ރޯދަމަހުގެ ތާވަލުތަކާއި އަގުތަކާއި ޚިދުމަތުގެ ގަޑިތައް

އިސްލާމިކް މިނިސްޓްރީން ބުދަ ދުވަހަކީ ރަމަޟާން މަހުގެ ފުރަތަމަ ދުވަސް ކަމަށް ކަނޑައެޅިއިރު އެހެން އިސްލާމީ ބައެއް ޤައުމުތަކަށްވެސް ރަމަޟާން މަހުގެ ހަނދު ފެނިފައިވެއެވެ. ޝަޢުބާން މަހުގެ 29 ވަނަ ދުވަހުގެ ރޭ ހަނދު ނުފެނުނަމަ، 30 ދުވަހުގެ މަހަކަށް އެމަސްވީއެވެ. 30 ދުވަސް ފުރިހަމަ ވުމަށް ފަހުގައި، ވިދިގެން އަންނަ ދުވަހަކީ ރަމަޟާން 1 އެވެ.

މުސްލިމުންނަށް ރަމަޟާން މަހަކީ އެންމެ މަޤައްދަޞް މާތް މައްސަރެވެ. ޤުރުއާނުގެ ފުރަތަމަ އާޔަތްތައް ކީރިތި މާތް ނަބިއްޔާ މުޙައްމަދު (ޞޢވ) އަށް ބާއްވައިލެއްވި، ދިންނެވުމާއި، ރަޙްމަތުގެ މައްސަރެވެ. ބަނޑުހައި ހޫނުކަމުގެ އިޙްސާސުން، ނިކަމެތިންގެ ޙާލުގެ މައްޗަށް ސިކުނޑި ހިންގުވައި، ހެޔޮ ފޯރުވައި އުޅުމުގެ މައްސަރެވެ. 

ދިވެހިރާއްޖޭގައި ރަމަޟާން މަހަށް ވާ ތައްޔާރީތަކުގެ ތެރޭގައި ގޯތިގެދޮރު ފޮޅާ، ސާފުކޮށް، އާބާތުރަ ފިލުވުމާއި، ހިސާބަކަށް ހިފާގެންގުޅޭ ތަކެއްޗާއި ފަރުނީޗަރު މަރާމާތުކޮށް، އާ ކުރުމާއި، ގާތްތިމާގެ މީހުންނާއި ރަޙްމަތްތެރިންނާއެކު މާ ހެފުން ހިމެނެއެވެ. 

މިފަދަ މާހެފުމެއް މިހަފްތާގެ ކުރީކޮޅު ފުވައްމުލަކުގެ ޢާންމު އާދަކާދައިގެ މަތިން ފެނިފައިވެއެވެ. ފުވައްމުލަކު ހުރިހާ ރައްޔިތުންހެންމެ ގޮނޑުދޮށަށް އެއްވެ، ކެއިންބުއިމާއި ކުޅިވަރުތައް ކުޅުމާއި މޫދަށް އެރުން އޮތެވެ. މިފަދަ ގޮނޑުދޮށުގެ އިޖުތިމާޢީ އެއްވުންތަކާއި ކުޅިސަމާ އެހެން ބައެއް ރަށްރަށުގައިވެސް އޮވެއެވެ. 

ކުރިއަށް އޮތް 29 ނުވަތަ 30 ދުވަހުގެ ތެރޭގައި ދުވަހީ ތާވަލުތައް ތަރުތީބު ވެފައި ހުންނާނީ ރޯދަ މަހުގެ ފުނައަށެވެ. މަސައްކަތް ކުރާ މިންވަރު ލަސްވެފައި، މަސައްކަތު ގަޑި މަދުވެފައި، ގިނައިން މުސާރަ ލިބިފައި، ގޭގޭގެ ޚަރަދު ބޮޑުވެފައި، ހިސާބަކަށް މަދުވަމުން މިހާރު ދިޔަސް- އިސްރާފު އިތުރުވެފައި، ކިޔެވުމާއި ނަމާދުގެ ވަގުތު ގިނަވެފައި، ޢާއިލީ އެއްވުންތަކާއި މުނިއުފާ ތިންހަތަރު ގުނަވެގެން ދާނެއެވެ. 

މިއީ ރަމަޟާންމަހާއެކު ތާވަލުތަކާއި ޚިދުމަތްތަކާއި އެހެނިހެން ފާހަގަކޮށްލެވޭ ކަންކަމަށް އަންނާނެ ބަދަލުތަކުގެ ގައިޑެކެވެ. 

ސިވިލް ސާވިސް އަދި ސަރުކާރުގެ މަސައްކަތު ގަޑިއަކީ ހެނދުނު 9 އިން މެންދުރު 1 އަށެވެ. އަމިއްލަ ގިނަ ވިޔަފާރިތަކުވެސް މަސައްކަތު ގަޑިވެސް ކުޑަކުރެއެވެ.

ކުރީ އަހަރުތަކެކޭ އެއްފަދައިން ރަމަޟާންމަހުގެ އެންމެ ފަހު 10 ދުވަހު ސަރުކާރުގެ އޮފީސްތައް ބަންދުކުރާނެއެވެ. މިއީ ލައިލަތުލް ޤަދްރު ވިލޭރޭ ހިމެނިގެންވާ ނަރަކައިން ދިންނެވުމަށް ޚާއްޞަ 10 ދުވަހުވެ. ފަހު 10 އަކަށް ބަންދުކުރާ އުޞޫލު ޢާންމު ކުރީ 2024 ވަނަ އަހަރު ރައީސް ޑރ މުޙައްމަދު މުޢިއްޒު ވެރިކަމަށް ވަޑައިގަތުމަށްފަހުގައެވެ. ހިސާބަކަށް ފާޑުކިޔުން ރައްދުވެފައިވާ ކަމެއް މެއެވެ. 

ބޭންކް އޮފް މޯލްޑިވްސްގެ ބްރާންޗްތައް ހުޅުވާފައި ހުންނަނީ މަސައްކަތު ދުވަސްތަކުގައި ހެނދުނު 9:30 އިން މެންދުރު 12:30 އަށެވެ. މަރުކަޒީ ބޭންކު - މޯލްޑިވް މަނިޓަރީ އޮތޯރިޓީ (އެމްއެމްއޭ) ގެ ޚިދުމަތް ދޭ ވަގުތަކީ ހެނދުނު 9:30 އިން މެންދުރު 12 އަށެވެ. ސްޓެލްކޯގެ ސާރވިސް ކައުންޓަރުތައް ހުޅުވާފައި ހުންނަނީ ހެނދުނު 9:15 އިން މެންދުރު 1 އަށެވެ. ރަމަޟާން މަހުގެ ފަހު 10 ދުވަހުގެ ތެރޭގައި ޚިދުމަތުގެ ގަޑި ހެނދުނު 11 އިން މެންދުރު 1 އަށް ކުޑަ ކުރެވޭނެއެވެ.

ރަމަޟާން މަހުގެ ފުރަތަމަ ހަފުތާއަށްފަހު ސްކޫލުތައް ބަންދުކޮށްފައި، ދެން ހުޅުވޭނީ ފިޠުރު ޢީދު ބަންދު ނިންމާފައި، މާޗް މަހުގެ 23 ވަނަ ދުވަހުއެވެ. 

މާލެ އާއި ހުޅުމާލެއާ ދެމެދު ދަތުރުކުރާ ބަހުގެ ޚިދުމަތް ހެނދުނު 7 އިން ދަންވަރުގެ ނިޔަލަށް ކުރިއަށްދާއިރު، ރޯދަ ވީއްލާން މެދުކަނޑާފައި، އަލުން ފަށާނީ 7:20 ގައެވެ. މާލެއިން އެއާޕޯޓަށް ދަތުރުކުރާ ބަސްތައް އަލުން ފަށާނީ 6:40 ގައެވެ. ހުޅުމާލެއިން އެއާޕޯޓަށް އަލުން ފަށާނީ 7 ޖަހާއިރުއެވެ. ހުޅުމާލޭގެ އެތެރޭގެ ބަސް ރޫޓުތައްވެސް ރޯދަ ވިއްލަން މެދުކަނޑައިލާނީ ހަވީރު 5:15 ގައެވެ. އަލުން ފަށާނީ 7:15 ގައެވެ. މާލޭގެ ތެރޭގައި ހަވީރު 6 ޖަހަންދެން ބަސް ރޫޓުތަކުގެ ޚިދުމަތް ކުރިއަށްދާނެއެވެ. އެއަށްފަހު ދެން ފެށޭނީ ތަރާވީޙް ނަމަދު ނިމި، 9 ޖެހީމައެވެ. 

ވިލިމާލޭ އެތެރޭގެ ބަސް ރޫޓު ރޯދަވީއްލާން މެދުކަނޑާނީ 6 އިން 7 އަށެވެ. ރޯދަވީއްލުމުގެ ކުރިން ވިލިމާލެއަށް އެންމެ ފަހު ފެރީ ފުރާނީ ހަވީރު 5:50 ގައެވެ. ދެ ޓާމިނަލް ވެސް ބަންދުކޮށްފައި ހުންނާނީ 7 ޖަހަންދެންނެވެ. ހުޅުމާލެއަށް ދާ ފެރީތައް މެންދުރުފަހު 3 ގެ ފަހުން ހުއްޓޭނެއެވެ. ތިލަފުށީ ފެރީ ވެސް ހުއްޓޭނީ ހަވީރު 5 އިން ހަވީރު 7 އާ ދެމެދުއެވެ.

މާލޭގައި ކުނި ނެގުމުގެ މަސައްކަތް ހިންގާން ހަމަޖައްސާފައި އޮތީ ރޭގަނޑު 8:30 އިން ދަންވަރު 2 އާ ދެމެދުގައެވެ. ހުޅުމާލޭގައި ކަލެކްޝަން ކުނި ނަގާ ގަޑިތަކަކީ ރޭގަނޑު 9 އާއި މެންދަމުން އަނބުރާ 2:30 އާ ދެމެދުގައެވެ. ވިލިމާލޭގައި ކުނި ނަގާން ފަށާނީ ރޭގަނޑު 9 ޖަހާއިރުއެވެ. މެންދަމު 1 ޖަހާންދެންނެވެ. އިހުގެ ޢާންމު ގަޑިތަކަށް އަލުން ބަދަލުވާނީ ޢީދަށް ފަހު، ހަފްތާއެއް ވޭތިވީމައެވެ.

ގްރޭޓާރ މާލޭ ސަރަޙައްދުގައި ހެވީ ޑިއުޓީ ވެހިކަލް (ބަރު އުޅަނދު) ދުއްވުޏާއި، މުދާ އުފުލުމާއި ބޭލުން ހެނދުނު 8 އިން 9:30 އަށް އަދި ހަވީރު 4:30 އިން ރޭގަނޑު 8:00 އަށް މަނަލެވެ. ރަމަޟާން މަހުގެ ފަހު 10 ދުވަހުގެ ހެނދުނުގެ ވަގުތުތަކުގައި މިފަދަ ހިފެހެއްޓުމެއް ނެތެވެ. 

ޓްރެފިކާއި މަގުމަތީގެ ކާރޫބާރޫ މެނޭޖު ކުރުމަށް ލޯކަލް މާރުކޭޓާއި މިސްކިތްތަކާއި ބިޒީ މަގުތަކާއި ސިނަމާލޭ ބްރިޖާއި ހުޅުމާލޭ ހައިވޭގައި ފުލުހުން ޕެޓްރޯލްތައް ވަރުގަދަ ކުރާނެއެވެ.

ރެސްޓޯރެންޓްތަކާއި ކެފޭތައް ދުވާލު ގަޑީގައި ހުންނާނީ ބަންދުކޮށްފައެވެ. ފަތުރުވެރިންނާއި ބިދޭސީ މަސައްކަތްތެރިންނަށް ޚިދުމަތް ދިނުމަށް އިކޮނޮމިކް ޑިވެލޮޕްމަންޓް މިނިސްޓްރީން ޚާއްޞަ ހުއްދަ ދީފައިވާ ތަންތަން ހުންނާނެއެވެ.

ހަވީރު 5:30 އިން ފެށިގެން ކެފޭތަކާއި ރެސްޓޯރެންޓްތައް ދަންވަރު 3 ޖަހަންދެން ހުޅުވާފައި ހުންނާނެއެވެ. ހެނދުނު 5:30 ގައި ފިހާރަތައް ހުޅުވާނެއެވެ. މެންދަމުން އަނބުރާ 1 ޖަހާއިރު ފިހާރަތައް ބަންދުކުރަން ޖެހޭނެއެވެ. ޝައްވާލް މަހުގެ ފުރަތަމަ ހަތް ދުވަސް ނިމޭންދެން ޢަމަލުކުރާނީ މި ތާވަލަށެވެ.

ދަޅު، ތައްޔާރީ ކާނާއާއި، ތާޒާ އުފެއްދުންތަކާއި، ކެއްކުމަށް ބޭނުންކުރާ ސާމާނުގެ ޑިމާންޑު ރަމަޟާން މަހަށް އަރައިގެންދާތީ، ކާބޯތަކެތީގެ އަގުތައްވެސް އުފުލޭނެއެވެ. ފާއިތުވި ހަތަރު އަހަރު ވެސް ކާބޯތަކެތީގެ އަގު ދިޔައީ އުފުލެމުންނެވެ. 

ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބުނަނީ މިއަހަރުގެ ރަމަޟާން މަހަށް ރަނގަޅަށް ތައްޔާރުވެފައިވާ ކަމަށެވެ. "މިހާރު" އަށް މަޢުލޫމާތު ދެއްވަމުން އެސްޓީއޯގެ މެނޭޖިންގް ޑިރެކްޓަރު ޝިމާދު އިބްރާހިމް ވިދާޅުވީ ޟަރޫރީ ތަކެތީގެ އަގު "ތިރިކޮށްފައި" ބަހައްޓަވާނެ ކަމަށާއި ރަމަޟާން މަހާ ދިމާކޮށް، އިތުރަށް މައްޗަށް ނުދާނެކަން އެކުންފުނިން ކަށަވަރު ކުރާނެ ކަމަށެވެ. 

އޭނާ އިތުރަށް ވިދާޅުވީ ފިޔާ ކިލޯއެއްގެ އަގު 15 ރުފިޔާއަށް ވުރެ މަތި ނުވާނެ ކަމަށެވެ. ލޮނުމެދު ކިލޯއެއްގެ އަގު 50 ރުފިޔާގައި ހިފެހެއްޓިފައި ހުންނާނެ ކަމަށެވެ. ނިމިދިޔަ އަހަރުގެ ރަމަޟާން މަހު ލޮނުމެދުގެ އަގު 300 ރުފިޔާއަށް ކިލޯއެއް އަރައިގެން ދިޔައެވެ. އޮރެންޖެއް ފަސްހަ ރުފިޔާއަށް ލިބޭނެ ކަމަށެވެ. މިރުހާއި ކާށީގެ އަގުވެސް ހިފެހެއްޓިފައި ހުންނާނެ ކަމަށެވެ. 

މާލޭ އިންޑަސްޓްރިއަލް އޭރިއާ، ނޯތު ހާބަރު އަދި ހުޅުމާލެ އިންޑަސްޓްރިއަލް އޭރިއާގައި އެސްޓީއޯ އިން ވަނީ ޚާއްސަ ހޯލްސޭލް ސެންޓަރުތަކެއް ހުޅުވައިފައެވެ. ހުޅުމާލެ ފޭސް 1 ގައި އާ ރީޓެއިލް އައުޓްލެޓެއް ކަމަށްވާ ޕީޕަލްސް ޗޮއިސް ފިހާރަ ހުޅުވައިފައި ވެއެވެ.

ސަރުކާރުގެ ޒަރޫރީ ކާބޯތަކެތީގެ ލިސްޓް ސެޕްޓެމްބަރު މަހު މުރާޖަޢާކޮށް، އިތުރު 23 އެއްޗެއް ހިމެނުމަށްފަހު، ރަމަޟާން މަހަށް ޚާއްޞަކޮށް އަގު މޮނިޓަރ ކުރެވިފައިވާ ތަކެތީގެ ޖުމްލަ ޢަދަދު ވަނީ 26 އަށް އަރާފައެވެ. ހަނޑޫ، ހަކުރު އަދި ފުށުގެ އިތުރުން މިހާރު މި ލިސްޓުގައި ހިކަރާ، ދޮންކެޔޮ، ފަޅޯ މާމުއި، ޖުމްހޫރީ މޭވާ، އޮރެންޖް، ލުނބޯ، އަނބު، މިރުސް، ރަތް ފިޔާ، އަލުވި، އިނގުރު، އާފަލު، ކެރެޓް، ކެބެޖް، ބިސްކޯދު، ބަރަބޯ، އަލަ، ކައްޓަލަ، ރީނދޫ މުގު، ބިސް އަދި ކާށި ހިމެނެއެވެ.

މި ތަކެތި ރާއްޖޭގެ ހުރިހާ ކަންކޮޅެއްގައި ހުރި އެސްޓީއޯ އައުޓްލެޓްތަކުން އަގު ކޮންޓްރޯލްކޮށްގެން ލިބެން ހުރި ކަމަށް ރިޕޯޓްތައް ބުނެއެވެ، އުތުރުގެ ހޯރަފުށިން ފެށިގެން ދެކުނުގެ ހުޅުމީދުއާ ހަމައަށް އެސްޓީއޯގެ 13 މިފަދަ އައުޓްލެޓް ހުޅުވާފައި ވެއެވެ. އަދި އުތުރާއި ދެކުނުގެ އަގުތައް އެއް ހަމައެއްގައި ހިފެހެއްޓުމަށް، އެސްޓީއޯއިން ދަނީ ސީދާ ކުޅުދުއްފުށި ސިޓީ އަދި އައްޑޫ ސިޓީއަށް މުދާ ފޮނުވަމުން ދެއެވެ.

އިކޮނޮމިކް ޑިވެލޮޕްމަންޓް މިނިސްޓްރީ އިން މެނޭޖްކުރާ ޚާއްޞަ ޕޯޓަލްއިން މާލެ އާއި ހުޅުމާލޭގެ ފިހާރަތަކުގެ "އަދާއިހަމަ" އަގުތައް އެނގޭން ހުންނާނެއެވެ.

މާލޭގެ ވިޔަފާރި ބަނދަރުގައި ރޯދަ މަސް ފެށުމުގެ ކުރިން މޯލްޑިވްސް ޕޯޓްސް ލިމިޓެޑުން ވަނީ 480 ޓަނުގެ ހަލާކުވާ މުދާ: 13،000 އަށް ވުރެ ގިނަ ޕެކޭޖުގެ ތަރުކާރީ، މޭވާ، ތާޒާ މަހާއި އެހެނިހެން ތަކެތި - ކްލިއާރކޮށްފައެވެ. ހަލާކުވާ މުދާ ރައްކާކުރުމަށް 3،000 އަކަފޫޓުގެ ގުދަނެއް ހަދާ، އޮޕަރޭޝަންތައް އަވަސްވާނެ އިންތިޒާމު ރާވާފައި ވެއެވެ. ސާފުކުރުމަށެވެ. އެމްޕީއެލްއިން ވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9 އިން ހަވީރު 4 އަށް އަދި ރޭގަނޑު 9 އިން ދަންވަރު 1:30 އާ ދެމެދު ލޯޑިންގް، އަންލޯޑިންގް އަދި ކޮންޓެއިނަރު ޝިފްޓް ކުރުމުގެ ޚިދުމަތް ދޭނެކަން އިޢުލާން ކޮށްފައެވެ.

މިދިޔަ އަހަރު ވެސް މިފަދަ އިންތިޒާމުތަކެއް މަތިކޮށް، ކާބޯތަކެތީގެ އަގު ބޮޑު ނުވާނެކަމަށް ސަރުކާރުން ޔަގީންކަން ދިން ނަމަވެސް، ރޯދަ މަހުގެ އެންމެ ފުރަތަމަ ދުވަހު ވެސް އަގުތައް އުފުލުނެވެ. ކަނޑޫދޫ ގިތެޔޮ މިރުހުގެ އަގު މިހާރު ވަނީ ކިލޯއެއް 480 ރުފިޔާ އަށް އުފުލިފައިވާ ކަމަށް ބާޒާރުގެ ރިޕޯޓްތަކުން ދައްކައެވެ. އަންގާރަ ދުވަހު ކުޅުދުއްފުށީގައި ކަރާ ކިލޯއެއްގެ އަގު ވަނީ 20 ރުފިޔާގަި ހުރެފައި 25 ރުފިޔާއަށް އުފުލިފައެވެ. ކަރައަކީ ރޯދަމަހު ދިވެހިން ފަނިހަދަން އެންމެ ގިނައިން ބޭނުންކުރާ މޭވާއެވެ. 

ސަރުކާރުން ދޭ ރޯދަމަހުގެ "ހަދިޔާ" ވިދިވިދިގެން ލިބޭ މިއީ 3 ވަނަ އަހަރެވެ. ފެބްރުއަރީ 12 ވަނަ ދުވަހުގެ ނިޔަލަށް ގްރޭޓާރ މާލޭގެ ގޭބިސީތަކަށް ޖުމްލަ 53،308 ކޭސް ދަޅު މަސް ހިލޭ ބަހާފައި ވެއެވެ. 

ސްޓެލްކޯއިން އިޢުލާން ކޮށްފައި އޮތީ ރަމަޟާން މަހުގެ 30 ދުވަހުގެ ކަރަންޓް ބިލް 400 (26 އެމެރިކާ ޑޮލަރު) ރުފިޔާ އަށްވުރެ ބޮޑު ނުވާނެ ކަމަށެވެ. ރޯދަ މަހުގެ ކުރިން ބޭސްލައިން ޔޫސޭޖަކީ ކޮބައިތޯ ސާފުކުރަން ހުކުރު އަދި ހޯމަ ދުވަހު ކަރަންޓު މީޓަރުތަކުގެ ރީޑިންގް ނަގާފައިވެއެވެ.

މިދިޔަ އަހަރު ސްޓެލްކޯ އާއި ފެނަކަ އިގެ ޔުޓިލިޓީ ޑިސްކައުންޓްތަކުގެ ޖުމްލަ ޢަދަދަކީ 45 މިލިއަން ރުފިޔާއެވެ. ރަމަޟާން މަސް ނިމިގެން ދެން އައި ބިލުތައް އާދަޔާ ޚިލާފަށް ބޮޑު ކަމަށް ރިޕޯޓްކޮށްފައިވާއިރު، އެކަމުގެ ސަބަބަކީ ސްޓެލްކޯއިން ބުނާގޮތުގައި މޫސުމީ ހޫނުކަމާއި އެއާކޮންޑިޝަން ބޭނުންކުރުން އިތުރުވުމެވެ. 

ދިވެހިރާއްޖޭގައި އުޅޭ ހުރިހާ މުސްލިމް މަސައްކަތްތެރިންނަށް ރަމަޟާން މަހުގެ ބޯނަސްގެ ގޮތުގައި 3،000 ރުފިޔާ ލިބެއެވެ.

ޢީދު ނަމާދުގެ ކުރިން ދައްކަންޖެހޭ ފަރުޟު ފިޠުރު ޒަކާތް އުރީދޫ އާއި ދިރާގު އަދި އެތެރޭގެ ބޭންކުތަކުގެ މޯބައިލް އެޕްތަކުގެ އިތުރުން ފިނޭންސް މިނިސްޓްރީގެ ޕޭމަންޓް ގޭޓްވޭ މެދުވެރިކޮށް އޮންލައިންކޮށް ދެއްކޭނެއެވެ. ސުންގަޑިއަކީ ރަމަޟާން މަހުގެ 27 ވަނަ ދުވަހުގެ ހެނދުނު 6 އެވެ. މާލޭގެ އިސްލާމީ މަރުކަޒުގައި ޒަކާތް ބަލައިގަންނަ ކައުންޓަރުތައް ބަހައްޓާފައި ހުންނާއެވެ. ރަށްރަށުގެ ކައުންސިލްތަކުންވެސް ބަލައިގަންނާނެ މެއެވެ.

އެންމެ މަދުވެގެން 12 ރުފިޔާ ޒަކާތަށް ދައްކަން ޖެހޭނެއެވެ. އެންމެ މޮޅު ބާސްމަތީ ހަނޑޫ ބޭނުންކުރާ ފަރާތްތަކުން ދައްކާންޖެހޭނީ 136 ރުފިޔާއެވެ. 

ރަމަޟާން މަހަކީ ހެޔޮފޯރުވައި، ޞަދަޤާތް ދިނުމުގެ މައްސަރެވެ. އަންގާރަ ދުވަހު ބޭންކް އޮފް މޯލްޑިވްސްގެ މުވައްޒަފުން ވަނީ މުޅި ރާއްޖޭގެ 100 ނާޒުކު ޢާއިލާއަކަށް އެހީތެރިވުމަށް މަމްސް އެންޖީއޯގެ "ހެލްޕް އަ ފެމިލީ" ޙަރަކާތަށް އަށް ކޮންމެހެން ބޭނުންވާ ކާބޯތަކެތި ހަދިޔާ ކޮށްފައެވެ. 

މީގެ އިތުރުން ދިރާގުން ދަނީ 100 ޢާއިލާއަކަށް އެހީތެރިވުމަށް މަމްސް އެއިޑާ ގުޅިގެން ޙަރަކާތްތެރިވަމުންނެވެ. އަދި "މިޝަން ފޯ މައިގްރެންޓް ވޯކަރސް މޯލްޑިވްސް" ގެ ނަމުގައި ހިންގާ ޕްރޮގްރާމެއް މެދުވެރިކޮށް ބިދޭސީ މަސައްކަތްތެރިންނަށް ރޯދަވީއްލުން ހަދިޔާކުރުމުގެ އިންތިޒާމުތައްވެސް ދިރާގުން ހަމަޖައްސާފައި ވެއެވެ. 

ރަމަޟާންމަހު ވައްކަން އިތުރުވާނެ ކަމުގެ އިންޒާރު ފުލުހުން ދީފައިވެއެވެ. ޚާއްޞަކޮށް ދެނަމާދު ދޭތެރޭގައްޔާއި، ރޭގަނޑު 9:15 ހާއިރު ތަރާވީޙް ނަމާދު ނިމުމާ ހަމައަށެވެ. އަދި އެހެނިހެން ނަމާދު ވަގުތުތަކުގައިވެސް މެއެވެ. ސަބް އިންސްޕެކްޓަރ މުޙައްމަދު ޝަރީފް ވަނީ މިސްކިތަށް ދާއިރު ރަނގަޅަށް ދޮރުތައް ތަޅުލުމަށް އިލްތިމާސް ކުރައްވާފައެވެ. އަދި ކަސްރަތު ކުރަން ނުކުންނައިރު ސައިކަލް މަޑިދަށުގައި ފޯނާއި ވޮލެޓް ބަހައްޓާފައި ނުދިއުމަށް އިލްތިމާސް ކޮށްފައިވެއެވެ.

ޢާންމު ކުށްތަކުގެ ތެރޭގައި ސައިކަލު ވަގަށް ނެގުމާއި، އިލެކްޓްރޯނިކް ސާމާނަށް އަމާޒުކޮށްގެން ވައްކަން ކުރުމާއި، ފިހާރަތަކުގެ ބޭރުގައި ބަހައްޓާފައިވާ މުދާ ވަގަށް ނެގުން ހިމެނެއެވެ. މިދިޔަ އަހަރު ފުލުހުން ވަނީ މަސްތުވާތަކެއްޗާއި ބަނގުރަލާ ގުޅޭ ކުށްތަކަށް ހުޅުމާލޭގައި ރިސްކް ބޮޑު ބައެއް ސަރަޙައްދުތައް ޚާއްޞަކޮށް މޮނީޓާރ ކޮށްފައެވެ. އޭގެތެރޭގައި ލަކުޑި ޖެޓީއާއި، ފަތާ ޓްރެކާއި، ފްލެޓް ނަންބަރު 1 އިން 5 އަށް ވާ ސަރަޙައްދުތައް ހިމެނެއެވެ. 

އޮންލައިން ސްކޭމްތަކާ މެދު ސަމާލުވުމަށްވެސް ރޯދަ މަހާ ގުޅުވައި ފުލުހުން އިންޒާރު ކޮށްފައި ވެއެވެ. ތަކެއްޗާއި ޚިދުމަތަށް ފައިސާ ޓްރާންސްފާރ ކުރުމުގެ ކުރިން ވިޔަފާރި ރަޖިސްޓްރީ ކޮށްފައިވޭތޯ ބެލުމަށް ނަސޭހަތްތެރިވެފައިއެވެ.

ރިސޯޓްތައް ހިންގަނީ ވަކި، މީހުން ދިރިނޫޅޭ ރަށްރަށުގައި ކަމުން އެތަންތަނުގެ ހިންގުމާއި ތާވަލުތަކަށް އަސަރެއް ނުކުރެއެވެ. 

ދުވާލު ގަޑީގައި ޢާންމު ތަންތަނުގައި ކެއުމާއި ބުއިމާއި ދުންފަތުގެ އިސްތިޢުމާލު ކުރުމަކީ ކަނޑައެޅިގެން މަނާކަމެކެވެ. އަންގާރަ ދުވަހު ލޯކަލް ގަވަރމަންޓް މިނިސްޓްރީ އިން ޢާންމުކުރި ނޫސް ބަޔާނެއްގައި ވަނީ މީހުން ދިރިއުޅޭ ރަށްރަށުގައި ފަތުރުވެރިންނަށް ކާބޯތަކެތީގެ ޚިދުމަތް ޢާންމު ތަންތާނގައި، ހާމައަށް ނުދިނުމަށް އަންގާފައެވެ. އަދި އިސްލާމީ ޘަޤާފަތަށް އިޙްތިރާމު ކުރުމަށް ޚާއްޞަ ސަމާލުކަން ދޭންވެސް އަންގާފައި ވެއެވެ. 

ރަމަޟާން މަހުގެ ހެޔޮ އެދުމާއި ތަހުނިޔާއެވެ.