ޚަމަނާއީގެ ޤަތުލު ކުށްވެރި ނުކުރެއްވުމާއި، ޢަރަބި ޤައުމުތަކަށް ތާޢީދު ހާމަކުރެއްވުމާއި އިތުރު ގިނަ ވާހަކަ

އީރާނުގެ ރޫޙާނީ ލީޑަރު އަވަހާރަކޮށްލުން ކުށްވެރި ނުކުރާކަމާއި، ތަޢުޒިޔާގެ މެސެޖެއް ނުފޮނުވާކަން 304 ދުވަހަށްފަހު ރައީސް މުޢިއްޒު ބޭއްވި ނޫސްވެރިންގެ ބައްދަލުވުމުގައި، ނޫސްވެރިން ތަކުރާރުކޮށް ފާހަގަކުރިއެވެ. މިއާއެކު އެސުވާލުތަކަށް ރައީސް މުޢިއްޒު ސީދާ ޖަވާބެއް ނުދެއްވައެވެ. އޭގެ ބަދަލުގައި ޝީޢީންގެ ވެރިކަމެއް ހިނގާ އީރާނުން ބަދަލު ހިފުމުގެ ޙަމަލާތައް ރައްދުކުރަމުންދާ ސުންނީ ޖަމާޢަތުގެ ޢަރަބި ރަސްކަންތަކާ ރައީސް މުޢިއްޒު އެއްބައިވަންތަކަން ފައުޅު ކުރެއްވިއެވެ.

ޢަރަބި އިސްލާމީ ޤައުމުތަކާ އެކު މަސައްކަތް ކުރަމުން މިދަނީ އެއް ރޫޙެއްގައި ކަމަށާއި، ދިވެހިރާއްޖެއިންވެސް ޢަމަލު ކުރަމުންދާނީ ޢަރަބި އިސްލާމީ ޤައުމުތައް ފަދައިން އަޚްވަންތަކަމާއެކު ގައި ކަމަށް ރައީސް މުޢިއްޒު ވިދާޅުވިއެވެ.

މުސްލިމް ޤައުމެއްގެ ވެރިޔަކު އަވަހާރަވުމުން ތަޢުޒިޔާ ދެންނެވުމާއި، ހިތާމަ ފައުޅުކުރުމުގެ ޕްރޮޓޮކޯލްތައް ކަނޑައަޅާފައިވާ ގޮތުން ދިވެހި ޤައުމީ ދިދަ ބައި ދަނޑިއަށް ތިރި ނުކުރީ ކީއްވެތޯ ސުވާލު ދެންނެވުމުން ރައީސް މުޢިއްޒު ވިދާޅުވީ "އެކަމާ މެދު ގޮތެއް ނިންމާނީ އަޅުގަނޑުމެންގެ މެދުގައި މަޝްވަރާ ކުރުމަށް ފަހު" ކަމަށެވެ.

އާޔަތުﷲ ޚާމަނާއީ އަވަހާރަކޮށްލި މައްސަލަ ސާފު ބަހުން ކުށްވެރި ކުރުމުގެ ހިތްވަރު އެބަހުރިތޯ ނޫސްވެރިއަކު ސުވާލު ދެންނެވުމުން ރައީސް މުޢިއްޒު ވިދާޅުވީ އެފަދަ ހިތްވަރުފުޅު ހުރި ކަމަށާއި، ތަޢުޒިޔާގެ މެސެޖެއް ނުފޮނުވާނެ ކަމަށް ވިދާޅުނުވާ ކަމަށާއި، ދަންނަވާފައިވާނީ މަސައްކަތްކުރައްވާނީ ޢަރަބި އިސްލާމީ ޤައުމުތަކާ އެކުގައި ކަމަށާއި، ޢަރަބި އިސްލާމީ ޤައުމުތައް މަސައްކަތް ކުރަނީ އެއް ބްލޮކެއްގެ ގޮތުގައި، އެއް ޔުނިޓެއްގެ ގޮތުގައި ކަމަށާއި، އެ އެއްބައިވަންތަކަން ދަމަހައްޓަވާނެ ވާހަކަފުޅު ކަމަށެވެ.

މީގެއިތުރުން، ރައީސް މުޢިއްޒު ވިދާޅުވީ އާދީއްތަ ދުވަހުގެ ރޭ އެކުވެރި ޢަރަބި ޢިމާރާތު (ޔޫއޭއީ)ގެ ރައީސްއާ ފޯނުން ވާހަކަފުޅު ދައްކަވާ ދިވެހިރާއްޖޭގެ ތާޢީދު ހާމަކުރައްވާފައިވާނެ ކަމަށާއި، ސައުދީ ވަލީއަޙްދު މުޙައްމަދު ބިން ސަލްމާން އާއި ޤަޠަރުގެ ޢަމީރުގެ އިތުރުން ބަޙްރެއިން އާއި އޮމާންގެ ލީޑަރުންނާ ވެސް ފޯނު ކޯލްތައް ތާވަލުކުރައްވާފައިވާ ކަމަށެވެ.

އާޔަތުﷲ ޚާމަނާއީ އަވަހާރަކޮށްލި މައްސަލަ ކުށްވެރި ކުރަން ދެކޮޅު ހެދުމާ ގުޅޭ ގޮތުން ނޫސްވެރިންނާ އެކު ހިނގި ހިސާބަކަށް ހޫނު މުޢާމަލާތުގައި ރައީސް މުޢިއްޒު އިތުރަށް ވިދާޅުވީ އެމެރިކާ، އީރާން އަދި އިސްރާއީލު - މި ތިން ޤައުމުން ވެސް ދޭ ހަމަލާތަކާ ދެކޮޅު ހެދުމުގައި ސަރުކާރުގެ ސްޓޭންޑް "ވަރަށް ސާފު" ކަމަށެވެ.

"ހުރިހާ ފަރާތަކުން ދޭ ޙަމަލާތައް ކުށްވެރިކުރަން" ކަމަށާއި ހަނގުރާމަވެރި ޢަމަލުތަކުން ދުރުވެ، މަސްރަޙު ފިނިކުރާން ހުރިހާ ފަރާތަކުންވެސް މަސައްކަތްކުރާން ފޮރިން މިނިސްޓްރީ އިން ހޮނިހިރު ދުވަހު ނެރުނު ބަޔާނެއްގައި ގޮވައިލާފައި ވެއެވެ. އަދި "ޞުލްޙައާއި ހަމަޖެހުން އަލުން ޤާއިމްކުރާން ބައިނަލްއަޤްވާމީ ޤާނޫނާއި އދ ގެ ޗާޓަރާ އެއްގޮތަށް ޢަމަލު ކުރާން ހުރިހާ ފަރާތްތަކެއްގެ މައްޗަށްވެސް ގޮވައިލާ،" ކަމަށް ދިވެހި ޚާރިޖިއްޔާގެ ބަޔާނުގައި ވެއެވެ.

ރައީސުލްޖުމްހޫރިއްޔާ ނޫސްވެރިންގެ ބައްދަލުވުމުގައި މައިގަނޑުގޮތެއްގައި މެދުއިރުމަތީގެ ހޫނުވަމުންދާ މަޝްރަހުގެ ވާހަކަ ސިފަކުރައްވާފައިވަނީ ހަނގުރާމައަކީ ޖުމުލަގޮތެއްގައި ވޭނާއި ކެކުޅުމާއި ހިތާމަހުރި މުޞީބާތެއް ކަމުގައެވެ. އަދި އެމެރިކާއާއި އިސްރާއީލުން ބައިނަލްއަޤްވާމީ ޤާނޫނުތަކާއި ޚިލާފަށް ޤައުމުތަކަށް ޙަމަލާދީގެން ނުވާނެކަމަށް ވިދާޅުވިއެވެ. އަދި އިސްރާއީލުގެ ޕާސްޕޯޓުގައި ދިވެހިރާއްޖެއަށް އެތެރެނުވެވޭނެ ގޮތް ހައްދަވާފައިވާ ކަމާއި، އިސްރާއީލަކީ ފަލަސްޠީނު ސުންނާފަތި ކުރަމުން އަންނަ "ޓެރަރިސްޓް ޤައުމެއް" ކަމަށްވެސް ރައީސް މުޢިއް  ޒު ސިފަކުރެއްވިއެވެ.

ކުރީގެ ރައީސް ޢަބްދުﷲ ޔާމީންގެ ވެރިކަމުގައި ދިވެހިރާއްޖެ އިން ވަނީ ސަޢުދީ ޢަރަބިއްޔާ އިސްވެ އޮވެ، އީރާނާއި ޤަޠަރާ ދެކޮޅަށް އެޅި ފިޔަވަޅުތަކުގެ ދަށުން، އެދެޤައުމާއެކު އޮތް ޑިޕްލޮމެޓިކް ގުޅުން ކަނޑާލާފައެވެ. ފަހުން އަލުން ގުޅުން ޤާއިމު ކުރީއެވެ.

އީރާނުގެ ރޫޙާނީ ލީޑަރު އަވަހާރަކޮށްލިކަން ސީދާ ނަމުން ފާހަގަނުކޮށް، އަދި ތަޢުޒިޔާގެ މެސެޖެއްވެސް ފައުޅުނުކޮށް، ހިފަހައްޓާފައި، ހަނގުރާމަ ހުއްޓައިލުމަށާއި، ޞުލްޙަޔަށް ގޮވައިލާ ގަލްފުގެ ޤައުމުތަކުންވަނީ ބަޔާން ނެރެފައެވެ. ދިވެހިރާއްޖެއިންވެސް އިޤްތިދާ ވެފައި އެވަނީ މިގޮތާއެވެ.

ދިވެހިރާއްޖެއަކީ ތާރީޚީ ގޮތުންވެސް ގަލްފުގެ ޢަރަބި އިސްލާމީ ޤައުމުތަކާ ގާތް ގުޅުންތަކެއް ބާއްވައި، ތަރައްޤީގެ ބޮޑެތި އެހީތެރިކަމާއި މަދަދު ލިބިފައިވާ ސައްތައިން ސައްތަ ސުންނީ އިސްލާމް ޤައުމެކެވެ.

އެހެންނަމަވެސް، ދިވެހި ސަރުކާރުގެ ސްޓޭންޑާ ޚިލާފަށް، ޢާންމުންގެ ޝުޢޫރު ހުރީ ބޮޑަށް އީރާނާ އެއްކޮޅަށް ކަމުގައި ވެއެވެ. ސޯޝަލް މީޑިއާގައި ގިނަ ދިވެހިން ދަނީ މުސްލިމް ޤައުމެއްގެ ގޮތުގައި އީރާނަށް ޙަމްދަރުދީ ފާޅުކޮށް، ސަޢުދީ ޢަރަބިއްޔާ އާއި ޔޫއޭއީ އަށް ފާޑުކިޔަމުންނެވެ. އަދި އިސްރާއީލުން ފަލަސްޠީނުގެ ރައްޔިތުންނާ ދެކޮޅަށް، ޚާއްޞަކޮށް ޣައްޒާގައި ހިންގަމުންދާ ޢުދުވާނީ އަނިޔާވެރި ޙަމަލާތަކުގެ ކުރިމަތީގައި ގަލްފުގެ އިސްލާމީ ޢަރަބި ޤައުމުތަކުން އެމެރިކާއާއި އިސްރާއީލާ އެއްބައިވެފައިވާ ކަމުގެ ތުހުމަތު އުފުލައި، އީރާނުން މެނުވީ ފަލަސްޠީނުގެ ޙައްޤުގައި އެކަށޭނަ އަޑެއް ނުއުފުލާކަމަށް ބުނަމުންނެވެ.

ހޯމަ ދުވަހުގެ ރޭ ކުރީގެ ރައީސް މައުމޫން ޢަބްދުލް ޤްއްޔޫމް ވަނީ އާޔަތުﷲ ޚާމަނާއީ އަވަހާރަކޮށްލި މައްސަލަ ކުށްވެރިކުރައްވައި "އިޚްލާސްތެރި މުސްލިމެއްގެ ޙައިޘިއްޔަތުން އީރާނުގެ އެންމެ މަތީ ލީޑަރު އާޔަތުالله ޢަލީ ޚާމަނާއީ އަނިޔާވެރި ގޮތަކަށް މަރާލި މައްސަލަ ކުށްވެރިކުރަން" ކަމަށް އެކްސް ގައި ޕޯސްޓު ކުރައްވާފައެވެ. ކުރީގެ ރައީސުންގެ ތެރެއިން އެހެން އެއްވެސް ބޭފުޅަކު ޢާންމުކޮށް އެއްޗެއް ވިދާޅުވެފައެއް ނުވެއެވެ.

އޮންލައިންކޮށް ޢާންމުންގެ ފަރާތުން ދިވެހި ސަރުކާރަށް ފާޑުކިޔުން އޮއްސަމުން ދެއެވެ. ޤަޠަރުގެ އަމީރާ ރައީސް މުޢިއްޒު ފޯނުން ގުޅުއްވުމާ ގުޅޭ ގޮތުން 'ޤަޠަރު ޓްރިބިއުން' އިން ކުރި ފޭސްބުކް ޕޯސްޓެއްގައި 140 ކޮމެންޓްގެ ބޮޑު ބަޔަކީ ދިވެހިން "އީރާނާ އެކު ތިބި" ކަމަށް އިޢުލާންކޮށް، ދިވެހިން ކޮށްފައިވާ ކޮމެންޓުތަކެވެ.

ލޯކަލް ނިއުސް ސައިޓްތަކާއި ސޯޝަލް މީޑިޔާ ކޮމެންޓްތަކުގައި ވެސް އީރާނާ އެއްބައިވަންތަކަން ފާޅުކުރުމާއި އެމެރިކާއާއި އިސްރާއީލުގެ ޢަސްކަރީ ކެމްޕޭނުގައި ބައިވެރިވާ ގަލްފުގެ ޢަރަބި އިސްލާމީ ޤައުމުތަކާ މެދު ގިނަ ދިވެހިން ރުޅިވެރިކަން ފާޅުކޮށްފައިވެއެވެ. "މުއިއްޒު އަރަބީންނާއެކު ވިޔަސް ދިވެހިން މިތިބީ އީރާނާއި އެކު. އެމެރިކާގެ ސިފައިން އަރަބި ގައުމުތަކުގައި ބައިތިއްބައިގެން ތިބި އެގައުމުތަކަކީ އެމެރިކާގެ ވާގިވެރިން." 'މިހާރު' ނޫހުގައި ކޮމެންޓު ކޮށްފައި ވެއެވެ. އެންމެ ގިނަ ލައިކް ލިބިފައިވަނީ މި ކޮމެންޓަށެވެ.

އަނެއް ބަޔަކު އީރާނަށް ދިން ހަމަލާތަކަށް ޢަރަބި އިސްލާމީ ޤައުމުތަކުގެ ސަރަޙައްދު ބޭނުން ކުރުމުގެ ހުއްދަ އެޤައުމުތަކުން ދޭ ސަބަބާ މެދު ސުވާލު އުފައްދައި، އެމެރިކާގެ ޢަސްކަރީ މަރުކަޒުތައް ޤާއިމުކޮށްފައިވާ ދައުލަތްތަކަށް ދިވެހިރާއްޖެއިން ތާޢީދުކުރަމުން، ފަލަސްޠީނާ އެކު ދިވެހިރާއްޖެ ވާކަމަށް ދަޢުވާ ކުރެވޭނީ ކިހިނެއްތޯ ސުވާލު އުފައްދާފައި ވެއެވެ. 'އަދަދު' ގައި ކޮމެންޓުކުރި ފަރާތަކުން ލިޔެފައިވަނީ "މުއިއްޒުގެ ވާހަކައިން ހީވަނީ ދިވެހިރާއްޖެއަކީވެސް އަރަބި ޤައުމެއް ހެން..": ކަމަށާއި "އަރަބި އިސްލާމީ ގައުމުތައް އެއް ބްލޮކެއްގެ ގޮތުގައި މަސައްކަތް ކުރަމުން ދިޔަސް ދިވަހިރާއްޖެ އަރަބި ގައުމަކަށް ވާނެތޯ.." އެވެ.

އަނެއް ބައެއް ފަރާތްތަކުން ރައީސް މުޢިއްޒުގެ ރާގާއި ބަސްމަގަށް ތަޢުރީފުކޮށް، ދިފާޢު ކޮށްފައެވެ. އެގޮތުން ދިވެހިރާއްޖެ ވަކި ފަރާތަކަށް ޖެހި، ވަކި ބަޔަކު ކުށްވެރިކުރުމަކީ ކުރެވޭން އޮތް ކަމެއް ނޫންކަމަށާއި، ޚާރިޖީ ސިޔާސަތަކީ ޖަޒުބާތަށް ވުރެ ޤައުމީ މަޞްލަޙަތަށް އިސްކުރާންޖެހޭ ދާއިރާއެއްކަމަށް ބުނެފައި ވެއެވެ.

ރައީސް މުޢިއްޒާ ނޫސްވެރިންނާ ދެމެދު ހިސާބަކަށް ހޫނު މުޢާމަލާތްތަކެއް ހިނގީ ހަނގުރާމައިގެ ސަބަބުން ދިމާވެދާނެ އިޤްތިޞާދީ ގެއްލުމާއި ހީނަރުކަމުގެ މަޢުޟޫއުގައެވެ. ހޮނިހިރު ދުވަހުން ފެށިގެން މެދުއިރުމަތީގެ އެއާޕޯޓްތަކުން ދަތުރުތައް ކެންސަލްވުމުން، ދިވެހިރާއްޖެއަށް ގަލްފުގެ އެއާޕޯޓުތަކުން ޓްރާންސިޓް ކުރާ ފަތުރުވެރިންނަށް ހުރަސްއެޅިފައިވެއެވެ. ދިވެހިރާއްޖެ އަންނަ ފަތުރުވެރިންގެ 30 އާއި 35 އިންސައްޓަ ދަތުރުކުރަނީ ގަލްފުގެ ޢަރަބި އިސްލާމީ ޤައުމުތަކުގެ އެއާޕޯޓުތައް މެދުވެރިވެއެވެ.

ހޯމަ ދުވަހު ދުނިޔޭގެ ބާޒާރުތައް ހުޅުވުމުން ތެޔޮ ފީފާއެއްގެ އަގު 82 އެމެރިކާ ޑޮލަރަށް ވުރެ މައްޗަށް އެރިއެވެ. މި ކޯޅުން ދިގުދެމިގެންދާނަމަ 90 އެމެރިކާ ޑޮލަރު ނުވަތަ އެއަށްވުރެ ބޮޑުވެދާނެކަމަށް ދިރާސާކުރާ ފަރާތްތަކުން ބުނެއެވެ. ޔޫރަޕްގައި ގޭހުގެ އަގު 45 އިންސައްތައާ ހަމައަށް މައްޗަށް ގޮސްފައި ވަނީ އީރާނުގެ ޑްރޯން ޙަމަލާއެއް ޤަތަރުގެ 'ގަތަރުއެނާޖީ' ކުންފުނީގެ 'ރާސް ލަފާން' ޕްލާންޓަށް ރައްދުވެ، ގޭސް އުފެއްދުން ވަގުތީގޮތުން ހުއްޓައިލުމުންނެވެ.

ރައީސް މުޢިއްޒު ވިދާޅުވީ ހޮނިހިރު ދުވަހު އެކުލައްވާފައިވާ ނުވަ މެންބަރުންގެ ވަޒީރުންގެ ކޮމިޓީއިން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅުތައް ބަލައި، ތައްޔާރުވެ، އަޅަމުންދާ ކަމަށާއި، އެ ކޮމިޓީއިން ފަތުރުވެރިކަން، ކާބޯތަކެތި އަދި ތެލުގެ ކަންކަން ޚާއްޞަކޮށް ގާތުން ބަލަމުން ގެންދާނެ ކަމަށެވެ. ފެބްރުއަރީ 28 ވަނަ ދުވަހު އޮމާނުން ފިއުލް ޝިޕްމަންޓެއް ދިވެހިރާއްޖެއަށް މިސްރާބު ޖަހާފައިވާ ކަމަށާއި އެހެން ޝިޕްމަންޓެއް ކަށަވަރުކުރުމުގެ މަސައްކަތް ފަށާފައިވާ ކަމަށް ރައީސް މުޢިއްޒު މަޢުލޫމާތު ދެއްވިއެވެ.

ފަތުރުވެރިކަމާ ބެހޭ ގޮތުން ރައީސް މުޢިއްޒު ވިދާޅުވީ ގަލްފު ޤައުމުތަކުގައި ޓްރާންސިޓް ނުކުރާ ފްލައިޓްތައް އިތުރު ކުރުމަށް ސަރުކާރުން މަސައްކަތް ކުރަމުންދާ ކަމަށާއި އެއީ އޭޝިއާގެ މާކެޓްތަކާއި ސީދާ ޔޫރަޕާއި ރަޝިޔާއިން ފަތުރުވެރިންނަށް ދިވެހިރާއްޖެ ދަތުރުކުރެވޭނެ މަގުތައް ހަމަޖެއްސުމުގެ އަމާޒުގައި ހިންގާ މަސައްކަތް ތަކެއް ކަމަށެވެ. އަދި މެދުއިރުމަތީގެ ޙާލަތު ހަލުވިކަމާއެކު ބަދަލުވަމުން އަންނަ ކަމަށާއި، ކަންތައް އިތުރަށް ދަތިވެ، އުދަނގޫވަމުން އަންނަ ކަން ފާހަގަކުރެއްވިއެވެ.

މީގެއިތުރުން، ރައީސް ވިދާޅުވީ ދިވެހިރާއްޖޭގެ އިޤްތިޞާދު އޮތީ "ވަރަށް ދުޅަހެޔޮ ޙާލަތެއްގައި" ކަމަށާއި "ހާސްވެ. ކަންބޮޑުވާން ޖެހޭ ސަބަބެއް އަދި ނެތް" ކަމަށެވެ. އެކަމަކު "އެންމެ ގޯސް ޙާލަތަށް ވެސް އަޅުގަނޑުމެން ތައްޔާރުވަމުން މިދަނީ" ރައީސް މުޢިއްޒު ވިދާޅުވިއެވެ.

މި ނޫސްވެރިންގެ ބައްދަލުވުމަކީ ނިމިދިޔަ މަހު މިއަހަރަށް ރައްޔިތުންގެ މަޖިލިސް ހުޅުވުމުގެ ރަސްމިއްޔާތުގައި ރައީސް މުޢިއްޒު އިއްވެވި ރިޔާސީ ބަޔާނުގައި، ކޮންމެ ހަފްތާއަކު އެއްގަޑިއިރުގެ ނޫސްވެރިންގެ ބައްދަލުވުމެއް ބާއްވަވާނެކަމަށް ކުރެއްވި އިޢުލާނާ ގުޅިގެން ބޭއްވެވި ފުރަތަމަ ނޫސްވެރިންގެ ބައްދަލުވުމެވެ.  ލޯކަލް ކައުންސިލް އިންތިޚާބާ ދިމާކޮށް ރިޝްވަތު ބައްސަވާކަމުގެ ތުހުމަތުތަކުން ފެށިގެން ޗާގޯސްގެ އިސްތިޤްލާލީ ކޮންޓްރޯލްގެ މައްސަލައިގައި މޮރިޝަސްއާ އެކު ކޯޅޭ ޑިޕްލޮމެޓިކް ކަންތައްގަނޑާއި، މިސަރުކާރުގެ ޓްރެކް ރެކޯޑާ ގުޅޭގޮތުން ގިނަ ސުވާލުތަކަކަށް ޖަވާބު ދެއްވައި، ރައީސް މުޢިއްޒު މި ނޫސްވެރިންގެ ބައްދަލުވުމުގައި ވާހަކަފުޅު ދެއްކެވިއެވެ.

މޮރިޝަސްއިން ދިވެހިރާއްޖެއާ އޮތް ޑިޕްލޮމެޓިކް ގުޅުން ސަސްޕެންޑު ކުރީ “ޗަގޯސް އާކިޕެލަގޯގެ މައްޗަށް މޮރިޝަސްގެ އިސްތިޤްލާލީ ބާރު ޤަބޫލު ނުކުރުމާއި،" "މޮރިޝަސް އާއި އިނގިރޭސިވިލާތާ ދެމެދު ވެވުނު އެއްބަސްވުމާ ދެކޮޅަށް، އެމައްޗަށް އިޢުތިރާޟު ކުރާ ކަމަށް،" ދިވެހި ސަރުކާރުން ނިންމާފައި ވާތީއެވެ.

ރައީސް މުޢިއްޒު ވަނީ މޮރިޝަސް ސަރުކާރުގެ ނިންމުމަކީ "ވަރަށް ތާކުންތާކު ނުޖެހޭ ވަރަށް އިމެޗުއާރ، ނައީވް ކަމެއް،" ކަމަށާއި، "މޮރިޝަސްއަށް ޙައްޤު ނޫން ތަނެއް މޮރިޝަސްއަށް ޙައްޤެއް ނުވާނެ،" ކަމަށް ވިދާޅުވެފައެވެ.

"އެއްވެސް ގައުމަކަށް ޗާގޯސް ޙަވާލު ކުރާ ކަމަށް ވަންޏާ ހަވާލު ކުރަންޖެހޭނީ އެތަނުގެ ޙައްޤުވެރި ފަރާތް [ކަމަށްވާ] ދިވެހިރާއްޖެއާ. އެހެންވީމާ އެ ފެކްޓު ބަދަލެއް ނުވާނެ ޤައުމަކުން މި ޤައުމާ ގުޅުން ކަނޑާލިކަމުގައި ވިޔަސް." ރައީސް މުޢިއްޒު ހަރުކޮށް ވިދާޅުވިއެވެ. އަދި ދިވެހިރާއްޖެ ދާނީ "މޯލްޑިވްސް ފަސްޓް" ސިޔާސަތުގައި ކުރިއަށް ކަމަށްވެސް ވިދާޅުވި މެއެވެ.

އެ ޖަޒީރާ އިނގިރޭސިންގެ ކޮންޓްރޯލްގެ ދަށުގައި އޮންނަނަމަ އެއީ އަދި އެހެން "ވަކި މައްސަލައެއް" ކަމަށާއި، އިނގިރޭސިވިލާތުން ޗާގޯސްގެ އިސްތިޤްލާލީ ބާރު އެހެން ޤައުމަކާ ޙަވާލުކުރާނެ ނަމަ، ހަމައެކަނި ޙައްޤުވެރިއަކީ ދިވެހިރާއްޖެ ކަމަށެވެ. އަދި މިމައްސަލައިގައި ދިވެހި ސަރުކާރުން ޤާނޫނީ ފިޔަވަޅު އެޅުމަށް ވިސްނަމުންދާ ނަމަވެސް އިނގިރޭސި ސަރުކާރާ ގުޅުން ބަދަހި ކުރަމުންދާނެ ކަމަށްވެސް ރައީސް މުޢިއްޒު ވިދާޅުވިއެވެ.

ހޮނިހިރު ދުވަހު ވެލާނާ އިންޓަނޭޝަނަލް އެއާޕޯޓުގައި އެމެރިކާގެ އެއާފޯސް މަތިންދާބޯޓެއް ޖައްސާފައި އޮތް ފޮޓޯއެއް ސޯޝަލް މީޑިއާގައި ޢާންމުވެފައި ވެއެވެ. މިކަމާ ގުޅޭގޮތުން ސުވާލު ދެންނެވުމުން ރައީސް މުޢިއްޒު ވިދާޅުވީ އެ މަތިންދާބޯޓު ޖެއްސީ ޖެނުއަރީ 17 ވަނަ ދުވަހު ދިން ހުއްދައެއްގެ ދަށުން ކަމަށާއި، އެއީ އެއްގޮތަކަށް ވެސް ހަނގުރާމަޔާ ގުޅުންހުރި ކަމެއް ނޫންކަމަށާއި، އެއީ މަދަނީ މަތިންދާ ބޯޓެއް ކަމަށެވެ.

ރައީސް މުޢިއްޒު ވިދާޅުވީ ސިޔާސީ ގޮތުން ޢައްޔަން ކުރައްވާފައިވާ މީހުންގެ ޢަދަދު މިހާރުވާނީ ހާމަކުރައްވާފައި ކަމަށާއި، "އަދި އޭގެ ފަހުން އެއްވެސް ބަދަލެއް އައިސްފިނަމަ ކުރިއަށް އޮތްތަނުގައި ވެސް އެ ބަދަލުތައް ޙިއްޞާކުރާނަން" ކަމަށެވެ.

މިސުވާލު ކުރިމަތިކުރުވީ ސިޔާސީ ޢައްޔަނީންގެ ޢަދަދާއި، މުސާރަ ހާމަކުރާން ފައިނޭންސް މިނިސްޓްރީ އިން ދެކޮޅު ހަދާފައިވާ ކަމާމެދު 'އަދަދު' ނޫހުގެ ނޫސްވެރިއެކެވެ.

ރައީސް މުޢިއްޒު ވަނީ ސިނަމާލެ އާއި މާލޭ ހިޔާ ފްލެޓްތަކުގެ ވެރިންނަށް، ގޭބިސީއަކަށް 100،000 (6،486 އެމެރިކާ ޑޮލަރު) ރުފިޔާ ދެއްވާނެކަމަށް ވަޢުދުވެވަޑައިގެންފައެވެ. ލޯކަލް ކައުންސިލް އިންތިޚާބަށް ހަތް ހަފްތާ ވެފައި ވަނިކޮށް ސަރުކާރު ހިންގާ ޕާޓީގެ ފަރާތުން މާލޭ މޭޔަރު ކަމަށް ވާދަކުރައްވާ ކެންޑިޑޭޓުގެ އިވެންޓެއްގައި އެކުރެއްވި 100،000 ރުފިޔާގެ އިޢުލާނަކީ ރިޝްވަތު ނޫންކަމަށް އެމަނިކުފާނު ވިދާޅުވިއެވެ. ހަ ޢިމާރާތުގެ 161 އެޕާޓްމަންޓުގެ ވެރިންނަށް މިމަގުން 100،000 ދޭނަމަ 16.1 މިލިއަން ރުފިޔާ ޚަރަދުވާނެ ކަމަށް ލަފާކުރެވެއެވެ.

ތަފްޞީލުގައި ރައީސް މުޢިއްޒު ވިދާޅުވީ މިއީ ރިޔާސީ މެނިފެސްޓޯގައި ވެސް ހިމެނޭ ކެމްޕެއިން ވަޢުދެއް ކަމަށާއި، 1990 ގެ އަހަރުތަކުގައި ޢިމާރާތްކުރި އެ ފްލެޓްތައް ބޮލަށް ވެއްޓޭ ހިސާބަށް މަރާމާތުގެ ކަންތައް ބޮއްސުންލާފައި ވާކަމަށާއި، މިއީ ސިޓީ ކައުންސިލުން ވެފައިވާ އިހުމާލެއް ކަމަށާއި، ފެން ލީކުވުން ޢާންމުވެފައިވާ އިރު، ޝީޓްތަކުގައި ރެނދުލައި، ތަނބުތަކުގައި ލާފައިވާ ރެނދުތައް އިންޗިއެއްހާ ފުޅާވެފައި ވާކަމަށެވެ.

ވަޢުދުވެ ވަޑައިގެންނެވި ގޮތަށް އާ ޢިމާރާތަކަށް ބަދަލުކުރެވޭންދެން، އެތަނުގެ އަހުލުވެރިންނަށް މާލީ އެހީތެރިކަން ބޭނުންވާނެ ކަމަށް ރައީސް ވިދާޅުވިއެވެ.

މިއާއެކު، ސިނަމާލެ އަދި މާލެހިޔާ ފްލެޓްތަކުގެ މައްސަލަ ކެބިނެޓުން ޖެނުއަރީ މަހުގެ ފަސް ވަނަ ދުވަހު ނިންމާފައިވާ ކަމަށާއި، ސޯޝަލް ހައުސިން ޔުނިޓްތަކުގެ ކުލި ލަސްވުމުން ކުރާ ހުރިހާ ޖޫރިމަނާއެއް މަޢާފު ކުރުމަކީ ރިޔާސީ ވަޢުދެއް ކަމަށާއި، އެކަން 2024 ގައި ކައުންސިލުތަކަށް އަންގާފައިވާނެ ކަމަށެވެ. އަދި މިކެމްޕޭނުގައި އެމަނިކުފާނު ދެއްކި ވާހަކައަކީ ޑިސެމްބަރު 16 ވަނަ ދުވަހު ގަލޮޅު ޓައުން ހޯލް ބައްދަލުވުމުގައި ސިނަމާލެ އަދި މާލެހިޔާ މައްސަލަ ފާހަގަކޮށް ރައްޔިތުން ކުރި ޝަކުވާއާ ގުޅިގެން އަޅާފައިވާ ފިޔަވަޅުތަކުގެ އަޕްޑޭޓެއް (އަދާއިހަމައެއް) ކަމަށެވެ.

މާޗް 2023 ގައި އެންޓި ކޮރަޕްޝަން ކޮމިޝަނުން ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ބޮޑު ޚިޔާނާތާ ގުޅޭ 1 މިލިއަން އެމެރިކާ ޑޮލަރު ހޯދުމަށް ކުރީގެ ޑިފެންސް މިނިސްޓަރު މޫސާ ޢަލީ ޖަލީލް – މާލޭގެ މޭޔަރު ކަމަށް ޕީޕަލްސް ނޭޝަނަލް ކޮންގްރެސްގެ ކެންޑިޑޭޓް – ގެ މައްޗަށް ދަޢުވާ ކުރުމަށް އެދިފައެވެ.

ރައީސް މުޢިއްޒު ވިދާޅުވީ މޫސާ ޢަލީ ޖަލީލުގެ އެއްވެސް ކޭހެއް އޮތްތޯ ބަންޑާރަ ނާއިބްގެ އޮފީހުންގެ ޕްރޮސެކިއުޓާރ ޖެނެރަލްގެ އޮފީހުން ސާފުކުރުމުން، އެފަދަ ކޭހެއް ނެތްކަން ސާފުކޮށްދީފައިވާ ކަމަށެވެ. ޖިނާޢީ ރެކޯޑް އޮތް މީހަކު ނުވަތަ ކުށް ޘާބިތުވެފައިވާ މީހެއް ކެންޑިޑޭޓަކަށް  ވުން ކަމަށާއި، އެފަދަ ކަމެއް ނެތީވިއްޔާ މައްސަލައެއް އޮންނާން ނުޖެހޭނެ ކަމަށާއި، މިސަރުކާރުން މިނިވަން މުއައްސަސާތަކަށް ނުފޫޒު ނުފޯރުވާނެ ކަމަށްވެސް އެމަނިކުފާނު ވިދާޅުވިއެވެ.

ކުރީގެ ވެރިކަމުގައި އިންޑިޔާ އާއެކު ޤާއިމުކޮށްފައިވާ ޢަސްކަރީ އެއްބަސްވުންތަކުގައި ޤައުމީ ސަލާމަތަށް ނުރައްކާވާ އެއްވެސް މާއްދާއެއް ހުރިނަމަ، 2023 ވަނަ އަހަރުގެ ރިޔާސީ ކެމްޕެއިންގައި ވަޢުދުވެވަޑައިގަތް ހަމައިން، ހާމަކުރައްވާނެ ކަމަށް ރައީސް މުޢިއްޒު ވިދާޅުވިއެވެ. މިފަދަ ހުރިހާ މާއްދާތަކެއް މިހާރު އެއެއްބަސްވުންތަކުން އުނިކޮށްފައިވާއިރު، ޤައުމީ ސަލާމަތާ ބެހޭ މަޖިލީހުގައި ކުރެވުނު މަޝްވަރާތަކަށް ފަހު އެމަޢުލޫމާތު ހާމަކުރުން ހިފަހައްޓާފައިވާކަމަށް ވެސް ވިދާޅުވިއެވެ.

އަދި އެވަޢުދު ނުފުއްދެވީ ކަމަށް ނިންމާން ނުވާނެ ކަމަށާއި، ކުރިއަށް އޮތް ތަނުގައިވެސް އެ މާއްދާތަކުގެ ތަފްޞީލު ހާމަނުކުރައްވާނެ ކަމަށް ވިދާޅުވެފައި ނުވާނެކަން ހާމަކުރައްވާ ކޮންމެ ކަމަކަށްވެސް އެކަށޭނަ ވަގުތާއި، ތަންވަޅުގެ މުހިންމުކަން ފާހަގަކުރެއްވިއެވެ.

އެޕްރީލް މަހުގެ 8 ވަނަ ދުވަހު 500 މިލިއަން އެމެރިކާ ޑޮލަރުގެ އިސްލާމިކް ބޮންޑު، ސުކޫކް ދެއްކުމަކީ ދިވެހިރާއްޖެއިން ތާރީޚުގައި އެއް ބުރަކަށް ދައްކާނެ ބޭރުގެ އެންމެ ބޮޑު ދަރަންޏެވެ. މިހާރު އެކަމަށްޓާކައި ސަރުކާރުން 650 މިލިއަން އެމެރިކާ ޑޮލަރު ރައްކާކޮށްފައި ހުންނާނެ ކަމަށް، އިތުބާރާއެކު ރައީސް މުޢިއްޒު ވިދާޅުވިއެވެ. "މިއަދު ދައްކަން ޖެހުނަސް އެފައިސާ ދެއްކޭނެ،" ކަން ހާމަކުރައްވަމުން ރައީސް ފާހަގަކުރެއްވީ ގްރޮސް ރިޒާވް ރެކޯޑް އަދަދަކަށް - 1.27 ބިލިއަން އެމެރިކާ ޑޮލަރަށް – އަރާފައިވާ ކަމަށެވެ.  

އަދި ސަރުކާރުން ބޭންކް އޮފް މޯލްޑިވްސް އިން ލޯނެއް ނަގަން ޕްލޭންކޮށްފައިވާ ކަން އިންކާރު ކުރައްވާ، ރައީސް މުޢިއްޒުވަނީ ދަރަނި ދެއްކުމަށް ރީފައިނޭންސް ކުރުމަށް ލޯނުގެ އޮޕްޝަންތައް މިހާރު ބައްލަވާފައިވާ ކަމަށާއި، މިހާރުގެ ހުށަހެޅުންތަކުގައި ހުރި އިންޓަރެސްޓް ރޭޓު މުރާޖަޢާ ކުރުމުގެ މަސައްކަތް މިހާރު ހިނގަމުންދާ ކަމަށެވެ.

ކުރީގެ ރައީސް ޑރ މުޙައްމަދު ވަޙީދު ޙަސަން މަނިކު ހުންނެވި ރައީސް މުޢިއްޒުގެ ޚާއްޞަ މުޝީރެއްގެ ގޮތުގައެވެ. ރައީސް ވަޙީދު އެމަޤާމުން އިސްތިޢުފާ ދެއްވީ ޖެނުއަރީ 30 ވަނަ ދުވަހުއެވެ. އެމެރިކާގެ ޖަސްޓިސް ޑިޕާޓްމަންޓުން ޢާންމު ކުރި އެޕްސްޓީންގެ ޒާތީ މުޢާމަލާތްތަކާބެހޭ ލިޔެކިޔުންތަކުގައި ރައީސް ވަޙީދާ ދައްކާފައިހުރި ވާހަކަތައް ފެންމަތިވެ، ޢާންމުންގެ ޕްރެޝަރު ބޮޑުވެގެންނެވެ. ލަގްޜަރީ ރިސޯޓް އިންވެސްޓްމަންޓް ޑީލްތައް ހުށަހެޅުމުގެ އިތުރަށް، 2013 ގެ ރިޔާސީ އިންތިޚާބަށް ތައްޔާރުވުމާއި، ކެމްޕޭނު ރޭއްވެވުމާއި، ރައީސް ވަޙީދުގެ އަމިއްލަފުޅު ޙަޔާތުގެ މައްޗަށް ލިޔުއްވާފައިވާ ފޮތަށް ފަންޑިންގް ހޯދުމުގައިވެސް ރައީސް ވަޙީދުވަނީ އެޕްސްޓީންގެ އެހީތެރިކަން ހޯއްދަވާފައެވެ.

މުއިއްޒު ވިދާޅުވީ އެޕްސްޓައިންއާ ގުޅުން ހުރިކަން އެނގިވަޑައިގަތުމާއެކު ރައީސް ވަޙީދު މަޤާމުން އިސްތިޢުފާ ދެއްވުމަށް އެދިވަޑައިގެންނެވި ކަމަށާއި، އިސްތިޢުފާދެއްވީ އެމަނިކުފާނުގެ އެންގެވުމަށް ކަމަށެވެ.

ދެ އިންތިޚާބު އެއްދުވަހަކު ބޭއްވުމުން ވޯޓުލުމުގެ ނިސްބަތް ރަނގަޅުވާނެ ކަމަށް ރައީސް މުޢިއްޒުގެ ވާހަކަފުޅުގައި ވިދާޅުވިއެވެ. އެގޮތީ ރިޔާސީ އިންތިޚާބާ އަޅާ ކިޔާއިރު، ރައްޔިތުންގެ މަޖިލިސް އިންތިޚާބުގައި ވޯޓުލުމުގެ ނިސްބަތް ދަށްވީމައެވެ. އަދި ޚަރަދުވެސް ސަލާމަތްވާނެ ކަމަށް އެމަނިކުފާނު ވިދާޅުވިއެވެ.

އަދި ލޯކަލް ކައުންސިލް އިންތިޚާބާއެކު ދެއިންތިޚާބު އެއްކުރުމާމެދު ނަގާ ފެންނަ ނުފެންނަ ވޯޓު ބޭއްވުމުން ޚަރަދު ކުޑަވާނެކަންވެސް ފާހަގަކުރައްވާ، ރައީސް މުޢިއްޒު އިތުރަށް ވިދާޅުވީ ރޭންކްޑް ޗޮއިސް ވޯޓިންގް ނުވަތަ ޕްރިފެރެންޝަލް ވޯޓިންގް ތަޢާރަފު ކުރުން ހިމެނޭ ގޮތަށް، ޤާނޫނު އަސާސީއަށް ގެންނާންޖެހޭ އެހެން އިޞްލާޙުތައް ވެސް ސަރުކާރުން މުރާޖަޢާ ކުރަމުންގެންދާ ކަމަށެވެ.

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން އެމަނިކުފާނުގެ ވެރިކަމަކީ ޚުދުމުޚްތާރު ވެރިކަމެއްގެ ގޮތުގައި ސިފަކުރާއިރު، އެމްޑީޕީގެ ޕްރައިމަރީތަކަށް ސަރުކާރުގެ ސްކޫލްތައް ބޭނުންކުރަން ފުރުޞަތު ދިނުމާއި، ސިޔާސީ ޤައިދީން ނެތުމަކީ އެވާހަކައިގައި އަޞްލެއް ނެތްކަމުގެ ހެކި ކަމުގައި ރައީސް މުޢިއްޒު ފާހަގަކުރެއްވިއެވެ. އަދި ކާނިވަލް ސަރަޙައްދުގެ އިތުރު ސަރަޙައްދުތައްވެސް މާލޭގައި މުޒާހަރާކުރާން އެކަށައަޅާފައިވާކަމީ އެކަމުގެ ހެއްކެއް ކަމަށް ވިދާޅުވިއެވެ.