މަސައްކަތުގެ މާޙައުލުގައި ބިދޭސިންނަށް ދިމާވާ މަރާއި އަނިޔާގެ ޙާދިސާތައް ރިޕޯޓުނުކޮށް، ފަސްއަޅުން ޢާންމު ކަމަކަށް

އެގްރޫޕަށް ވަދެ ބަލައިލީމާ ހީވަނީ މަރާއި އަނިޔާގެ ނުރަސްމީ ލޮގެއް ބެލޭހެންނެވެ. ބަންގްލަދޭޝްގެ މަސައްކަތްތެރިން ގެއްލި، އަނިޔާވެ، މަރުވެފައި ޚަބަރުތަކާއި، މަޢުލޫމާތާއި، ފޮޓޯއެވެ. މީގެ ތެރެއިން ގިނަ މައްސަލަތަކުގެ ރެކޯޑު މި ފޭސްބުކް ގްރޫޕު ނޫން ތަނަކުން ފެންނާކަށް ނެތެވެ.ފުލުހުން ނުވަތަ ލޯކަލް މީޑިއާތަކުން ރިޕޯޓް ނުކުރާ އެކްސިޑެންޓްތަކާއި މަރުތަކުގެ އެންމެ އަދާއިހަމަ ޚަބަރުދަބަރު ބަރާބަރަށް މި ގްރޫޕްގައި ޕޯސްޓުކުރެތެވެ.

އެ ހިތާމަވެރި ޙާދިސާތަކުގެ ރެކޯޑުތަކުން ފެންނަނީ މަކަރުވެރި އޭޖެންޓުންނާ ބެހޭ އިންޒާރުތަކެވެ. ވަޒީފާ ދޭނަމޭ ބުނެ، ރާއްޖެ ގެނެސްފައި މަކަރު ހަދައި، މުސާރަ ނުދޭ މީހުންގެ ވާހަކަތަކެވެ. ޙާލުގައި ޖެހިފައި ތިބި ބަންގްލަދޭޝް މަސައްކަތްތެރިންނަށް ވަޒީފާއެއް ހޯދާން އާދޭސްކުރުމުގެ އިޢުލާން ތަކެވެ. ދޭތެރެ ދޭތެރެއިން ބަންގްލަދޭޝް ހައިކޮމިޝަނުން ފޮނުވާ މެސެޖުތައްވެސް ޝާޢިއުކޮށްފައި ވެއެވެ.

ސަޢީދާ ބެހޭ ޕޯސްޓު އެގްރޫޕްގައި ޢާންމުކޮށްފައިވަނީ، ދައުލަތުގެ ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ ވަޒީފާގައި، ތިލަފުށީގައި މަސައްކަތް ކުރަމުންދިޔަ، ޢުމުރުން 24 އަހަރުގެ 'އަމީން މިއާ'ގެ ހަށިގަނޑު، ކުނިފުނިވަރެއްގެ އަޑިން ފުލުހުންނަށް ފެނުނުތާ ދެ ދުވަސް ފަހުންނެވެ.

ވޯކްސައިޓްގެ ސީސީޓީވީ ފޫޓޭޖުން ވަނީ މަރުވި ސަބަބު ހާމަވެފައެވެ. ޖެނުއަރީ 26 ވަނަ ދުވަހު އަމީން ވަނީ އެކްސްކަވޭޓަރެއްގައި ޖެހިފައެވެ. ހޭބަލިވެގެން ވެއްޓުމާއެކު، އުފުލިލާފައި، ކުނިވަރަކާއެކު ގޮސް، ވަޅުލެވުނީއެވެ.  އޭނާގެ ގައިގައި ޖެހުމަށްފަހު ވެސް އެކްސްކަވޭޓަރު ނުހުއްޓި، ހިންގަމުންދިޔަ ކަން ފެނެއެވެ. 

ވެމްކޯއިން އޭނާ ގެއްލިގެން ރިޕޯޓް ނުކޮށް، ދެދުވަސް ދުއްވާލިއެވެ. 

އަމީން އަކީ ބަންގްލަދޭޝްގެ ބްރަހަމަންބަރިއާ ޑިސްޓްރިކްޓްގެ ބަހެރްޗާރު އަވަށަށް ނިސްބަތްވާ ޒުވާނެކެވެ. ބަންގްލަދޭޝްގެ އެތައް ހާސް ލޭބަރުން ރަނގަޅު ދިރިއުޅުމެއް ހޯދުމުގެ އުންމީދުގައި ދިވެހިރާއްޖެ ފަދަ ޤައުމުތަކަށް ދަތުރުކުރާ ފަދައިން، އޭނާވެސް ދިވެހިރާއްޖެއަށް މިސްރާބު ޖެހީ، މިދިޔަ އަހަރުގެ ޖުލައި މަހުގައެވެ.

އޭނާ ގެއްލުނުތާ ދެ ދުވަސް ފަހުން ޖެނުއަރީ 28 ވަނަ ދުވަހުގެ ހަވީރު ހަތަރެއް ޖަހާއިރު ފުލުހުން މީޑިއާއަށް އެންގީ ތިލަފުށީ ސައިޓެއްގައި ގެއްލިގެން ހޯދަމުންދާ މީހަކު ހޯދުމުގެ މަސައްކަތް ކުރަމުންދާ ކަމަށެވެ. އެރޭ 11 ޖަހާކަށް ހާއިރު ފުލުހުން ބުނީ މަރުވެފައިވާ މީހަކު ފެނިފައިވާ ކަމަށެވެ.

ޖެނުއަރީ 26 ވަނަ ދުވަހުގެ މެންދުރު ފަހު އަމީން މިއާ މަރުވީ ކުނި ގެންދިއުމުގައި ހަރަކާތްތެރިވި އެކްސްކަވޭޓަރެއްގެ ދަތްގަނޑުން ޖެހި ވެއްޓިގެން ކަމަށާއި، އޭގެ ފަހުން ކުނިފުނިވަރާއެކު އެހެން ސަރަޙައްދަކަށް ހަށިގަނޑު ގެންދެވި، ވަޅުލެވިފައިވަނީ ކަމަށް ފުލުހުންގެ މީޑިއާ ގްރޫޕުގައި ލިޔެފައިވާ މެސެޖުގައިވެއެވެ.

މިމައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ އެކްސްކަވޭޓަރު ހިންގާން އިން، 32 އަހަރުގެ ޝްރީލަންކާ ފިރިހެނެކެވެ. ހިޝާން މަދޫރަންގާ ދިޝަނަޔަކާ މެނިކާ އަދިވެސް ހުރީ ބަންދުގައި ކަމަށާއި އޭނާގެ މައްޗަށް ޤަސްދުގައި މީހަކު މަރާލުމުގެ ތުހުމަތު ކުރާ ކަމަށް ފުލުހުން މަޢުލޫމާތު ދެއެވެ. 

ވެމްކޯ އަށް ފާޑުކިޔުން އަމާޒުވީ، އަމީން ގެއްލިގެން ދެ ދުވަސް ވީ އިރުވެސް ރިޕޯޓު ނުކުރީމައެވެ. މަސައްކަތު މާޙައުލުގެ ސަލާމަތާ ގުޅޭ ގޮތުން ވެސް ވެމްކޯއަށް ފާޑުކިޔުމާއި ސުވާލު އަމާޒު ވިއެވެ.  ސުވާލުތަކެއް އުފެދިފައިވެ އެވެ. 

ބުނެވެނީ އެކްސްކަވޭޓަރު ހިންގާއިރު، އެސަރަޙައްދެއް ބަންދުކޮށްފައި ހުންނަ ނަމަވެސް، އަމީން އެކުނިފުނިވަރުގެ މައްޗަށް އެރިކަން އެކްސްކަވޭޓަރު ހިންގާން އިން މީހާއަށް ނުފެނުނީ ކަމަށެވެ. 

މިފަދަ ޙާދިސާތަކުގެ މައްޗަށް ސަމާލުވެ، ސަލާމަތީ ފިޔަވަޅު އަޅާން ހޭވެރިކަން އައީ މާލޭގެ ވެމްކޯގެ ސައިޓެއްގައި ދިވެއްސަކަށް ބޮނޑިއެއް ލިބުމުންނެވެ. 

ފެބްރުއަރީ 25 ވީ ބުދަ ދުވަހު ހިއުމަން ރައިޓްސް ކޮމިޝަނުން ވަނީ "މަސައްކަތުގެ މާހައުލުގައި ތަކުރާރުވާ އަނިޔާ" ގެ ސަބަބުން ވެމްކޯގެ އޮކިއުޕޭޝަނަލް ސޭފްޓީ އެންޑް ހެލްތު ޕްރޮޓޮކޯލްތަކާ ގުޅޭ ގޮތުން އަވަސް ތަޙްޤީޤެއް ހިންގާން ފަށާފައި ވާ ކަމަށް އިޢުލާން ކޮށްފައެވެ. އަނިޔާވެ ދިވެހި މީހާ އަދިވެސް އޮތީ އައިޖީއެމް ހޮސްޕިޓަލުގެ ވެންޓިލޭޓަރުގައެވެ.

ސޯޝަލް މީޑިއާގައި ދައުރުވަމުން ދާ ޕޯސްޓެއްގައި ބުނާގޮތުން ފެބްރުއަރީ 22 ވީ އާދީއްތަ ދުވަހުގެ ވަގުތެއްގައި ކުނި އުފުލާ ޓްރަކް ޑްރައިވަރަކުމ ރޭމްޕަކުން ކޮންޓެއިނަރެއްގެ ތެރެއަށް ވެއްޓުނެވެ، ގާތްގަނޑަކަށް 12 ފޫޓު އުހުންނެވެ. ވެމްކޯގެ މެނޭޖްމަންޓުން ފުރަތަމަ އަންގާފައި ވަނީ އެ އެކަން ފޮރުވައި، އޮއްބާލުމަށް ކަމަށް ޕޯސްޓުގައި ވެއެވެ. މިޙާދިސާ ރިޕޯޓުކޮށްފައިވަނީ ފެބްރުއަރީ 24 ވީ އަންގާރަ ދުވަހުގެ ހަވީރު ކަމަށް ފުލުހުން ބުނެއެވެ. 

މުސާރައިގެ މައްސަލަތަކަށް ފަހު، ވަޒީފާދޭ ފަރާތްތަކުން "ގެއްލިފައިވާ" ކަމަށް ރިޕޯޓް ކުރުމުން ނުވަތަ ރަސްމީ ލިޔެކިޔުން ފުރިހަމަކުރުން ލަސްވުމުން، ގިނަ ހިޖުރަވެރި މަސައްކަތްތެރިން ފެތެނީ "ޤަވާޢިދާ ޚިލާފު" ބަޔަށެވެ. މިމައްސަލަ ބޮޑުވެފައިވާކަމުގެ އެންމެ ވަރުގަދަ ނިޝާނަކީ ބިދޭސީ މަސައްކަތްތެރިންގެ އަތުން ބިރުދައްކައިގެން ފައިސާ އަތުލައި، ރިޝްވަތު ނަގަމުންދާކަމުގެ ތުހުމަތުގައި އިމިގްރޭޝަން ކޮންޓްރޯލަރކަމުގައި ހުރި މުޙައްމަދު ޝަމްޢާން ހައްޔަރު ކުރުމެވެ. ވިޔަފާރިތަކާއި އިމިގްރޭޝަން އޮފިސަރުންނާ ގުޅިގެން އިންސާނީ ވަގުވިޔަފާރި ހިންގަމުންދާ ކަމަށް އެމެރިކާގެ ސްޓޭޓް ޑިޕާޓްމަންޓުގެ ރިޕޯޓަކުންވެސް ދާދި ފަހުން އިންޒާރު ކުރިއެވެ. 

އެމީހުންގެ ނާޒުކުކަން ފާހަގަކޮށްލެވުނީ މިދިޔަ އަހަރު ބަންދުކޮށްފައިވާ ހިޖުރަވެރި މަސައްކަތްތެރިއަކަށް އަމާޒުކޮށްގެން ވައްކަން ކުރުމުގެ ތުހުމަތު ކުރެވޭ ސްކީމެއްގެ މައްސަލައިގައި އިމިގްރޭޝަންގެ ވެރިޔާ ހައްޔަރު ކުރުމުންނެވެ. މި މައްސަލަ ދިމާވީ އެމެރިކާގެ ސްޓޭޓް ޑިޕާޓްމަންޓުގެ ރިޕޯޓެއްގައި ކޮރަޕްޝަނާއި ހިއުމަން ޓްރެފިކިންގައި ރަސްމީކޮށް ބައިވެރިވުމާއި ވިޔަފާރިތަކާއި އިމިގްރޭޝަން އޮފިސަރުންގެ މެދުގައި ގުޅުން ހިންގުމުގެ ކަންކަން ފާހަގަކޮށްފައިވާ ދަނޑިވަޅެއްގަ އެވެ.

“ދިވެހިރާއްޖޭގައި ބަންގްލަދޭޝްގެ މަސައްކަތްތެރިންނާ މެދު ކަންކުރާ ޔަޤީނުންވެސް ޤައުމީ ފެންވަރުގައި ލަދުވެތިވާންޖެހޭ ކަމެއް!” އަމީން މިއާގެ މަރާ ގުޅުވައި 'އެކްސް'ގައި ކުރެއްވި ޕޯސްޓެއްގައި، ނިމިދިޔަ ސަރުކާރުގައި އިނގިރޭސިވިލާތަށް ދިވެހިރާއްޖެއިން ކަނޑައަޅާފައި ހުންނެވި ސަފީރުގެ މަޤާމު ފުރުއްވި ޑރ ފަރަހަނާޒް ފައިސަލް ވިދާޅުވިއެވެ. 

ފޭސްބުކް ގްރޫޕް ފީޑުން ދައްކާ ގޮތުގައި ޑރ ފަރަހަނާޒް ފައިސަލް އެވިދާޅުވަނީ ތެދުފުޅެކެވެ. ފެބްރުއަރީ 17 ގައި އެގްރޫޕްގައި ކޮށްފައިވާ ޕޯސްޓެއްގައި ބުނަނީ އިންޑިޔާ ރެސްޓޯރެންޓަކުން ބަންގްލަދޭޝްގެ ބިދޭސީއެއްގެ ހަށިގަނޑު ފެނިފައިވާކަމަށެވެ. އޭގެ ފަހުން ބަންގްލަދޭޝްގެ އޮންލައިން ނޫހަކުން ބުނެފައި ވަނީ އެ ރެސްޓޯރެންޓުގެ ގުދަނުން ޢުމުރުން 32 އަހަރުގެ ބަންގްލަދޭޝް މީހެއް ދަންޖެހިފައި ހުއްޓާ ފެނުނު ކަމަށެވެ.

ކަނޑައެޅިފައިވާ އޮކިއުޕޭޝަނަލް ސޭފްޓީ އެންޑް ހެލްތު އޮފިސަރަކާއި ކޮމިޓީއެއް ބެހެއްޓުމަށް 2024 ވަނަ އަހަރުގެ ޤާނޫނުން ވަޒީފާ ދޭ ފަރާތަށް ލާޒިމު ކުރިނަމަވެސް، ގިނަ ކުންފުނިތަކުން މި ޤާނޫނީ ވާޖިބު އަދާނުކުރާ ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ބ ކެންދޫ ދާއިރާގެ މެމްބަރު މަޢުރޫފް ޒާކިރު މޯލްޑިވްސް އިންޑިޕެންޑެންޓުގައި ވިދާޅުވިއެވެ.

"ޤާނޫނަށް ޢަމަލު ނުކުރާ ކަން މުވައްޒަފުން ރިޕޯޓު ކުރަން ވާނެ. އެކަމަކު މުވައްޒަފުން ތިބީ ވަޒީފާ ގެއްލިދާނެ ކަމުގެ ބިރުގައި. އަދި ބިދޭސީ މަސައްކަތްތެރިންނާ ބެހޭ ގޮތުން ވާހަކަ ދައްކާއިރު އެމީހުން ތިބީ މާ ނާޒުކު ޙާލަތެއްގައި. އެހެންވީމަ ބިރުން މިކަމާމެދު ޝަކުވާއެއް ނުކުރޭ،" މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) ގެވެސް ރައީސްގެ މަޤާމުގައި ހުންނެވި މަޢުރޫފް ވިދާޅުވިއެވެ.

“ޝަކުވާއެއް ނުކުރާނަމަ އެމީހުންގެ ޙާލަތު އެއްވެސް މީހަކަށް ނޭނގޭނެ… ދެން ފެންނަނީ ހިތާމަވެރި އެކްސިޑެންޓެއް ހިނގާތަން. އެކްސިޑެންޓެއް ހިނގައިފިއްޔާ ދިވެހިރާއްޖޭގައި ވާގޮތަކީ ދުވަސްކޮޅަކު އެވާހަކަ ދައްކާފައި ދެން އަނެއްކާވެސް ހިނދިދާނެ.” އޭނާ އިތުރަށް ފާހަގަކުރެއްވިއެވެ. 

އެ ޤާނޫނުގައި މަސައްކަތު ތަންތަނުގެ ހެލްތު އެންޑް ސޭފްޓީ ކައުންސިލް މެދުވެރިކޮށް މަސައްކަތު ތަންތަން ބަލައި ރައްކާތެރިކަން ކަށަވަރު ކުރުމުގެ ޒިންމާ ސަރުކާރާ މަތިކޮށްފައި ވެއެވެ. ގައިޑްލައިންތަކާއި ޕްރޮޓޮކޯލްތަކާ އެކު ކައުންސިލް އުފެއްދުމަށް މެންޑޭޓް ކޮށްފައިވަނީ ޤާނޫނު ތަސްދީޤް ކުރާތާ ހަ މަސް ދުވަހުގެ ތެރޭގައެވެ.

އަދި 75 އަށް ވުރެ ގިނަ މުވައްޒަފުން ތިބި ތަނެއްގައި ނަމަ، ވަޒީފާދޭ ފަރާތްތަކުން ހެލްތު އެންޑް ސޭފްޓީއަށް ޚާއްސަ އޮފިސަރުން ޢައްޔަންކުރުމާއި ސޭފްޓީ ކޮމިޓީ އެކުލަވައި، ޤަވާޢިދުން ބައްދަލުވުން ބާއްވައި، ސަލާމަތާއި ރައްކާތެރިކަމާބެހޭ ނިންމުންތަކާއި ލިޔެކިޔުންތައް ފުރިހަމަކޮށް، ތަންފީޒުކުރުމާއި އެކްސިޑެންޓްތައް ސަރުކާރުގެ ކައުންސިލްގެ ޑިރެކްޓަރު ޖެނެރަލަށް ރިޕޯޓްކުރަން ވެސް 2024 ވަނަ އަހަރު ފާސްކުރި މިޤާނޫނުގައި ވެއެވެ.

ޤާނޫނުގެ ދަށުން އެކުލަވަންޖެހޭ ގައިޑްލައިންތައް ހަދަމުންދާ ދާއިރު، އެމިންގަނޑުތަކާއި އުޞޫލުތައް ތަންފީޒުކުރެވޭނެ ގޮތެއް ނެތް ކަމަށް މަޢުރޫފް ވިދާޅުވިއެވެ. އެކަށީގެންވާ އިންސްޕެކްޝަންތަކެއް ނުހިނގާ ޙާލަތުގައި މަސައްކަތުގެ ރައްކާތެރިކަމަށް ވަކާލާތު ކުރުމަކީ ޓްރޭޑް ޔޫނިއަންތަކުގެ ދައުރެއް ކަމަށްވެސް ކެންދޫ ދާއިރާގެ މެންބަރު ވިދާޅުވިއެވެ. 

ނަމަވެސް ބިދޭސީ މަސައްކަތްތެރިންނަށް ޚާއްޞަ މަދަނީ ޖަމްޢިއްޔާއެއް ނުވަތަ ޓްރޭޑް ޔޫނިއަނެއް ފަދަ ޝަޚްޞެއް ނެތްކަމުގެ ކަންބޮޑުވުން މަޢުރޫފް ފާހަގަކުރެއްވިއެވެ.