީ މީހުން ނެރޭން އާދޭސްކުރަމުންދާ ތަނެވެ. 

އަނެއްކޮޅުން، ކަރަޕްޝަނާއި ފަސާދައާ ދެކޮޅަށް ހަރުކޮށް ތެދުވެވޭކަށް ނެތެވެ. ރައީސް ޞާލިޙްގެ ވެރިކަން އޮތީ ކޮރަޕްޝަނާއި ވައްކަމުގައި ފިސާރި ހޭކެވިފައެވެ. އެމްއެމްޕީއާރްސީ އަކަސް އަދި ރައީސް ޞާލިޙްގެ ސަރުކާރަކަސް ބައި އެޅުނު މީހުން ތިބީ ޕާޓީގެ މަޤާމުތަކުގައި ފައިހިއްޕާފައެވެ. ޤައުމީ މަޖިލީހުގައިވެސް އަތުގައި ޖެހި ދަތުގައިވެސް ހޭކި ފައިހުރި މީހުން މަދެއް ނޫނެވެ. 

އެހެންވީމާ އެމްޑީޕީއިން އަޑުއުފުލިޔަސް، ފެންނަނީ ނެގިމަޑުކޮށެވެ. ވަރަށް ބަލިކަށްޓެވެ. ވަކާލާތުގައި ޖާނާއި ފުރާނަޔާއިގެން ތެދުވެ ގަންނާކަށް އެޕާޓީއަކަށް ނުކެރެއެވެ. ހުރިހާ ޖޯރެއް ލާފައި އިހުހެން ޙައްޤަށްޓަކައި ތެދުވެ ހިންދެމިލާން އުނދަގުލެވެ. 

އަނެއް ފަރާތަށް އެމްޑީޕީ ބޯ އަނބުރާލި، މިފަހުގެ އަނެއް ކަމަކީ މޭޔަރު އާދަމް ޢާޒިމް މާލެ ސިޓީ ކައުންސިލުގައި ގަންނަމުންދާ ގަނޑެވެ. މިކަމުގެ މައްޗަށް އަޅުގަނޑު ވާނީ ތަފްޞީލު ގޮތުގައި ލިޔެފައެވެ. ޚުލާޞާއަކީ ޖޫން މަހުގެ ފަހުކޮޅު އަމިއްލަފުޅަށް ބިޑު އަދި ޕްރޮޕޯޒަލް އިވެލުއޭޝަން ކޮމިޓީއެއް އުފައްދަވާން މޭޔަރު ހުށަހަޅުއްވައިފިއެވެ. ކޮމިޓީއަށް މެންބަރުންގެ ނަންފުޅުތައްވެސް ހުށަހެޅުއްވީ ޚުދް މޭޔަރެވެ. ތާޢީދުކޮށް ވޯޓު ދިނީ ޕީއެންސީއެވެ.

ޢާޒިމް ވިދާޅުވަނީ މިއީ ލަފާދޭ ކޮމިޓީއެއް ކަމަށެވެ. ނުވަތަ މުރާޖަޢާ ކޮމިޓީއެއް ކަމަށެވެ. ނަމަވެސް އޭނާގެ އަމިއްލަ އަތުން ސޮއިއަޅާ، ޢާންމުކޮށްފައިވާ ނިންމުމުގައި އޮތީ އެހެންނަކުން ނޫނެވެ. އޭގައި ބުނަނީ ބިޑުތަކާއި އިވެލުއޭޝަންގެ މަސައްކަތް ހިންގާނީ މިފާސްކުރި އައު ކޮމިޓީއިން ކަމަށެވެ. މާލިއްޔަތާބެހޭ ޤާނޫނާއި ޤަވާޢިދު ބަޔާންކުރާ ބިޑު ކޮމިޓީއަށް ދާނީ މި އައު ކޮމިޓީއިން ބަލާ، ޕޮއިންޓުދީފައި ކަމަށެވެ. 

އިއްތިފާޤުން، މިއައު ކޮމިޓީއިން ފުރަތަމަ ބަލާ، ވަޒަންކުރީ މޭޔަރުގެ އަމިއްލަފުޅު ވިޔަފާރި މަޞްލަޙަތުތައް އެކުލެވޭ ކުންފުންޏަކުން ސަލްމާން މިސްކިތާ ޖެހިގެން އޮތް ހުސްބިމުގައި ޢިމާރާތްކުރަން ހުށަހެޅި ޕާކިންގް ބިލްޑިންގްއެއްގެ ބިޑެކެވެ. 

ތަނުގެ ސިވިލް ސަރވަންޓުންގެ ޓެކްނިކަލް އިވެލުއޭޝަން ކޮމިޓީގެ ބަދަލުގައި، ކައުންސިލަރުން ނަގައިގެން، އަމިއްލައަށް ބިޑު އަދި ޕްރޮޕޯޒަލް އިވެލުއޭޝަން ކޮމިޓީއެއް ހެދި މީހަކީ މޭޔަރުކަމުގައި އިނދެގެން ޑރ. މުޙައްމަދު މުޢިއްޒުނަމަވެސް އެމްޑީޕީއިން އޮންނާނީ ހަނު ބާވައެވެ؟

ވަކި މަދުބައެއްގެ ވައްކަމާއި ކޮރަޕްޝަން އެމްޑީޕީގެ ފައިގައި އެޅުވިފައިވާ ބަރޯސީއެއް ފަދައެވެ. އެތައް ހާސް ތެދުވެރި، އިންސާފަށް ލޯބިކުރާ ޢާންމު މެންބަރުންވެސް އެމަދު ވެރިންގެ ޢަމަލުތަކުގެ ހުތުރާއި ބަރުކަން ކޮނޑު އަޅާން ޖެހިފައިވެއެވެ.

ނަތީޖާއަކީ މިވެރިކަމާ ނުރުހޭ ވަރާ އަޅާ ބަލާއިރު، އެމްޑީޕީއިން ގޮވާލީމާ މަގުމައްޗަށް ނުކުންނަ މީހުން މަދުވެފައިވާ މަތިވެރި ނިސްބަތެވެ. މަގުތަކަށް ނުނިކުންނަނީ މިސަރުކާރު ގަންނަ ގަނޑު ނޭނގިނެއް ނޫނެވެ. ނުވަތަ ވަރިހަމަވީމައެއްވެސް ނޫނެވެ. އެމްޑީޕީއަކީ ޙަޤީޤީ އިޞްލާޙުގެ އާރުކާޓީއިން ކަމަށް ދެކޭން އުނދަގޫވާތީއެވެ. ޖެހެނީ ހަމަ އެއްތާކުއޭ ހީވާތީއެވެ.

ފެނަކަ އަޙްމަދު ސަޢީދު ފަދަ މީހުންގެ ޚިޔާނާތާއި ވައްކަމުގައި މަތިއަޅާން އުޅުމަށްވުރެ، އެފަދަ ޢަމަލުތަކުން ފޭވެ، ދުރަށްޖެހުން އެމްޑީޕީއަށް މާ ބުއްދިވެރި ގޮތެއްކަމަށް ނުވޭބާވައެވެ؟ އާނއެކެވެ. ސަރުކާރުން 3 އޮކްޓޫބަރުގެ ކުރިން ފެނަކައިގެ ޚާއްސަ އޮޑިޓު އެޢާންމުކުރީ އެއްވުމަށް ދާ މީހުން މަދުކުރާށެވެ. ޤަސްދުގައި ރާވައިގެން، އެއެއްވުމުގެ އަޑާއި ޖޯޝް ފަނޑުކުރާށެވެ. އެހެނެކޭ ކިޔާ، ފެނަކައިގެ ވައްކަން އޯކޭ ވާކަށް ނުވަތަ ނުވާކަމަކަށް ހަދާކަށް ނުޖެހެއެވެ. 

އާނއެކޭ، ތިމަންނާމެންގެ ވެރިކަމުގައިވެސް ނޭދެވޭ ކަންކަން ހިނގިއޭ، ކޮރަޕްޝަނާއި ފަސާދަ އެކަށީގެންނުވާ، ބަލައިނުގަނެވޭނެ ފެންވަރަށް ބައެއް ތަންތަނުގައި ދިޔައޭ ބުނުމަކީ ރައީސް މުޢިއްޒަށް ތާޢީދުކުރުމެއް ނުވަތަ މޮޅެއް ދިނުމެއް ނޫނެވެ. އެކަން ކުރާންވީ އިތުބާރު އަނބުރާ ހޯދާށެވެ. އެމްޑީޕީއާމެދު އޮތް އުންމީދު އަލުން އައު ކުރާށެވެ. ތަފާތު ދައްކާށެވެ. 

ސުވާލަކީ ކުރިއަށް މިއޮތް 5 އަހަރު ވޭތިކުރާނީ އެމްޑީޕީގެ ވެރިކަމުގެ 5 އަހަރުގެ ވަގުން ޙިމާޔަތްކުރަން ތޯއެވެ؟ ނުވަތަ އެމްޑީޕީގެ އަޞްލު އުޞޫލުތަކާއި އަސާސްތަކުގެ މައްޗަށް އަލުން ބިނާވެގަނެ، ޕާޓީއަށް އިތުބާރު އިޔާދަކޮށް، ދިވެހި ރައްޔިތުންގެ ހިތުގެ ވިންދުކަމުގައި އަލުން ވާންތޯއެވެ؟ 

މާލެ ސިޓީ ކައުންސިލްގެ ގަލޮޅު އުތުރުގެ ގޮނޑި ފުރުއްވާ މުޙައްމަދު ސައިފް ފާތިޙްއަކީ މޯލްޑިވްސް އިންޑިޕެންޑެންޓްގެ ކޮލަމިސްޓެކެވެ. އޭނާ މަތީ ތަޢުލީމު ޙާސިލުކުރީ ކޮމިއުނިކޭޝަން، އިންޓަރނޭޝަނަލް ސްޓަޑީޒް އަދި ޕަބްލިކް ޕޮލިސީގެ ދާއިރާއިންނެވެ. ނޫސްވެރިއެއްގެ ގޮތުގައްޔާއި، އެޑިޓަރެއްގެ ގޮތުގައްޔާއި، ނޭޝަނަލް ޕްލޭނިންގް މިނިސްޓްރީގެ ސީނިއަރ ޕޮލިސީ ޑައިރެކްޓަރެއްގެ މަޤާމު ފުރާފައި ވެއެވެ. 

މީޑިޔާގައި މަސައްކަތް ފުރަތަމަ ކުރީ މިނިވަން ރޭޑިއޯގެ ޕްރެޒެންޓަރެއްގެ ގޮތުގައްޔާއި، މިނިވަން ޑެއިލީގެ ލިޔުންތެރިއެއްގެ ގޮތުގައެވެ. ކޮޅުނބުގައި ހުންނަ އިނގިރޭސި ހައިކޮމިޝަން އަދި ޔޫރަޕިއަން ޔޫނިއަންގެ މިޝަންއަށް ތަރުޖަމާގެ ގިނަ މަސައްކަތެއް ކޮށްފައިވެއެވެ. އޭނާ އިތުރުވާހަކަ ކިޔާ ޕޮޑްކާސްޓެއްވެސް މިހާރު ހުށަހަޅައިދެއެވެ.