ލީކުވާކަން އެނގޭއިރު، އަޅާނުލައި ތިއްބާ ފުވައްމުލަކުގެ ފެން ސަޕްލައި އެއްކޮަށް ހުއްޓުމަކަށް
2020 ފެށިގެންވެސް ލީކުވާކަން އެނގެއެވެ. ފިޔަވަޅު އަޅާފައި ނެތީއެވެ.
ކުރެހުމާއި ޑިޒައިން: ޑޮސެއިން
13 ނޮވެމްބަރު
ޝަފްއާ ޙަމީދު އަދި ޙަސަން މޫސާ
ފުވައްމުލަކުގެ ފެން ހޮޅިތަކަށް ގެއްލުންވެފައި، އަދި ހަލާކުވަމުންދާތާ މަދުވެގެން ހަތަރު އަހަރު ވެއްޖެ އެވެ. އެކަމާމެދު އިނގިއްޔެއްވެސް ހިއްލާލަން މިވިސްނީ، ޢާންމު ޞިއްޙަތުގެ ކުއްލި ނުރައްކަލަކާ ހަމައަށް ގޮސްގެންނެވެ. ހޯމަ ދުވަހުގެ މެންދުރު ފަހު ދައުލަތުގެ ޔުޓިލިޓީ ކުންފުނިން ދޭ ފެނުގެ ޚިދުމަތް ކަނޑާލުމުން ފުވައްމުލަކުގައި ފެން ނެތްތާ 48 ގަޑިއިރު ވޭތިވެ ދަނީއެވެ. މިއީ މާލެއާއި އައްޑޫ ނަގާފައި، އެއް ފަސްގަނޑެއްގައި އެންމެ ގިނަ މީހުން ދިރިއުޅޭ ރަށެވެ.
ސަރުކާރުގެ އޮފިޝަލަކު މޯލްޑިވްސް އިންޑިޕެންޑެންޓުގައި ވިދާޅުވީ، ޝައްކު ކުރެވޭ، ނަމަވެސް ރަސްމީކޮށް ރިޕޯޓު ނުކުރާ ލީކުތަކާމެދު ހެލްތު އަދި ރެގިއުލޭޓަރީ އޭޖެންސީތަކުން ކަންބޮޑުވުން ފައުޅުކުރާތާ އަހަރުތަކެއް ވެފައިވާ ކަމަށެވެ.
"އަޅުގަނޑުމެންނަށް އެނގިފައިވަނީ 2020 ވަނަ އަހަރުން ފެށިގެން ނެޓްވޯކްގައި ލީކްތައް ހުރިކަން. އެކަން ރަނގަޅު ކުރަން މަސައްކަތް ކުރަމުން އަންނަނީ،" ނަން ނުޖެހުމަށް ޝަރުތުކޮށް ވާހަކަދެއްކި މަސްދަރު ހާމަކުރި އެވެ.
މީގެ ތިން ހަފްތާއަށް ވުރެ ގިނަ ދުވަސް ކުރިން ފެން ތަޣައްޔަރުވެދާނެ ކަމުގެ އިންޒާރު ކަމާބެހޭ ފަރާތްތަކަށް ލިވުފައިވެއެވެ. އޭގެ ފަހުން ހެލްތު ޕްރޮޓެކްޝަން އެޖެންސީން ވަނީ ފުވައްމުލަކު ހޮސްޕިޓަލާއި ފުވައްމުލަކު ސިޓީ ކައުންސިލާ ބައްދަލުކޮށްފަ އެވެ. އަދި ޔުޓިލިޓީ ރެގިއުލޭޓަރީ އޮތޯރިޓީން ވަނީ އެ ނެޓްވޯކް އިންސްޕެކްޓްކޮށްފަ އެވެ. މިދިޔަ ހަފްތާގައި ނަގާފައިވާ ފެނުގެ ސާމްޕަލެއް މާލެ ގެނެސް ޓެސްޓު ކުރުމުން އެނގުނީ، އެއީ ބޭނުން ކުރުމަށް ރައްކާތެރި އެއްޗެއް ނޫންކަމެވެ. ޓެސްޓުތަލިމް އެކަން ކަށަވަރު ކޮށްދިނެވެ.
ފެނުގެ ނެޓްވޯކް ސާފުކުރުމަށް ކްލޯރިންގެ މަތީ ޑޯޒެއް އިންޖެކްޓް ކުރަމުން ދާކަމަށް މާލެ ފިޔަވާ އަތޮޅުތެރޭގައި ކަރަންޓާއި ނަރުދަމާގެ ޚިދުމަތް ފޯރުކޮށްދޭ އަދި ދަރާވިކިފައިވާ ދައުލަތުގެ ކުންފުނި ފެނަކަ ކޯޕަރޭޝަނުން ހޯމަ ދުވަހުގެ މެންދުރު 1 ޖެހިއިރު، ފެނުގެ ޚިދުމަތް މެދުކަނޑާލުމުގެ ކުރިން އިޢުލާންކޮށްފައި ވެއެވެ.
މަރާމާތަށް، ދެ ދުވަސް ނަގާފާނެ ކަމަށް ފެނަކަ އިގެ ފުވައްމުލަކު ބްރާންޗުން ސިޓީ ކައުންސިލާއެކު ހޯމަ ދުވަހުގެ ރޭ ބޭއްވި ކުއްލި ބައްދަލުވުމުގައި ބުނެފައި ވާކަމަށް ޚަބަރު ލިބެއެވެ.
އެޗްޕީއޭ އާއި ފުޑް އެންޑް ޑްރަގް އޮތޯރިޓީގެ އިރުޝާދުތަކަށް ބިނާކޮށް، ފެނަކަ އިންވަނީ "ކަނޑައެޅިފައިވާ މިންގަނޑުތަކާ އެއްގޮތަށް މުޅި ހޮޅި ޑިސްއިންފެކްޓްކޮށް، ޓޭންކުތައް ސާފުކޮށް، ފްލަޝްކޮށް،" އަލުން ފެން އުފެއްދުމުގެ މަސައްކަތް ފަށާފައި ކަމަށް ރައީސުލްޖުމްހޫރިއްޔާގެ ތަރުޖަމާނު ހީނާ ވަލީދު އަންގާރަ ދުވަހުގެ މެންދުރު 2:51 ހާއިރު ކުރި ޓްވީޓެއްގައި ބުނެފައިވެ އެވެ. ފެން ފޯރުކޮށްދިނުން އަލުން "ކުރިއަށް އޮތް ހަ ގަޑިއިރު ތެރޭގައި" ފަށާނެ ކަމަށް ވެސް އޭނާ ވަނީ ޔަގީންކޮށްދީފަ އެވެ. ނަމަވެސް ބުދަ ދުވަހުގެ ރޭ މިލިޔުން ޝާޢިޢުކުރި އިރު އަދި ޚިދުމަތް ފުރިހަމައަށް އިއާދައެއް ނުކުރެ ވެއެވެ.
ފެނަކަ ވަނީ ބުދަ ދުވަހުގެ ހެނދުނުގެ ވަގުތެއްގައި ލީކުތަކެއް އުޅޭކަން ކަށަވަރުވަރު ކޮށްދީފައެވެ. އަދި "ފެނުގެ ނެޓްވޯރކްއިން ލީކުވާ ތަންތަން ދެނެގަތުމަށް" ޓަކައި މެންދުރު 12 ގެ ފަހުން ބައެއް ސަރަޙައްދުތަކަށް އަލުން ފެންދޫކުރާނެ ކަމަށް އިޢުލާން ކުރިއެވެ. މިފެން ބުއިމަށާއި ކެއްކުމަށް ނުވަތަ ފެންވަރާން ބޭނުން ނުކުރުމަށް ފެނަކަ އިން ވަނީ އިންޒާރު ދީފައެވެ.
ފުނޑޭގޮތަށް ހަދާފައި
ފުވައްމުލަކުގެ ޑެޕިއުޓީ މޭޔަރު މުޙައްމަދު ފިކުރީ ވަނީ އަވަސް އަރުވާލައިގެން، މަރާމާތުކުރަމުން ދާތީ އެކަމާމެދު ކަންބޮޑުވުން ފައުޅުކުރައްވާފައެވެ. ތަޣައްޔަރުވެފައިވާ ހޮޅިތައް ޑިސްއިންފެކްޓް ކުރާން ބޭނުންކުރާ ހައި ޑޯޒް ކްލޯރިންގެ އަސަރު ކެނޑޭންދެން ހޮޅިތަކުން ފެން ދުއްވާ، ސާފުކުރަން ޖެހޭނެކަން އޭނާ މޯލްޑިވްސް އިންޑިޕެންޑެންޓު ގައި ފާހަގަކުރެއްވިއެވެ.
"ކްލޮރިން ގިނައިން ހުންނަ ފެން ބޯން ނުވަތަ ފެންވެރުމަށް ދޫކޮށްފިނަމަ، އެކަމުގެ އަސަރު މީހުންގެ ޢާންމުންގެ ޞިއްޙަތަށް ކުރާނެ،" އޭނާ އިންޒާރު ދެއްވި އެވެ. ފެން ބޭނުން ނުކުރުމަށް ފެނަކަ ދިން އިންޒާރު އަކީ ކައުންސިލުން އެދިގެން ޢާންމުކުރި އިންޒާރެއްކަމަށް ވެސް އޭނާ މަޢުލޫމާތު ދެއްވިއެވެ.
ފިކުރީ ވިދާޅުވި ގޮތުގައި ފެނުގެ ނިޒާމުގައި ބޮޑެތި ގެއްލުންތަކެއް ލިބިފައިވެ އެވެ. ފުވައްމުލަކުގެ ގިނަ ދުވަސްވެ، ކަފާސްވެފައިވާ ޑީސެލިނޭޝަން ޕްލާންޓްތަކުން ބޭނުންވާ ވަރަށް ފެން އުފެއްދުމުގެ ޤާބިލުކަން ނެތްކަމާއި، އެޕްލާންޓުތަކަކީ ވަރަށް ކުރީގެ މޮޑަލެއްކަމުން، ސްޕެއާރ ޕާޓްސް މިހާރު ނުލިބޭކަމާއި، ހުރި ތިން ޕްލާންޓުގެ ތެރެއިން އެއް ޕްލާންޓް ދާދި ފަހުން ހަލާކުވެފައިވާ ކަމަށްވެސް ފިކުރީ ކިޔައިދެއްވިއެވެ.
ސަޕްލައި ހޮޅިތަކުގައި ބޮޑެތި ލީކުތަކެއް ހުރިކަން ވަނީ ފާހަގަކުރެވިފައެވެ. ނެޓްވޯކްގައި ކްރޮސް ކަނެކްޝަންތަކުން ބޯން ކަމުނުދާ ތަޣައްޔަރުވެފައިވާ ވަޅުފެން، ހޮޅިތަކުގެ ތެރެއަށް ފޭދިފައި ވެއެވެ.
އެކަށީގެންވާ ވަރަށް ފެނުގެ ޕްރެޝަރު ނުހުންނާތީ މައްސަލަ އިތުރަށް ގޯސްވެއެވެ. އެ ނެޓްވޯރކް އޮޕަރޭޓް ކުރަނީ އެއް ބާރ ޕްރެޝަރުގައި ނަމަވެސް ލީކްތަކުން ތަޣައްޔަރުވީމާ، އެކަން ފިލުވާން މަދުވެގެން ދެ ބާރ ޕްރެޝަރގައި ފެން ދުއްވާން ބޭނުންވާ ކަމަށާއި، އެކަމަކު މުސްކުޅި ޕްލާންޓުތަކުން އެ ޕްރެޝަރުގައި ފެން އުފެއްދާ، ފޮނުވުމުގެ ޤާބިލުކަމެއް ނެތެވެ.
2019 ވަނަ އަހަރު މަގު ހެދުމުގެ މަސައްކަތުގައި ބޮޑެތި ލީކުތަކެއް ފެނުނު ފަހުން ފެނުގެ ނެޓްވޯރކްގައި މައްސަލަތަކެއް ހުރިކަން ކައުންސިލަށް އެނގިފައިވެ އެވެ. ކުރީގެ ވެރިކަމުގައި ލީކުވުން ބަލާ ޚާއްޞަ އާލާތް ގެނެސް، މަރާމާތު ކުރަން މަސައްކަތް ކުރި ކަމަށާއި، ނަމަވެސް މައްސަލައިގައި އަޞްލު ސަބަބަށް ވާޞިލު ނުވެވޭކަން ފިކުރީ ފާހަގަކުރެއްވިއެވެ. 2013 ވަނަ އަހަރު ޤާއިމުކުރި ފެނުގެ ނިޒާމުގެ ހޮޅި އެޅީ "ވަރަށް ފަރުވާކުޑަކޮށް" ކަމަށާއި، ބޭނުންކޮށްފައި ހުރީ ފެންވަރު ދެރަ ޖޮއިންޓާއި ހޮޅިއާއި އާލާތްކަން ހާމަކުރައްވާ ފިކުރީ ވިދާޅުވީ "ޞިއްޙީ މިންގަނޑުތައް ދެމެހެއްޓުމަށް ނުވަތަ ރައްކާތެރިކަން ކަށަވަރު ކުރުމަށް އެއްވެސް މަސައްކަތެއް ކޮށްފައި ނުވާ" ކަމަށެވެ.
އޭނާ އިތުރަށް ވިދާޅުވީ 2013 ވަނަ އަހަރު ނިންމި މަޝްރޫޢަކީ "މަކަރެއް" ކަމަށާއި، ހޮޅިތައް ގުޅުވައި، ބެއްދުމުގައި ނުހަނު ފަރުވާ ކުޑަކޮށް، ޚަރަދުކުޑަ، ކަން ފަސޭހަގޮތުގައި ނިންމާލާފައި ވާކަމަށެވެ.
ފެނުގެ ކޮލިޓީގެ މައްސަލަތައް ކައުންސިލަށް ފާހަގަ ކުރެވުނީ މީގެ ދެތިން މަސް ކުރިންނެވެ. އެކަމަކު ފުވައްމުލަކުގައި ޓެސްޓް ކުރުމުގެ ވަޞީލަތްތައް ނެތުމުން، ވަގުތުން ބަލާ، ޓެސްޓުނުކުރެވި އޮތީއެވެ. ނޮވެމްބަރު މަހުގެ ކުރީކޮޅު ޔުޓިލިޓީ ރެގިއުލޭޓަރީ އޮތޯރިޓީގެ ޓީމަކުން އައިސް، ސާންޕަލް ނަގައި، ފެން ޓެސްޓު ކުރިއެވެ. ނަމަވެސް ޓެސްޓުގެ ނަތީޖާ ކައުންސިލަށް ރަސްމީކޮށް ލިބިފައި ނުވާ ކަމަށް ޑެޕިއުޓީ މޭޔަރ ފިކުރީ ވިދާޅުވި އެވެ.
އެކަމަކު ކައުންސިލަށް އެކި މަސްދަރުތަކުން އެނގުނު ގޮތުގައި "ފެން ނުރައްކާތެރި މިންވަރަށް ތަޣައްޔަރުވެފައިވާ" ކަމަށާއި އެކަމުގެ ސަބަބުން ޑިސްއިންފެކްޓްކޮށް ކްލޮރިން ސާފުކުރުމަށް އެޗްޕީއޭއިން ޢަމުރުކޮށްފައިވާ ކަމަށް ކިޔައި ދެއްވަމުން، ފުވައްމުލަކުގެ ޑެޕިއުޓީ މޭޔަރ ވިދާޅުވީ
ފެން ސަޕްލައި ކަނޑާލި ދުވަހު ޔުޓިލިޓީ ރެގިއުލޭޓަރީ އޮތޯރިޓީން ފެނަކައަށް އިންޒާރުގެ ސިޓީއެއް ފޮނުވިއެވެ. އެ އޮތޯރިޓީއިން އެންގީ ހަލާކުވެފައިވާ ފެން ޕްލާންޓް މަރާމާތުކޮށް، މަސައްކަތް ނުކުރާ ބޯހޯލް އަލުން ކޮނެ، ރަނގަޅުކޮށް، ހަލާކުވެފައިވާ ސްޓޯރޭޖް ޓޭންކުވެސް މަރާމާތު ކުރުމަށެވެ. އަދި ލީކުވާ ހުރިހާ ތަނެއް ދެނެގަނެ، މަރާމާތުކޮށް، ކްރޮސް ކަނެކްޝަންތައް ނައްތާލުމަށެވެ.
މި މައްސަލަތަކަށް އަވަހަށް ޙައްލު ނުލިބުމަކީ ފުވައްމުލަކުގެ ރައްޔިތުންގެ ފެނުގެ ރައްކާތެރިކަން ގެއްލި، މުޅިން ފެނުގެ ޚިދުމަތް ކަނޑާލަން ޖެހުމުގެ ފުރުޞަތު އޮތް ކަމެއް ކަމުގައި ސޯޝަލް މީޑިއާގައި ލީކުވެފައިވާ ފެނަކަ އަށް ޔުޓިލިޓީ ރެގިއުލޭޓަރީ އޮތޯރިޓީއިން ފޮނުވި ސިޓީގައި ވެއެވެ. މިއީ ޞައްޙަ ސިޓީއެއްކަން މިނޫހަށް ކަށަވަރު ވެފައި ވެއެވެ.
ބުދަ ދުވަހުގެ ވަގުތެއްގައި ފެނަކަ އިން އަލުން ފެން ގުޅާ، ޓެސްޓު ކުރަން ފެށިފަހުން ކައުންސިލަށް އަޕްޑޭޓެއް ލިބިފައި ނުވާ ކަމަށާއި، ދެމެހެއްޓެނިވި ޙައްލަކީ 1،500 ޓަނު އުފެއްދޭ ވަރުގެ މަދުވެގެން އެއް އައު ޕްލާންޓު ގެނައުން ކަމަށާއި، މިހާރު ބޭނުންކުރަނީ 500 ޓަނުގެ ޕްލާންޓެއް ކަމަށް ޑެޕިއުޓީ މޭޔަރު ވިދާޅުވިއެވެ.
ޚުދު ފިކުރީ ވެސް 2020 ވަނަ އަހަރުން ފެށިގެން ބުއިމާއި ކެއްކުމަށް މިނަރަލް ވޯޓާ ބޭނުން ކުރަމުން އަންނަ ކަމަށް އޮޅުންފިލުއްވައި ދެއްވަމުން، ވިދާޅުވީ ފެނަކަ އިން ސަޕްލައިކުރާ ފެން ބޭނުންކުރާ އިރު ފިލްޓާރ ކުރާ ކަމަށާއި، ފެން ސަޕްލައި ގުޅިފަހުން 95 އިންސައްތަ ޢާންމުން ވަޅުފެން ބޭނުންކުރުން ހުއްޓާލާފައިވާ ކަމަށެވެ. ވަޅު ފެން ރައްކާތެރި ނޫންކަމަށްވެސް އޭނާ ވިދާޅުވިއެވެ.
ފުވައްމުލަކުގެ ނަގާކިޔާ ރައްޔިތުންނާއި މުއައްސަސާތަކުގެ ވެރިންނަށް ފެނުގެ ކޮލިޓީއާމެދު ހުރި ކަންބޮޑުވުންތައް އެނގޭއިރު، ގިނަ ރައްޔިތުންނަށް މައްސަލައިގެ ބޮޑުކަން އޮޅުން ފިލާފައި ނެތްކަމަށް ޑެޕިއުޓީ މޭޔަރ ފިކުރީ ވިދާޅުވި އެވެ.
ނޮވެމްބަރު މަހުގެ 4 ގައި ފުވައްމުލަކަށް ރައީސް ޑރ މުޙައްމަދު މުޢިއްޒު ވަޑައިގަތުމުން އެކަންބޮޑުވުންތައް ޙިއްސާކޮށްފައި ވެއެވެ. 2024 ވަނަ އަހަރުވެސް އެމަނިކުފާނު އަރިހު އެކަންބޮޑުވުންތައް ދެންނެވުނެވެ. ފިކުރީ ވިދާޅުވީ ރައީސްވެސް ތަކުރާރު ކުރައްވަނީ އެހެންވެސް އިދާރާތަކުގެ ޖަވާބު؛ "އަޅުގަނޑުމެން މި ބަލަނީ، އަޅުގަނޑުމެން ފިޔަވަޅު އަޅަނީ" ކަމަށެވެ.
ފިކުރީ ވިދާޅުވީ ކުރިއަށް އޮތް ތަނުގައި، ހަފްތާއަކު އެއްފަހަރު ފުވައްމުލަކުގެ ފެން އައްޑޫގައި ޓެސްޓުކުރެވޭނެ އިންތިޒާމު ހަމަޖައްސާފައި ވާނެކަމަށް ފެނަކަ އިން ބުނެފައި ވާކަމަށެވެ.
މޯލްޑިވްސް އިންޑިޕެންޑެންޓުން މިލިޔުން ޝާޢިޢުކުރި އިރުވެސް ފެނަކަ އާއި އެޗްޕީއޭގެ ފަރާތުން ކޮމެންޓެއް ނުލިބެއެވެ.
ތަޣައްޔަރުވުމުގެ އަގު
ފުވައްމުލަކުގައި ގާތްގަނޑަކަށް 10،000 މީހުން ދިރިއުޅެއެވެ. ފާއިތުވި އަހަރުތަކުގައި ދެކުނުގެ މި އަތޮޅުވަނީ ފެމުނާއެކު ޑައިވް ކުރުމުގެ، މަޝްހޫރު ފަތުރުވެރިކަމުގެ މަންޒިލެއްގެ ގޮތުގައި ދުނިޔޭގެ ފެންވަރުގައި މަޝްހޫރުވެފައެވެ.
ފުވައްމުލަކުގައި މިވަގުތު 100 އަށް ވުރެ ގިނަ ފަތުރުވެރިން އެބަތިބި ކަމަށް ޑެޕިއުޓީ މޭޔަރު ލަފާކުރައްވަ އެވެ. އަދި ގެސްޓްހައުސްތައް ވެސް މެނޭޖް ކުރަމުން އަންނަނީ ފުޅީގައި ބަންދުކުރި ފެނުން ކަމަށް އޭނާ ވިދާޅުވި އެވެ.
ފުވައްމުލަކުގައި ހުންނަ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ މައި މަރުކަޒުގެ ބޭރުގައި ދިގު ކިއުތަކެއް ހޯމަ ދުވަހުގެ މެންދުރު ފަހު ހެދިއެވެ. ސިފައިން ފެން ގުޅި ބަހަން ފެށުމުންނެވެ. އަންގާރަ ދުވަހު ވަނީ 2،800 ކޭސް ފުޅި ފެން ވައިގެ ނުވަތަ ކަނޑު މަގުން އެތެރެކޮށްފަ އެވެ.
އެހީތެރިކަން ފޯރުކޮށްދިނުމުގެ މަސައްކަތްވަނީ އެއްބާރުލުމާއި، އެކުގައި މަސައްކަތް ކުރުން ދަށްވުމުގެ ސަބަބުން ގަޑުބަޑުވެފައި ކަމަށާއި، ސިޓީ ކައުންސިލުގައި ފެން ބެހުމުގެ ލިޔާޤަތާއި ތަޖުރިބާ ހުރިނަމަވެސް، މައި ސަރުކާރުން ކައުންސިލް އެމަސައްކަތާ ނުބައްސާކަމަށް ޑެޕިއުޓީ މޭޔަރ ވިދާޅުވިއެވެ. ފެން ބެހުމުގެ މަސައްކަތް އެމްއެންޑީއެފް އާއި ލޯކަލް ގަވަރމަންޓް މިނިސްޓްރީއިން ހިންގަމުން އަންނައިރު، އެއް ކަމެއް ދެތިން ހަތަރުފަހަރު ކުރާންޖެހުމާއި، ހަމަނުޖެހުންތަކާއި، ލަސްވުމާއި، އުނދަގޫކަން މެނުވީ މަސައްކަތުން ނުފެންނަކަމަށް ފިކުރީ ވިދާޅުވިއެވެ.
"ޝަކުވާތައް ފުނިޖެހިފައި،" ހުރިކަން ފާހަގަކުރައްވާ، އިންތިޚާބީ ކައުންސިލަރުންނަށް އެޝަކުވާތައް ޢާންމުން ބަންޑުންކުރަމުންދާ ކަން ހާމަކުރައްވަމުން، ޑެޕިއުޓީ މޭޔަރ ފިކުރީ ވިދާޅުވީ ކައުންސިލުން މިހާރު ވިސްނަމުންދަނީ އަމިއްލަ ބަޖެޓް ބޭނުންކޮށްގެން ގޭބިސީތަކުގެ ބޭނުންވާ މިންވަރު ވަޒަންކުރުމަށާއި ފެންފުޅި ބެހުމަށް ދޮރުން ދޮރަށް ޓީމުތައް ފޮނުވުމަށެވެ.
ފެނަށް ޖެހި ތިނ ދުވަސް ވެގެން ދިޔައިރު، ބުދަ ދުވަހުގެ މެންދުރު ފަހުގެ ވަގުތެއްގައި ވަނީ މުޒާހަރާއެއް ބާއްވާފައެވެ.
"ރާއްޖޭގެ ގިނަ ރައްޔިތުންނަށް ނޭނގުނު ނަމަވެސް ފާއިތުވި ދެ މަސް ދުވަހު ފުވައްމުލަކުގެ ރައްޔިތުން ތިބީ ޑަބްލިއުއެޗްއޯގެ މިންގަނޑުން ބަލައިނުގަނެވޭ ބޯފެނުގެ ސަބަބުން ބަލި ޙާލަތެއްގައި،" މުޒާހަރާ ކުރި މީހަކު ބުންޏެވެ. "ކުޑަކުދިންނާއި ބޮޑެތި މީހުންނަށް ބޭރަށްހިންގުން ޖެހި، މީހުންނަށް އެލާޖީ އާއި ހަމުގެ މައްސަލަތައް ދިމާވަމުން އަންނަނީ. މިއީ ފުވައްމުލަކުގެ ރައްޔިތުންނަށް ޙައްޤު މިންވަރެއް ނޫން." އޭނާ ބުންޏެވެ.
ޑެޕިއުޓީ މޭޔަރ ފިކުރީ ވިދާޅުވީ ފާއިތުވި ތިން މަސް ދުވަހުގެ ތެރޭގައި ބޭރަށްހިންގުން ފެތުރިފައިވާ ކަމަށާއި ނަމަވެސް ހޮސްޕިޓަލަށް ނުކަތާ ވަރު ނުވާކަމަށާއި، ގޮހޮރުގެ މައްސަލަތައް ވެސް އިތުރުވެފައިވާ އިރު، ޑިސެންޓަރީ އިންފެކްޝަންތައް ފާހަގަވެފައިވާ ކަމަށެވެ.
ފުވައްމުލަކު ހޮސްޕިޓަލުގެ ސެކްރެޓަރީ ޖެނެރަލް ވަނީ އޮކްޓޯބަރު މަހު ބޭރަށް ހިންގުމާއި ހޮޑުލުމުގެ މައްސަލަތައް އިތުރުވެފައިވާކަން ކަށަވަރު ކޮށްދީފައެވެ. "އެކަމަކު އޭގެ ފަހުން މައިތިރިވެއްޖެ" ކަމަށް އަންގާރަ ދުވަހު މޯލްޑިވްސް އިންޑިޕެންޑެންޓަށް މަޢުލޫމާތު ދެމުން އޭނާ ވިދާޅުވި އެވެ.
ނަމަވެސް ސަޕްލައި ކަނޑާލިފަހުން ތަޣައްޔަރުވެފައިވާ ފެނުގެ ސަބަބުން ބަލިތަކުގެ އަޑުތައް ފެތުރިފައިވާ ކަމަށް ފުވައްމުލަކުގެ ރައްޔިތަކު މޯލްޑިވްސް އިންޑިޕެންޑެންޓަށް ކިޔައިދިނެވެ. "ޓީޗަރުން ކުދިންނަށް ބަނޑުގައި ރިއްސާ ކަމަށް ރިޕޯޓް ކުރި ނަމަވެސް" އެއީ މާކަށް ބޮޑު ކަމެއްގެ ގޮތުގައި ބަލާފައި ނެތްކަމަށް އޭނާ ކިޔައިދިނެވެ. "ގިނަ ބަޔަކު ބަލިވާތާ މިހާރު ތިން މަހަށް ވުރެ ގިނަ ދުވަސް ވެއްޖެ. އަހަރެންގެ ދަރިފުޅު އަދި ގާތްތިމާގެ މީހުންވެސް އުޅެނީ ބަލިވެ،" އޭނާ އިތުރަށް ބުންޏެވެ.
ޔޫއާރުއޭ އިން ނޮވެމްބަރު 10 ވަނަ ދުވަހު ފެނާކާއަށް ފޮނުވި ސިޓީގައި ތިރީގައި މިވާ އިރުޝާދުތައް ހިމަނާފައިވެ އެވެ.
ހަލާކުވެފައިވާ ފެން ޕްލާންޓުގެ ފުރިހަމަ އޮޕަރޭޝަނަލް ކެޕޭސިޓީއާ ހަމައަށް މަރާމާތުކުރުން
ހަލާކުވެފައިވާ ބޯހޯލް ރިސްޓޯރކޮށް ކޮމިޝަންކުރުން (ބޯ ހޯލްސް އަކީ ޑީސެލިނޭޝަން އަށް ކަނޑުގެ ފެން ޕަމްޕް ކުރުމަށް ގާތްގަނޑަކަށް 30 މީޓަރުގެ އަޑިއަށް ކޮނެގެން ލާ ހޮޅިއެކެވެ. ކޮންމެ ރަށެއްގައިވެސް މިކަމަށް 2 ބޯހޯލް ބޭނުންވެއެވެ.)
ހަލާކުވެފައިވާ ފެން ރައްކާކުރާ ޓޭންކް މަރާމާތުކޮށް ބޭނުންކުރެވޭ ފެންވަރަށް ގެނައުން.
ފެނުގެ ނެޓްވޯރކްގެ ތެރޭގައި ލީކުވާ ހުރިހާ ތަނެއް ދެނެގަނެ، މަރާމާތުކުރުމަށް އެސެސްމަންޓެއް ހެދުން.
ކްރޮސް ކަނެކްޝަން ކޮށްފައިވާ ގޭބިސީތައް ދެނެގަނެ އެކަން ރަނގަޅުކުރުން (ކްރޮސް ކަނެކްޝަން އުފެދެނީ ގޭބިސީތަކުން ހޮޅި ނެޓްވޯރކަށް ބިމުން ފެން ނަގާ ހޮޅި ގުޅުމުންނެވެ. މިކަމުގެ ސަބަބުން މައި ނެޓްވޯރކަށް ބިމުގެ ފެން ލީކުވެދާނެއެވެ.)
ފުވައްމުލަކު ރައްޔިތުންނަށް ފޯރުކޮށްދޭ ފެން އޮތޯރިޓީން ކަނޑައަޅާފައިވާ ކޮލިޓީ ގައިޑްލައިންތަކާ އެއްގޮތަށް ޓެސްޓްކުރެވޭނެކަން ކަށަވަރު ކުރުން.
އާބާދީގެ ޑިމާންޑާ އެއްވަރަށް ފެން އުފައްދާ މިންވަރު އިތުރުކުރާން ޕްރޮޕޯސަލް އަދި ތަންފީޛުކުރެވޭނެ ވޯކްޕްލޭނެއް ތައްޔާރުކުރުން.
