މުހުލަތު ފަހަނައަޅާ ނުދަނީސް ފައިސާ ޖަމާކޮށްދެވުނީ ކިތައް ދަރިވަރުންގެ ކަމެއް ބުނެއެއް ނުދެވުނު

ކުރިން ދޮގުކުރި ނަމަވެސް، މިނިސްޓްރީ އިން ވަނީ ޓިކެޓަށް ކުރި ޚަރަދު އަނބުރާ ހޯދާން އެދިފައިވާ ކޭސްތަކުގައި ތިން މަހާއި ފަސް މަހާއި ދެމެދުގެ މުއްދަތެއް ހޭދަވާކަމަށް އެެއްބަސް ވެފައެވެ. މަހުން މަހަށް ކިޔަވާކުދިންނަށް ދޭ ފައިސާ ފޮނުވުން ލަސްވާ ކަމަށްވެސް އެއްބަސްވެފައި ވެއެވެ. ނަމަވެސް، އެކަމުން އަސަރުކުރަނީ ކިހާ ދަރިވަރުންނަށްކަން ހާމަކުރާން ދެކޮޅު ހަދާފައިވެއެވެ. 

"ޝަކުވާގެ ސީދާ ޢަދަދެއް ކަނޑައެޅިގެން ދަންނަވާން ނޭނގުނަސް،" ލަސްތަކެއް ވެފައިވާކަމުގެ ޝަކުވާ ލިބިފައިވާކަމަށް މިނިސްޓްރީން ބުންޏެވެ.

ޑިސެމްބަރު މަހުގެ ފަހުކޮޅު، "ޖުބްރާން ޝަރީފް"ގެ ނަމުގައި ހިންގާ "އެކްސް" އެކައުންޓަކުން ރާއްޖެއިން ބޭރުގައި ތިބި ދިވެހި ދަރިވަރުންނަށް ދަޢުވަތު ދިނީ، މަތީ ތަޢުލީމުގެ ލޯނުގެ ކަންކަމުގައި ހަޔަރ އެޑިއުކޭޝަން މިނިސްޓްރީއާއެކު ކުރާންޖެހޭ މުޢާމަލާތްތަކުގެ ތަޖުރިބާ ޙިއްސާ ކުރުމަށެވެ. ލިބުނު އެތައް ޑަޒަނެއްގެ ޝަކުވާތައް އެއްކޮށް، ލިސްޓުކޮށްފައި އެއެކައުންޓުން ޝާޢިއު ކުރިއެވެ. އެ ޝަކުވާތައް ގަލޮޅު އުތުރު ދާއިރާގެ މަޖިލިސް މެމްބަރު މުޙައްމަދު އިބްރާހިމް 'ކުޑޫ' ވަނީ ހަޔަރ އެޑިއުކޭޝަން މިނިސްޓަރ ޑރ ޢަލީ ހައިދަރަށް ރަސްމީގޮތުން ޙިއްސާ ކުރައްވާފައެވެ. 

ކުޑޫ ތައްޔާރުކުރި ކަރުދާހުގައި ފާހަގަކޮށްފައިވާ ކަންބޮޑުވުންތަކުގެ ތެރޭގައި ސްޓައިޕެންޑް ދިނުމުގެ އިތުރުން ޓިކެޓާއި އެހެނިހެން ޚަރަދުތައް އަނބުރާ ހޯދާން އެތައް މަސްތަކެއް ހޭދަކުރާން ޖެހުމާއި، އީމެއިލްތަކަށް ޖަވާބު ނުލިބުމާއި، ވަޓްސްއެޕް ގްރޫޕުގައި ކުރާ ސުވާލުތަކަށް ސާފު ޖަވާބު ނުދިނުމާއި، އިންފްލޭޝަނާ އެކަށޭނަ މިންވަރަށް ދޭ އެލަވަންސް ބޮޑު ނުކުރުމާއި، އަދި އޮސްޓްރޭލިއާގެ ޔުނިވާސިޓީތަކުން ދަރިވަރުންގެ އެކައުންޓްތައް ސަސްޕެންޑްކޮށް، މިނިސްޓްރީން ކޯސް ފީ ނުދައްކައިގެން ކްލާސްތަކަށް ވަނުން ހުއްޓުވުން ހިމެނެއެވެ. 

އޮސްޓްރޭލިއާގެ ތިން ޔުނިވާސިޓީއެއް ކަމަށްވާ ޔުނިވާސިޓީ އޮފް ނިއު ސައުތު ވޭލްސް، ކަރޓިން އަދި މޮނާޝްގެ ސްކޮލަޝިޕް ދަރިވަރުންގެ އެކައުންޓްތައް ސަންސެންޑު ކޮށް ނުވަތަ ސްކޮލަޝިޕް ކެންސަލްކޮށްފައި ވަނީ މިނިސްޓްރީ އިން މުހުލަތު ހަމަވިއިރުެވސް ޓިއުޝަން ފީ ނުދެއްކުމުންނެވެ.

މިޝަކުވާތައް ހިއްޕަވައިގެން ޖަވާބު ހޯއްދެވުމަށް ކުޑޫ  ހަޔަރ އެޑިއުކޭޝަން މިނިސްޓްރީއަށް ދިއުމުގެ އެއް ދުވަސް ކުރިން މިނިސްޓްރީގެ އޮފިޝަލަކު ވިދާޅުވެފައިވަނީ އޮސްޓްރޭލިއާގެ ޔުނިވާސިޓީތަކަށް ދައްކަންޖެހޭ ފައިސާއާ ގުޅޭ އެއްވެސް ޝަކުވާއެއް ލިބިފައި ނުވާ ކަމަށެވެ. ނަމަވެސް އޭގެ ފަހުން މިނިސްޓަރ ހައިދަރު "ސަން" އަށް ވިދާޅުވީ ސްޓައިޕެންޑް ލަސްވާ މައްސަލަ "މި ހަފްތާގައި" ޙައްލުކުރާން މިނިސްޓްރީ އިން މަސައްކަތް ކުރަމުން ދާ ކަމަށެވެ. އަދި ފުރިހަމައަށް ލިޔެކިޔުން ހުށަހަޅާފައިވާ ދަރިވަރުންނަށް ފައިސާ ލިބޭނެ ކަމަށެވެ.

ޖެނުއަރީ 19 ވަނަ ދުވަހު ރައީސުލްޖުމްހޫރިއްޔާގެ ތަރުޖަމާނާ އެކު ޕޮޑްކާސްޓެއްގައި ވާހަކަދައްކަވަމުން މިނިސްޓަރ ހައިދަރު ވަނީ ފައިސާ ދެއްކުން ލަސްވުމުގެ ޒިންމާ ދަރިވަރުންގެ ބޮލުގައި އަޅުއްވާފައެވެ. ވިދާޅުވީ ލަސްތަކެއް ދިމާވަނީ ހުށަހަޅާންޖެހޭ ލިޔެކިޔުން ފުރިހަމަ ނުކުރާތީ ކަމަށެވެ. ފައިސާ ދައްކަންޖެހޭ ދުވަސްވަރުގެ ދެ މަސް ކުރިން ދަރިވަރުން ހުށަހަޅާ މަޢުލޫމާތުތައް ޔަޤީންކޮށް، އެ ދަރިވަރު ޔުނިވާސިޓީގައި ކިޔަވަމުންދާކަން ކަށަވަރު ކުރަން ޖެހޭ ކަމަށާއި، ސްޓައިޕެންޑާއި ޓިއުޝަން ފީ ދެއްކުމުގެ 75 އިންސައްތަ މަސައްކަތް ލަސްވުމެއް ނެތި ހިނގާ ކަމަށެވެ. 

ފެބްރުއަރީ މަހުގެ ތިން ވަނަ ދުވަހު ހަޔަރ އެޑިއުކޭޝަން މިނިސްޓްރީ އިން ވަނީ ސްކޮލަޝިޕް އާއި ސްޓޫޑެންޓް ލޯނު ދޫކުރުމުގެ ކަންކަން ފަސޭހަ ކޮށްދިނުމަށް ޕޯޓަލެއް ތަޢާރަފު ކޮށްފައެވެ. "ކުރި" ޕޯޓަލް މެދުވެރިކޮށް ދަރިވަރުންނަށް މާލީ މުޢާމަލާތްތައް ރިއަލް ޓައިމްގައި ޓްރެކު ކޮށް، ސްކޮލަޝިޕްތަކާއި މާލީ އެހީގެ ސްކީމްތަކަށް ޝަރުޠު ހަމަވާތޯ ބެލުމާއި، ޑިޖިޓަލްކޮށް ލިޔެކިޔުންތައް ހުށަހެޅޭނެ ކަމަށް މިނިސްޓްރީ އިން ބުނެއެވެ.

ސްޓައިޕެންޑު އަދި ޓިއުޝަން ފީ ދޫކުުރުން ލަސްވުމުން ދަރިވަރުން ތަޢުލީމަށް ބުރޫއަރާ، މާލީ ދަތިތައް ކުރިމަތިވާ ކަން ޤަބޫލުކުރައްވާކަމަށްވެސް މިނިސްޓަރ ހައިދަރު ވަނީ ވިދާޅުވެފައެވެ. ހަޔަރ އެޑިއުކޭޝަން މިނިސްޓްރީ އިން ބުނީ 2026 ވަނަ އަހަރުގެ ޖެނުއަރީ އިން ޖޫން މަހުގެ ނިޔަލަށް 320 އަށް ވުރެ ގިނަ ދަރިވަރުންނަށް ސްޓައިޕެންޑް ފޯރުކޮށްދީފައިވާ ކަމަށެވެ. ނަމަވެސް ލަސްތަކެއް ނެތި ފޯރުކޮށްދެވުނީ ކިތައް ދަރިވަރުންނަށް ކަމެއް ހާމަކޮށްފައެއް ނުވެއެވެ. 

ފެބްރުއަރީ މަހުގެ ފަސް ވަނަ ދުވަހު ބޭއްވި ރައްޔިތުންގެ މަޖިލީސް މިއަހަރަށް ހުޅުވުމުގެ  ޖަލްސާގައި، ރިޔާސީ ބަޔާން އިއްވަމަމުން ރައީސް މުޢިއްޒު ވިދާޅުވީ ދަރިވަރުންނަށް ލޯނު ފައިސާ ދިނުމުގެ ކަންކަން ޕްރޮސެސްކުރުން އޮޓޮމޭޓު ކޮށްފައިވާ ކަމަށާއި، މިއީ ޝަކުވާތަކަށް "ދާއިމީ ޙައްލެއް" ކަމަށެވެ. އަދި މެނުއަލް ޕޭމަންޓް ވައުޗާ ސިސްޓަމްގެ ބަދަލުގައި ސަރުކާރުގެ އެސްއޭޕީ ފައިނޭންޝަލް ސިސްޓަމާ ސީދާ ގުޅުވާފައިވާ، އެ ޕޯޓަލް އިން މަސައްކަތް ހިންގާން ފެށީމާ ދެން ދަރިވަރުން ތަކުރާރުކޮށް ލިޔެކިޔުންތައް ހުށަހަޅަން ނުޖެހޭނެ ކަމަށާއި، ސެޓްފިކެޓްތަކާއި މަޢުލޫމާތު ޔަޤީންކުރަން ޖެހޭނީ އެންމެ ފަހަރަކު ކަމަށާއި، އެވޯޑް ލެޓަރ ޖެނެރޭޓް ކުރާނީ ވަގުތުން އޮޓޮމެޓިކް އިވެލުއޭޝަނަށް ފަހު ކަމަށާއި، އޮޓޮމެޓިކުން ތައްޔާރުކުރާ އެއްބަސްވުންތަކާއި ފައިސާ ދެއްކުމުގެ ޝެޑިއުލްތަކުގައި އިލެކްޓްރޯނިކް ސޮއި ބޭނުންކުރެވޭނެ ކަމަށެވެ. އަދި ދިވެހި ބަހާއި އިނގިރޭސި ބަހުން އޭއައި ޗެޓްބޮޓެއް ޤާއިމުކޮށް، ވަގުތުން ޖަވާބު ލިބޭނެ ކަމަށްވެސް އެމަނިކުފާނު ވިދާޅުވިއެވެ.

"ކުރި" ޕޯޓަލް ސިފަކުރަނީ ފައިސާ ދެއްކުން ލަސްވުމާއި، އެއް ލިޔެކިޔުމެއް ތަކުރާރުކޮށް ފޮނުވަން ޖެހުމާއި، ސުވާލުތަކަށް ޖަވާބު ނުލިބުމުގެ ފަރުވާއެއްގެ ގޮތުގައެވެ. އެކަމަކު އެ ޝަކުވާތަކުން އުފައްދާ އަސާސީ މައްސަލަތަކަށް ޙައްލެއް ނުލިބެއެވެ: އެއީ އަހަރުތަކެއް ވާންދެން ފްރީޒުކޮށްފައިވާ ސްޓައިޕެންޑް ރޭޓްތަކެކެވެ. އޮސްޓްރޭލިއާގައި ކިޔަވާއިރު ދިރިއުޅޭން ޚަރަދުވާ ސްޓައިޕެންޑާއި، ވިސާގެ ޝަރުޠުތަކާއި ފީތަކާ، ސަރުކާރުން ދޫކުރާ މިންވަރުތަކާ ނުބައްދަލު ކަމެވެ. 

ބޭރު ޤައުމުތަކުގައި ކިޔަވަމުންދާ ދަރިވަރުން ބުނަނީ ސްޓައިޕެންޑް ރޭޓަށް ދިހަ އަހަރު ދުވަހުގެ ތެރޭގައި ބަދަލެއް އައިސްފައި ނުވާ ކަމަށާއި، ދިރިއުޅުމުގެ އަސާސީ ޚަރަދުތައް މިހާރު ދޭ މިންވަރުން ކަވަރު ނުވާ ކަމަށެވެ. މެލޭޝިއާގައި ކިޔަވަން ސްކޮލަޝިޕް ލިބުނު ކުއްޖަކު ބުނީ "ދިރިއުޅުމުގެ އަގު ބޮޑުވާ ވަރަށް ބަލައި، ސްޓައިޕެންޑަށް އެއްވެސް އެޑްޖަސްޓްމަންޓެއް ނުގެނޭ" ކަމަށެވެ. އިނގިރޭސިވިލާތަށް މިސްރާބު ޖަހާފައިވާ ދަރިވަރަކު ބުނީ ސްޓައިޕެންޑުން ކަވަރު ކުރެވެނީ އިނގިރޭސިވިލާތުގެ އިމިގްރޭޝަން އިން ލަފާދޭ މިންވަރުގެ ބައިކުޅަ ބައެެއް ކަމަށެވެ. 

އޮސްޓްރޭލިއާގެ ޑިޕާޓްމަންޓް އޮފް ހޯމް އެފެއާޒުގެ ޤަވާޢިދުތައް ބުނާގޮތުން އެޤައުމުން ބޭރު ދަރިވަރުންނަމަ، ދިރިއުޅުމުގެ ކަރަދަށް އަހަރަކު މަދުވެގެން 29،710 އޯސްޓްރޭލިއާ ޑޮލަރު ހުންނާން ޖެހޭނެއެވެ. މި ޢަދަދު އަދާއިހަމަ ކޮށްފައިވަނީ 2024 ވަނަ އަހަރުގެ މެއި މަހުއެވެ. ނަމަވެސް ދިވެހިރާއްޖޭގެ ސަރުކާރުން ދޭ ސްކޮލަޝިޕުން ލިބެނީ މަހަކު 2،070 އޯސްޓްރޭލިއަން ޑޮލަރު ނުވަތަ އަހަރަކު 24،840 އޯސްޓްރޭލިއާ ޑޮލަރެވެ. އެހެންވީމާ އަހަރަކު 4،870 އޯސްޓްރޭލިއާ ޑޮލަރު ނުވަތަ ގާތްގަނޑަކަށް 50،000 (3،240 އެމެރިކާ ޑޮލަރު) ރުފިޔާ ދަރިވަރުންގެ އަމިއްލަ ޖީބުން ލާން މަޖުބޫރުވެއެވެ. 

ދޭ ސްޓައިޕެންޑާއި އޮސްޓްރޭލިޔާފަދަ ޤައުމުތަކުގެ އިމިގްރޭޝަނުގެ ޤަވާޢިދުތަކުން ކަނޑައަޅާފައިވާ މިންވަރުތަކާ ދެމެދު ހުރި ތަފާތުގެ ސުވާލަށް ހަޔަރ އެޑިއުކޭޝަން މިނިސްޓްރީ އިން ދިން ޖަވާބުގައި ވާހަކަ ދައްކާފައެއް ނެތެވެ. 

ކަންމިހެން ހުރިއިރު، މިނިސްޓްރީ އިން ވަނީ ޑިސެމްބަރު 23 ވަނަ ދުވަހުގެ ތާރީޚްގައި އޮތް އެލަވަންސް އާއި ސްޓައިޕެންޑް ރޭޓްގެ ޝެޑިއުލެއް މި ނޫހަށް ފޯރުކޮށް ދީފައެވެ.އެއިން އެނގުނީ ޙަޤީޤަތުގައިވެސް އޮސްޓްރޭލިއާ އަށް ދާ ކުދިންނަށް ދޭ ސްޓައިޕެންޑްގެ މިންވަރު އަހަރު ދުވަހަށް ބަލާއިރު 5000 ޔޫއެސް ޑޮލަރު މަދު ކަމެވެ. އިނގިރޭސިވިލާތުގައި ލަންޑަނުން ބޭރުގައި ކިޔަވާ ކުއްޖަކުގެ ސްޓައިޕެންޑަކީ މަހަކު 1،455 ޕައުންޑެވެ. 

ސްޓައިޕެންޑް ރޭޓް ކަނޑައެޅުމަށްޓަކައި، ރަސްމީ ޤާއުމީ އަދި އެކަޑަމިކް ވެބްސައިޓްތަކުގެ ޑޭޓާ އަޅައިކިޔައި، ބަލައިގެން މުރާޖަޢާތަކެއް ކުރިއަށް ގެންދާ ކަމަށް މިނިސްޓްރީގެ އާރްޓީއައި ގައި މަޢުލޫމާތު ދީފައި ވެއެވެ. 

ވިސާ އެޕްލިކޭޝަން ފީ މިނިސްޓްރީ އިން ދައްކައިދެނީއެވެ. ނުވަތަ ދެއްކީމާ އަނބުރާ އެކުއްޖަކަށް ފަހުން ޖަމާކޮށްދެނީއެވެ. ވިސާ ހޯދުމަށް ރާއްޖެއިން ބޭރަށް ދަތުރުކުރަން ޖެހިއްޖެ ނަމަ ތިން ދުވަހުގެ މުއްދަތަށް އެކޮމޮޑޭޝަން އާއި އެހެނިހެން ޚަރަދުތައް ފޫބެއްދުމަށް ފައިސާއާއެކު ރާއްޖެ އެނބުރި އަންނަ ޓިކެޓެއް މިނިސްޓްރީން ފޯރުކޮށްދެއެވެ. އެކި ޤައުމާއި ސިޓީއަށް އެކި ވަރެވެ. 

ލޯން ސްކީމްގެ ދަށުން ވިސާ ފީ ކަވަރު ކުރާއިރު ވިސާ ފީ ދެއްކިކަމުގެ ރަސީދު މިނިސްޓްރީއަށް ހުށަހެޅުމުން އެފައިސާ އެދަރިވަރަކަށް ޖަމާކޮށްދޭނެ ކަމަށާއި، އެހެންނަމަވެސް ލޯން ސްކީމްގެ ދަށުން ދަތުރު ޚަރަދު ނުހިމެނޭ ކަމަށް މިނިސްޓްރީ އިން މި ނޫހާ ޙިއްޞާކުރި މަޢުލޫމާތުގައި ފާހަގަކުރިއެވެ. ލޯން ސެކްޝަނުން މަތިންދާބޯޓު ޓިކެޓުގެ ރޭޓުތައް ކަނޑައަޅަނީ ކޮންމެ މަހަކު ޓިކެޓްގެ އަގުތައް ޗެކްކުރުމަށް ފަހުގައި ކަމަށާއި، 2026 އައިއިރު ތިން މަހާއި ފަސް މަހާއި ދެމެދުގެ މުއްދަތެއްގެ ކުރިން ޓިކެޓުގެ ޚަރަދުގެ ބަދަލު އެދިފައިވާ ކޭސްތައް ނުނިމި ހުރިކަމަށްވެސް މިނިސްޓްރީ އިން މަޢުލޫމާތު ދީފައި ވެއެވެ.

ފައިސާ ދެއްކުމުގެ ސުންގަޑި ހަމަވުމުގެ ކުރިން ޓިއުޝަން ފީ ފޮނުވުނީ ކިތައް ދަރިވަރުންނަށްތޯ ސުވާލުކުރުމުން މިނިސްޓްރީން ޢަދަދެއް ހާމަކޮށްފައެއް ނުވެއެވެ. އޭގެ ބަދަލުގައި ބުނެފައިވަނީ އިންވޮއިސް ޕްރޮސެސް ކުރަނީ ދަރިވަރުގެ ނުވަތަ ޔުނިވާސިޓީ އިން އޮންވޮއިސް ލިބުމުން ކަމަށާއި، ޓިއުޝަން ފީ ދެއްކުމާއި ޑިޕޮސިޓް ކުރުން ލަސްވަނީ ބޭންކުގެ ފޯމުތަކުގައި މައްސަލަ ހުންނާތީ ކަމަށް ބުނެފައިވެއެވެ. 

ސްޓައިޕެންޑް ދެއްކުމަށް ހަމަޖެހިފައިވާ މުހުލަތު 30 ދުވަހަށް ވުރެ އިތުރަށް ފަހަނަ އަޅައިގޮސްފައިވަނީ ކިތައް ކުދިންގެ ތޯ ގޮތުން ސުވާލު ކުރުމުން، މިނިސްޓްރީ އިން ބުނީ ޢާންމުކޮށް ލަސް ނުވާ ކަމަށާއި، ލަސްވަންޏާ ވަނީ ގިނަ ފަހަރު ފޮނުވާ މަޢުލޫމާތު ފުރިހަމަ ނުވެގެން ނުވަތަ ބޭންކްގެ ފޯމުތައް ކުށްކޮށް ފުރާފައި ހުންނާތީ ކަމަށެވެ. 

އެންމެ ފަހުގެ މާލީ އަދާއިހަމައިގައިވާ ގޮތުން 2025 ވަނަ އަހަރުގެ ސްޓޫޑެންޓް ލޯން ސްކީމަށް ބަޖެޓްކުރި 768 މިލިއަން ރުފިޔާގެ ތެރެއިން ޖުމްލަ 603 މިލިއަން ރުފިޔާ ޑިސެމްބަރު 31 ގެ ނިޔަލަށް ދޫކޮށްފައިވާއިރު، މިއީ 2024 ވަނަ އަހަރުގެ އެ މުއްދަތުގައި ދޫކުރި 700 މިލިއަން އަށްވުރެ ދަށް ޢަދަދެކެވެ. ޝަރުޠު ހަމަވާ ހުރިހާ ފަރާތްތަކަށް ލޯނު ދީގެން، ލޯނު ލިބޭ ކުދިންގެ ޢަދަދު މަތިވި ނަމަވެސް ޑިސްބަރސްމަންޓް (ދޫކުރާ މިންވަރު) ވީ ދަށެވެ.

އާރުޓީއައިގެ ޖަވާބުގައި މިނިސްޓްރީ އިން ފޯރުކޮށްދީފައިވާ ތަފާސްހިސާބުތަކުން ރާއްޖެއިން ބޭރުގައި ސަރުކާރުން މާލީ އެހީދީގެން މަތީ ތަޢުލީމު ޙާޞިލުކުރަމުންދާ ދިވެހި ދަރިވަރުންގެ ޢަދަދުތައް ހާމަވެއެވެ؛ މިހާރު 40 ޤައުމެއްގައި ޖުމްލަ 2،274 ދަރިވަރުން ސްޓޫޑެންޓް ލޯންގައި ކިޔަވާން އެބަތިއްބެވެ. ވަކިވަކި 18 ޤައުމެއްގައި އިތުރު 553 ދަރިވަރަކު ސަރުކާރުގެ ސްކޮލަޝިޕްގައި ކިޔަވަމުން ދެއެވެ.

ލޯނު ލިބޭ ފަރާތްތަކުގެ ތެރެއިން އެންމެ ގިނަ ދަރިވަރުން ކިޔަވަނީ މެލޭޝިޔާގައެވެ އެއީ 1،259 ދަރިވަރުންނެވެ. މިއީ މުޅި ލޯނު ޕްރޮގްރާމްގެ ދެބައިކުޅަ އެއްބައި ދަރިވަރުންނެވެ. ދިވެހިރާއްޖޭގައި 156 ދަރިވަރުން، ސްޕެއިންގައި 151 ދަރިވަރުން، އިނގިރޭސިވިލާތުގައި 107، ފިލިޕީންސްގައި 104، ބެލަރޫސްގައި 80، އޮސްޓްރޭލިއާގައި 78 އަދި އެމެރިކާގައި 53 ދަރިވަރުން އެބަތިއްބެވެ.

ސްކޮލަޝިޕް ލިބޭ ފަރާތްތަކުގެ ތެރެއިން އެންމެ ގިނައީ އިނގިރޭސިވިލާތުގައި ކިޔަވާ ދަރިވަރުންނެވެ. އެއީ 193 ދަރިވަރުންނެވެ. ދެން އެންމެ ގިނައީ މެލޭޝިއާގައި ކިޔަވާ ކުދިންނެވެ. އެއީ 111 ދަރިވަރުންނެވެ. އޮސްޓްރޭލިއާގައި ކިޔަވަނީ 28 ދަރިވަރުންނެވެ.

މި ޢަދަދުތަކާ އެހެން އާރްޓީއައި ރިކުއެސްޓަކަށް "މިހާރު" ނޫހަށް މިނިސްޓްރީ އިން ފޯރުކޮށްދިން ކަމަށް އެނޫހުން ރިޕޯޓުކޮށްފައިވާ ޢަދަދުތަކާ ތަފާތުތަކެއް އެބަހުއްޓެވެ. މިހާރު ނޫހުން ރިޕޯޓުކުރީ ލޯނާއި ސްކޮލަޝިޕްގައި ރާއްޖެއިން ބޭރުގައި ތިބި ދަރިވަރުންގެ ޖުމްލަ އަދަދަކީ 1،819 ކަމަށެވެ. މިއީ މިނޫހަށް ދިން މަޢުލޫމާތާ އަޅާކިޔާއިރު 700 އިގެ މަދުވުމެކެވެ. މި ތަފާތުގެ ސަބަބެއް ސާފެއް ނޫނެވެ.