އަދަދުގެ އޮފީސް ރެއިޑުކުރުން: ގަޒްފުގެ ތުހުމަތާއެކު ސާމާނުތައް ގެންގޮސްފި

ސީރިއަސް އެންޑް އޯގަނައިޒްޑް ކްރަިމް އިންވެސްޓިގޭޝަން ޑިވިރަންގެ ފުލުސް އޮފިސަރުން އަދަދު ގެ އޮފީހަށް ދިޔައީ ރޭގަނޑު 8 ޖަހާހާ އިރެވެ. ހަތަރު ގަޑިއިރު ވާންދެން ބަލައި ފާސްކުރިއެވެ. ދޫކޮށްފައި ދިޔައީ ނޫސްވެރިންގެ ލެޕްޓޮޕްތައް, ޕެންޑްރައވް އަދި ސްޓޯރޭޖް ޑިވައިސްތައް ހިފައިގެންނެވެ. އަދަދުގެ މެނޭޖިންގް އެޑިޓަރ ޙަސަން މުޙައްމަދު (ހަސަނާ) އަދި ޗީފް އެގްޒެކެޓިވް އޮފިސަރ ޙުސެއިން ފިޔާޒް މޫސާ  ޖުލައި 26, 2026 ވާންދެން ދިވެހިރާއްޖެއިން ބޭރަށް ފުރުން މަނާކޮށް, ޕާސްޕޯޓް ހިފެހެއްޓުމުގެ ޢަމުރެއްވެސް ކްރިމިނަލް ކޯޓުން ފުލުުހުން ހޯދާފައި ވެއެވެ.

އަންގާރަ ދުވަހުގެ ރޭގައި ފުލުހުންވަނީ ފިޔާޒްެއާއި ހަސަނާއަށް ބުދަ ދުވަހު ފުލުސް އޮފީހަށް ޙާޟިރުވާން އަންގާފައެވެ. ގަޒްފުގެ މައްސަލައެއްގެ ތަޙްޤީޤަށް ކަމަށް ޗިޓުގައި ލިޔެފައި ވެއެވެ. ޑޮކިއުމެންޓްރީގައި ތުހުމަތު އުފުލާ މުވައްޒަފުވެސް ޙާޟިރުވާން އަންގާފައިވެއެވެ. އޭނާގެ ޕާސްޕޯޓުވެސް އޮތީ ހިފަހައްޓާފައެވެ.

ފުލުުހުން އަދަދު ރެއިޑުކުރިއިރު ހޯމަ ދުވަހުގެ ހެނދުނު ރައީސް މުޢިއްޒު އޮތީ މިތުހުމަތުތަކުގައި އެއްވެސް ޙަޤީޤަތެއް ނެތްކަމަށް ވިދާޅުވެފައެވެ. އަދި ކަމާބެހޭ ފަރާތްތަކުން މިކަން ތަޙްޤީޤުކޮށް, ދޮގު މަޢުލޫމާތު ފަތުރާ, އަބުރު ކަތިލާ ފަރާތްތަކުގެ މައްޗަށް ފިޔަވަޅު އަޅުއްވާން ގޮވައިލައްވާ ކަަމަށް ވިދާޅުވިއެވެ. އަދި އަބުރުފުޅަށް ވީ ގެއްލުމުގެ ބަދަލުގައި ޤާނޫނީ ފަރުވާ ހޯއްދަވާނެ ކަމަށް ވިދާޅުވި މެއެވެ. އަދި އަދަދުގެ ނޫސްވެރިޔާ މުޙައްމަދު ޝަހުޒާން ދިމާލަށް ވިދާޅުވީ ”ދޮންއަމާ“ ވީީޑިއޯވެސް ހެދި ނޫހުން މިފަދަ ދޮގު ވާހަކަތަކެއް ދެެއްކީމާ ޙައިރާންވެވަޑައި ނުގަންނަވާ ކަމަށެވެ. 

އަންގާރަ ދުވަހުގެ ހެނދުނު ހޯމް މިނިސްޓަރ ޢަލީ އިޙްސާން ކުރެއްވި އެކްސް ޕޯސްޓެއްގައި ލިޔުއްވާފައިވަނީ ޒިނޭގެ ދޮގު ތުހުމަތު ރައީސް މުޢިއްޒުގެ މައްޗަށް އުފުލާފައިވާ މައްސަލަ ބަލާން ފުލުހުން މަސައްކަތްކުރާކަން ރަނގަޅު ކަމަށާއި, ނޫސްވެރިކަމުގެ މިނިވަންކަމަކީ މީސްތަލުން އަބުރު ކަތިލާން އޮތް ގެރެންޓީއެއް ނޫން ކަމަށެވެ. 

މޯލްޑިވްސް އިންޑިޕެންޑެންޓް ނޫހަށް ފެނުނު ކޯޓު ޢަމުރުގައި އަދަދު ނޫހާއި ނޫސްވެރިންގެ މައްޗަށް ތުހުމަތު އުފުލާފައިވަނީ ޤާނޫނުލް ޢުޤޫބާތުގެ 612(ހ) ގެ ދަށުން ގަޒްފުގެ ކުށުގައެވެ. މިކުށަކީ ޖުނަޙް 4 ގެ ކުށެކެވެ. އަސަސާސީ އަދަބަކީ އެއް އަހަރާއި 7 މަސް ދުވަހާއި 6 ދުވަހުގެ ޖަލު ޙުކުމެވެ. އެންމެ ގިނަ ވެގެން 4 އަހަރުގެ ޖަލު ޙުކުމެކެވެ. އަދި 80 އެތިފަހަރުން ތަޢުޒީރު ކުރުމެވެ.

ކޯޓު ޢަމުރުގައި ބުނަނީ ޑޮކިއުމެންޓްރީގައި ރައީސް ޑރ މުޙައްމަދު މުޢިއްޒުގެ މައްޗަށް ތުހުމަތު އުފުލާފައިވާ ކަމަށާއި, އެތުހުމަތުތައް ބަޔާންކުރާ ޑޮކިއުމެންޓްރީ އުފައްދައި, ފަތުރާފައިވަނީ އަދަދުގެ އެކްސް އެކައުންޓުންކަމަށާއި, ކަމުގައި ބައިވެރިވާ ހުރިހާ ފަރާތްތަކުގެ މައްޗަށް ގަޒްފުގެ ކުށުގައި ތުހުމަތު އުފުލޭ ކަމަށެވެ. ފުލުހުން ކޯޓުގައި ބުނަނީ ކަމާބެހޭ ތަކެތި އަދަދު ނޫހުގެ ކޮމްޕިއުޓަރުތަކުގައި ހުންނާނެ ކަމަށް ޤަބޫލުކުރެވޭ ކަމަށެވެ. އިންޓެލިޖެންސް ރިޕޯޓެއް އަދި މޯލްޑިވްސް މީޑިޔާ އެންޑް ބްރޯޑްކާސްޓިންގް ކޮމިޝަންގެ ސިޓީއެއް ހެކީގެ ގޮތުގައި ޢަމުރު ދިނުމުގައި ކޯޓުން ބެލިކަމަށް ބަޔާން ކޮށްފައި ވެއެވެ. 

އެހެންނަމަވެސް އައު ބްރޯޑްކާސްޓިންގް ކޮމިޝަނުން ބުނެފައިވަނީ އަދަދު ނޫހުގެ އޮފީސް ރެއިޑުކުރަން އެފަރާތުން ހުއްދަ ދިނުމާއި ހުއްދަ ހޯދުންފަދަ ކަމެއް ކޮށްފައި ނުވާނެ ކަމަށެވެ.

އަދަދުގެ ސީއީއޯ ޙުސެއިން ފިޔާޒް މޫސާ ވިދާޅުވީ އެއްވެސް ހެއްކެއް ފުލުހުންނަށް ހޯދޭނެކަމަށް ދެކެވަޑައި ނުގަންނަވާ ކަމަށާއި, ކޯޓު ޢަމުރުގައި އޮތީ ބަލައި, ފާސްކުރަން ނަމަވެސް ބައެއް ތަކެތި ބެލުމުގެ ދަށަށް ގެންގޮސްފައިވާ ކަމަށެވެ. ނަމަވެސް ބަލައި ފާސްކުރުމުގެ ޢަމުރެއް ބޭނުންކޮށްގެން ތަކެތި އަތުލައި ނުގެންދެވޭނެ ކަމަށް އަދަދުގެ ޤާނޫނީ ވަކީލުވެސް ފާހަގަކުރި ކަމަށާއި, ނަމަވެސް އެވާހަކަތަކަށް ފަރުވާލެއް ނުބަހައްޓާ ތަކެތި ނަގައިގެން ގެންދިޔަ ކަމަށެވެ. 

”ފުލުހުން ބޭނުންވަނީ އައިޝާ ޑޮކިއުމެންޓްރީއާ ބެހޭ ހެކި ނަމަ އެގޮތެއް ބުނީމާ އެއްޗެއް ހުރިނަމަ އަޅުގަނޑުމެން މިތިބީ ޙަވާލުކުރަން ތައްޔާރަށް. އެކަަމަކު ބޭނުމަކީ އެއީ ނޫންކަން ޢަމަލުކުރި ގޮތުން އެނގޭ,“ ކަމަށް ވިދާޅުވެ, ފިޔާޒް ތުހުމަތުކުރެއްވީ ރައީސް މުޢިއްޒުގެ މަޤްޞަދަކީ އަދަދު ނޫސް ހުއްޓުވައިލުން ކަމަށެވެ.

އަދަދުގެ ޤާނޫނީ ވަކީލު, ކުރީގެ މަޖިލިސް މެންބަރު ޢަލީ ޙުސެއިން ހުންނެވީ ރެއިޑު ހިންގަމުން ދިޔައިރު, އެއޮފީހުގެ ތެރޭގައެވެ. ޢަލީ ހުސެއިންވެސް ވިދާޅުވީ 10 ގަޑިއިރު ވާންދެންވެސް ބަލައި, ފާސްކުރާން ވީ ކަމަށާއި, ނަމަވެސް އެއްވެސް އެއްޗެއް ހިފައި, ނަގައި, އަތުލައިގެން ގެންދިއުމުގެ ބާރު ފުލުހުންނަށް ބަލައި ފާސްކުރުމުގެ ޢަމުރެއްގެ ދަށުން ނުލިބޭނެ ކަމަށެވެ. ”އަޅުގަނޑުމެން ދެންނެވިން ކޯޓު ޢަމުރެއް ނެތިއޭ ތަކެތި ތިގެންދަނީ. މުދަލަކީ ޙުރުމަތްތެރިވެގެންވާ އެއްޗެެކޭ. ޢަމުރެއް ނެތި ނުގެންދެވޭނެޔޭ. މިކަމުގައި އަޅުގަނޑުމެން ފުލުހުންގެ މައްޗަށް ދައުވާ ކުރާނަން.“ ޢަލީ ޙުސެއިން ވިދާޅުވިއެވެ.

ޖިނާޢީ އިޖުރާޢަތުގެ ޤާނޫނާއި ޤަވާއިދުގެ ދަށުން ނޫސްވެރިންގެ އަތުން އަތުލާ ކޮމްޕިއުޓަރާއި އެހެނިހެން އާލާތުން ހޯދާ މަޢުލޫމާތަކީ އިމްތިޔާޒު ލިބިގެންވާ މަޢުލޫމާތެވެ. އެކަމަށް ކޯޓު ޢަމުރު ނެރުމުގައިވެސް ބަލައި, ރިޢާޔަތްކުރަން ޖެހެއެވެ. އެފަދަ މަޢުލޫމާތެއް ބަލައި ހެދޭނީ ކަމާބެހޭ މުވައްސަސާއެއްގެ މަންދޫބަކުގެ ޙާޟިރުގައެވެ. އަދި ތަޙްޤީޤަށް ބޭނުންވާ ތަކެތި މެނުވީ ނަގައި, ބަލައި, ގެންދިއުން މަނާކުރެއެވެ.

އަދަދުގެ ޤާނޫނީ ވަކީލު ވިދާޅުވީ އެފަދަ މުވައްސަސާއެއް ހޯމަ ދުވަހުގެ ރޭ ޙާޟިރުވެ ނެތް ކަމަށެވެ.

އަންގާރަ ދުވަހު އަދަދު އިން ނެރުނު ނޫސްބަޔާނެއްގައި ބުނެފައިވަނީ އެނޫހުގެ އޮފީސް ރެއިޑުކުރީ މިނިވަން ނޫސްވެރިކަމަށް ބިރުދެއްކުމަށް ކަމަށާއި, އެނޫހުގެ މަސައްކަތްތައް ހުއްޓުމަކަށް ގެނައުމަށް ކަމަށެވެ. 

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އާ ގުޅުންބޮޑު އަދަދު ނޫހުގެ ނޫސްވެރިންނަށް އައިޝާ ޑޮކިއުމެންޓްރީއާ ގުޅިގެން ކާކުކަން ނޭނގޭ ފަރާތްތަކުން ބިރުދައްކާފައި ވެއެވެ.

އަދަދު އާ ދެކޮޅަށް ހިންގަމުންދާ ޖިނާޢީ ތަޙްޤީޤުތަކާއި ތުހުމަތުތަކުގެ ފަހަތުގައިވަނީ އެ ނޫހުން ފޭސްބުކް އަދި އެކްސް އެކައުންޓުގައި 28 މާރިޗުގައި ޕޯސްޓުކުރި ޑޮކިއުމެންޓްރީ ވީޑިއޯއެވެ. އެއީ ލޯކަލް ކައުންސިލް އިންތިޚާބު އަދި ދެއިންތިޚާބު އެއްދުވަހެއްގައި, އެކުއެކީގައި ބާއްވަން ނަގާން ތާވަލުކޮށްފައިވާ ވޯޓުގެ ހަފުތާއެއް ކުރިންނެވެ. 

ރައީސް އޮފީހުގެ ތަރުޖަމާނު ހީނާ ވަލީދުވަނީ އެ ޑޮކިއުމެންޓްރީގައިވަނީ އަޞްލެއްނެތް ދޮގު ވާހަކަތަކެއް ކަމަށް ވިދާޅުވެފައެވެ.

އައިޝާ ޑޮކިއުމެންޓްރީގައި ބުނަނީ ޢުމުރުން ވިއްސަކަށް އަހަރުގެ ރައީސް އޮފީހުގެ މުވައްޒަފަކާ ރައީސް މުޢިއްޒު ހިތްޕުޅާވެގެން, ޖިންސީ ގުޅުން ހިމެނޭހެން, 7 މަސް ދުވަސްވާންދެން ގުޅުން ބޭއްވި ވާހަކައެވެ. 

މިމުވައްޒަފު ރައީސް މުޢިއްޒަށް ފުރަތަމަ ކުރީ މެސެޖެވެ. ދެން ކުރީ ބައްދަލެވެ. ވަޒީފާއަކަށް އެދެމުންނެވެ. ރައީސް މުޢިއްޒު ވާހަކަފުޅު ދެއްކެވީ އޭނާގެ އަތުގައި ހިއްޕަވައިގެން ހުންނަވާ ކަމަށް ވެއެވެ. އިސާހިތަކު ރައީސް ގުޅުއްވައި, މެސެޖު ކުރައްވާން ފައްޓަވައިފިއެވެ. ދަން ގަޑިގަޑީގައިވެސް މެއެވެ. އަދި އޭނާއަށް ރައީސް އޮފީހުގެ އެގްޒެކެޓިވް އެޑްމިނިސްޓްރޭޓަރެއްގެ ވަޒީފާ ދެއްވިއެވެ. ދެވަނަ ބައްދަލުވުމުގަައި ރައީސް މުޢިއްޒު އެމުވައްޒަފު ގައިގައި ބައްއދާލެއްވިއެވެ. ނަމަވެސް އަމިއްލަފުޅު ނަފުސު ކޮންޓްރޯލް ނުކުރެއްވުނީ ކަމަށް ވިދާޅުވެ, ފަހުން މަޢާފަށް އެދިވަޑައިގަތްކަމަށް އެމުވައްޒަފު ޑޮކިއުމެންޓްރީގައި ކިޔައިދެއެވެ.

ޖިންސީ ގުޅުން ހިންގިކަމަށް އެމުވައްޒަފު ބުނަނީ ރައީސް އޮފީހުގެ ތެރޭގައިވާ އެލް ސޯފާއެއް އަދި ރައީސް ކެބިންއާއި ވައްމޭޒު ހިމެނޭހެންނެވެ. އަދަދު އިން ބުނަނީ ރައީސް މުޢިއްޒާ މިމުވައްޒަފާ ދެމެދު ކޮށްފައިވާ މެސެޖުތައް އެނޫހަށްވަނީ ފެނިފައެވެ. ރައީސްގެ އަމިއްލަފުޅު ނަންބަރުން ޖަނަވަރީ 6 އިން އޭޕްރީލް 29, 2025 އަށް ސިގްނަލް އެޕް މެދުވެރިކޮށް 58 ފަހަރު ގުޅުއްވާފައިވާ ކަމަށް އެނޫހުން ބުނެއެވެ. އަދި މެސެޖުކުރުމުން 5 މިނެޓު އިރު ތެރޭގައި ޖަވާބުދެއްވާން ރައީސް އެމުވައްޒަފުގެ ކިބައިން އެދުނު ކަމަށްވެސް ވެއެވެ. 

ޑޮކިއުމެންޓަރީގައި ޝާމިލުވާ މުވައްޒަފު އެހެން ތަނަކަށް ބަދަލުކުރުމުގެ ކުރިން ރައީސް އޮފީހުގައި ހަފުތާއެއް ވަރު މަސައްކަތް ކުރިއެވެ. ރައީސް މުޢިއްޒުގެ އަނބިކަނބަލުން ސާޖިދާ މުޙައްމަދަށް ޝައްކެއް ވާންދެން ކަމަށް ވެއެވެ. ފަހުން މިމުވައްޒަފު ހުރީ ޖެންޑަރ މިނިސްޓްރީގެ ޕޮލިޓިކަލް ޑައިރެކްޓަރެއްގެ ގޮތުގައި, އިސްރަށްވެހިންގެ ނާދީއަށް ނުކުންނަ ގޮތަށެވެ.

ދެން ރައީސް މުޢިއްޒުވަނީ އެމުވައްޒަފަށް ހަދިޔާ މާލީގޮތުން އެހީތެރިވެވަޑައިގަތުމަށް ”ހަދިޔާ“ ދެއްވަމުންނެވެ. މަހަކު 50,000 ރުފިޔާ ދެއްވާކަމުގައި ވެއެވެ. އަދި އެއް މަހު, ރަމަޟާން ހަދިޔާއާއެކު 75,000 ދެއްވި ކަމަށް ވެއެވެ. އެފައިސާ ގެންގޮސްދެނީ ރައީސް މުޢިއްޒުގެ ޕާސަނަލް އެސިސްޓަންޓް ޙައްސާން ފުއާދުކަމަށް އެ މުވައްޒަފު ބުނެއެވެ. މިއީ މަހަކު އެއްފަހަރު ބައެއް މަޖިލިސް މެންބަރުންނަށް ރައީސް މުޢިއްޒު ދެއްވާ ”ހަދިޔާ“އާ އެއްގޮތަށެވެ. 

ޑޮކިއުމެންޓްރީގައި ބުނާގޮތުން ރައީސް މުޢިއްޒު ގެންދެވީ އަނބިކަނބަލުން ސާޖިދާއާއި އެމުވައްޒަފާ ދެމެދު ހިސާބެއްގެ ގުޅުމެއް އޮތަ ދެއްވަމުންނެވެ. ބޭނުންފުޅަކީ ދެވަނަ އަނބެއްކަމުގައި އެމުވައްޒަފު ޚިޔާރު ކުރެއްވުމެވެ. ކޮންމެއަކަސް, އަނެއްކާވެސް މިމުވައްޒަފުގެ އޮފީސް ބަދަލުކޮށްފިއެވެ. މިފަހަރު ހަޔަރ އެޑިއުކޭޝަންއަށެވެ. ސަބަބަކީ ޖެންޑަރގެ ސީނިއަރ އޮފިޝަލުން އެމުވައްޒަފަށް ޖެއްސުން ކުރުމެވެ. ރައީސް މުޢިއްޒާ ގުޅުން ހީނަރުވާން ފެށީ މިހާ ހިސާބުންނެވެ. ލަހުން މެސެޖުތަކަށް ޖަވާބުދޭކަމަށް ވިދާޅުވެ, ރައީސް މުޢިއްޒު ޝަކުވާ އުފުއްލަވަމުން ގެންދެވިއެވެ. އަދި ގުޅުންކުޑަވެގެންވެސް ޝަކުވާ ބެންނެވިކަމުގައި ވެއެވެ.

ގުޅުން ކެނޑުނީ 7 މަސް ފަހުންނެވެ. ސާޖިދާއަށް މިގުޅުން ފަޅާއަރައިގެން ކަމަށް ވެއެވެ. ރައީސް މުޢިއްޒު ގެންދެވީ އެމުވައްޒަފަށް އެއްވެސް އެހެން މީހަކާ ރައްޓެހިވެ, ޒާތީ ލޯބީގެ ގުޅުމެއް ބާއްވައި އުޅުން މަނާ ކުރައްވާފައެވެ. އަދި ރައީސްގެ ޕަރސަނަލް އެސިސްޓަންޓް މެދުވެރިކޮށް އެމުވައްޒަފަކަށް ”ބަސް އަހައިގެން“ އުޅޭން އަންގާފައި ވެއެވެ.

ޑޮކިއުމެންޓްރީގައި ވާގޮތުން ރައީސް މުޢިއްޒާ އޮތް ގުޅުމަށްފަހު, އެމުވައްޒަފު ލޯބީގެ ގޮތުން ޝައުޤުވެރިކަން ފައުޅުކުރީ ސަރުކާރުގެ މިނިސްޓަރެކެވެ. އެމިނިސްޓަރ ރައީސް މުޢިއްޒުގެ އަރިއަހުގައި ޙައްޖަށް ގެންދަވައި, އެމުވައްޒަފާ އޮޮތް ގުޅުން ކަނޑައިލާން އެންގެވިއެވެ. އަދި އޭގެފަހުން އެމުވައްޒަފު ރައްޓެހިވި ސަރުކާރު ޙިއްސާވާ ކުންފުންޏެއްގެ މެނޭޖިންގް ޑިރެކްޓަރަކުވަނީ މަޤާމުން ވަކިކޮށްފައި ކަމަށްވެސް ޑޮކިއުމެންޓްރީގައި ދައުވާ ކުރެއެވެ. 

ފިޔާޒް ވަނީ ގަޒްފުގެ ތުހުމަތާމެދު ސުވާލު އުފައްދަވާފައެވެ. ދިވެހިރާއްޖޭގެ ޤާނޫނު ބުނާގޮތުން ގަޒްފުގެ މާނައަކީ ޒިނޭގެ ދޮގު ބަދުނާމް އެޅުވުމެވެ. ފިޔާޒް ވިދާޅުވީ މިނިވަން ކޮންމެ ތަޙްޤީޤަކަށް އެތުހުތަކީ ދޮގެއް ނޫންކަން ޘާބިތުވާނެ ކަމަށާއި, ތަޙްޤީޤެއް ހިންގާނަމަ ”ތަޙްޤީޤު ފުރަތަމަ ހިންގަންޖެހޭނީ ސޯފާއާ ގުޅޭގޮތުން,“ ކަމަށާއި, ތުހުމަތު އުފުލި ފަރާތުގެ މައްޗަށް ނޫން ކަމަށެވެ.

މިމައްސަލައިގައި ނަންހިނގާފައިވާ ސޯފާއިން ސާމްޕަލް ނެގުން މުހިންމުކަން ފިޔާޒް ފާހަގަކުރެއްވިއެވެ. ”އަޅުގަނޑުމެން ދެއްކި ވާހަކައެއް, ޢާންމުކުރި އެއްޗެއް ވިއްޔާ އެއޮތީ ފެންނަން, އަޅުގަނޑުމެންގެ އޮފީސް ރެއިޑުކުރަންވާނީ ތަޙްޤީޤަށް ބޭނުންވާ އެއްޗެއް ނުދޭން އުޅޭ ނަމަ,“ ކަމަށް ވެސް އަދަދުގެ ސީއީއޯ ވިދާޅުވިއެވެ.

ރާއްޖެއިން ބޭރަށް ގޮސްފައި އެނބުރި އައީ ދާދިފަހުން ކަމަށާއި, އެހެންކަމަށްވާއިރު, ފުރުން މަނާކުރުމުގެ ސަބަބެއް, ހަމައެއް ނެތްކަމަށާއި, ޕާސްޕޯޓް މިހެން ހިފެހެއްޓޭނެ ކަމަށް ޤަބޫލު ނުކުރައްވާކަން ހާމަކުރައްވާ, ފިޔާޒް ވިދާޅުވީ މިކަމުގެ އަސަރު ނޫސްވެރިންނާއި އަދަދުގެ މުވައްޒަފުންގެ ޢާއިލާތަކަށްވެސް ފޯރާފައިވާ ކަމަށެވެ. ”ފުލުހުން ބަލައި ފާސްކުރަމުން ދިޔައިރު, ދަރިފުޅު ގުޅާފައި ބުނި ތިމަންނަގެ ކޮމްޕިއުޓަރ ގެންދިޔައަކަ ނުދޭނަމޭ. އޭނައަކީ ކިޔަވާ ކުއްޖެއް,“ ކަމަށް ފިޔާޒް ވިދާޅުވިއެވެ. ”ޢާންމުކޮށް ފުލުހުން ރެއިޑުކުރާ އިރު, ގެންދަނީ ކަމާބެހޭ ތަކެތި. ސިޔާސީ ކުލަވަރު ޖެހިއްޖިއްޔާ ބޮޑު ދާ ޖަހާފައި ހުރިހާ އެއްޗެއް މި ކަހާލަނީ. އެހެންވެ ދަރިފުޅު ހާސްވީ,“ އޭނާ ކިޔައިދެއްވިއެވެ.

އިނގިރޭސިވިލާތުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ނިކް ލޯ އެކްސް ގައި ކުރެއްވި ޕޯސްޓެއްގައި ވިދާޅުވީ އަދަދު ނޫސް ރެއިޑުކުރުމަކީ ކަންބޮޑުވަނިވި ކަމެއް ކަމަށާއި, އެއީ ދިވެހިރާއްޖެއިން ނަގަހައްޓާން އެއްބަސްވެފައިވާ ކޮމަންވެލްތުގެ އަގުތަކާ ދުރު ޢަމަލެއް ކަމަށެވެ. އަދި ދިވެހިރާއްޖޭގެ މީޑިޔާގެ މިނިވަންކަމުގެ ޙާލަތާ ގުޅޭގޮތުން އިނގިރޭސި ސަރުކާރުން ކެނޑިނޭޅި ކަންބޮޑުވުން ފައުޅުކުރަމުން ގޮސްފައިވާނެކަން ފާހަގަކުރައްވާ ސަފީރު އިތުރަށް ވިދާޅުވީ މިނިވަން މުސްތަޤިއްލު މީޑިޔާއަކީ ދުޅަހެޔޮ ޑިމޮކްރަސީއަކަށް ޟަރޫރަތެއް ކަމަށެވެ. 

ދަ ކޮމިޓީ ޓު ޕްރޮޓެކްޓް ޖަރނަލިސްޓް (ސީޕީޖޭ) އިން ވަނީ ސަރުކާރުން ރެއިޑުގައި އަތުލި ސާމާނުތައް އަދަދު އަށް އަނބުރާ ރައްދުކުރުމަށާއި ފުރުން މަނާކޮށްފައިވާ ޢަމުރު އަނބުރާ ގެންދިއުމަށް ގޮވައިލާފައެވެ. ރެއިޑުކުރުމާއި ފުރުން މަނާކުރުމުގެ ބޭނުމަކީ ދީނީ އަދި ޤައުމީ މަޞްލަަޙަތުތައް ޢުޟުރެއްކަމުގައި ދައްކައިގެން ”ތަޙްޤީޤީ ނޫސްވެރިކަމަކީ ޖިނާޢީ ކުށަކަށް“ ހަދާން ސަރުކާރުން ކުރާ ހިންމަތުގެ ބައެއް ކަމަށެވެ. ސީޕީޖޭގެ އޭޝިޔާ ޕެސިފިލް ޕްރޮގްރާމް ކޯޑިނޭޓަރ ކުނާލް މަޖުމްދަރ ވިދާޅުވީ މަދަނީ މިންގަނޑުން ބޭރަށް މައްސަލައަށް ގެންދާން ދީނީގޮތުން ކުށްކަނޑައަޅާ ޤާނޫނުތައް ބޭނުްކުރާން ފެށުމަކީ ނޫސްވެރިކަމަށް ނުހަނު ނޭދެވޭ އަސަރު ފޯރުވާނެ އަދި އެކަމަށް މުސްތަޤްބަލުގައި ކަންފަހިކުރާނެ ކަމެއް ކަމަށާއި ސަރުކާރުގެ މުއައްސަސާތައް ޖަވާބުދާރީކުރުވުމުގެ ފުރުޞަތު ކަމާބެހޭ ފަރާތްތަކުން ނޫސްވެރިންނަށް ދޭންޖެހޭނެ ކަމަށެވެ.

ފުލުހުން އަދަދު އަށް ވަދެގަތީ ރައީސް މުޙައްމަދު ނަޝީދު - އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެއްވުމެއްގައި ވާހަކަދައްކަމުން ގެންދަވަނިކޮށެވެ. އެމަނިކުފާނު  ވިދާޅުީ ފުލުހުން ”އެލް ސޯފާ“ ހޯދާން އަދަދުގެ އޮފީހަށް ވަދެއްޖެކަމުގެ ޚަބަރު ދެންމެ ލިބިވަޑައިގެންނެވި ކަމަށެވެ. ”އެތަނުގެ ފަރުނީޗަރު ހުރިގޮތެއް އަޅުގަނޑަކަށް ނޭނގޭ,“ ހަޖުލުގެ ރާގެއްގައި އެމަނިކުފާނު ވިދާޅުވިއެވެ. ރައީސް ނަޝީދު ވިދާޅުވީ ނޫސްވެރިކަމުގެ މިނިވަންކަމަށް ހުރަސްއަޅައި, އޮބަހެއްޓޭނެކަމަށް ސަރުކާރުން ޤަބޫލުކޮށްގެން ނުވާނެ ކަމަށާއި, ”އަޅުގަނޑުމެން ފަހަތަކަށް ނުޖެއްސޭނެ. އަޅުގަނޑުމެން ދާނީ ކުރިއަށް,“ ކަމަށެވެ. 

ރައީސް ނަޝީދު އެރޭ ފަހުން އެކްސް ގައި ކުރެއްވި ޕޯސްޓެއްގައި ވިދާޅުވެފައިވަނީ ނޫސްވެރިކަމުގެ މިނިވަންކަމަކީ އަނިޔާއާއި, ބަންދުތައް ހިމެނޭހެން ނުހަނު ގިނަ މަސައްކަތާއި ޤުރުބާނީ އަށްފަހު ދިވެހިން ހޯދި ޙައްޤެެއް ކަމަށާއި,  އަދަދު ނޫހުގެ ތެރެއަށް ވަދެގަނެ ނޫސްވެރިކަމުގެ ޙައްޤަށް ހުރަސްއެޅުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށެވެ. 

ރައީސް އިބްރާހިމް މުޙައްމަދު ޞާލިޙް މިކަމާމެދު އެކްސް މެދުވެރިކޮށް ކުރެއްވި ޕޯސްޓެއްގައި ވިދާޅުވީ އަދަދު ނޫސް ރެއިޑުކުރުމުން ނުހަނު ކަންބޮޑުވެވަޑައިގެން ހުންނެވި ކަމަށާއި, ފުލުހުން މަސައްކަތް ކުރާންވާނީ މިނިވަންކަމާއެކު, ސިޔާސީ ނުފޫޒުން ނެއްޓިތިބެ ކަމަށެވެ. 

ރައީސް ޢަބްދުالله ޔާމިން ވެސްވަނީ އަދަދު ރެއިޑުކުރުމުގެ މައްޗަށް ވާހަކަފުޅު ދައްކަވާފައެވެ. ޕީޕަލްސް ނޭޝަނަލް ފްރަންޓް (ޕީއެންއެފް) އިން ހޯމަ ދުވަހުގެ ރޭ ބޭއްވި ފްރަންޓް އޮފީސް ޖަލްސާގައި އެމަނިކުފާނު ވިދާޅުވީ ސަރުކާރުން މީޑިޔާ ކުށްވެރިކުރުމުގެ ބަދަލުގައި ވާންވީ އިޞްލާޙު ކަމަށެވެ.

މޯލްޑިވްސް ޖަރނަލިސްޓްސް އެސޯސިއޭޝަން (އެމްޖޭއޭ) އިން ބުނެއިފައިވަނީ އަދަދު ގެ ސީނިއަރ ނޫސްވެރިން ފުރުން މަނާކުރުމަކީ ރަތްރޮނގެއް ހުރަސްކުރުންކަމުގައި ދެކޭ ކަމަށެވެ. އަދި ނޫސްވެރިންނަށް ބިރުދެއްކުމާއި, ނޫސްވެރިކަމުގެ ޙައްޤަށް އުނިކަން ލިބޭގޮތަށް ޢަމަލުކުރުން ހުއްޓައިލުމަށްވެސް ސަރުކާރުގެ މައްޗަށް ގޮވައިލާފައި ވެއެވެ. 

އިދިކޮޅު ފަރާތްތަކާއި ނޫސްވެރިކަމުގެ މިނިވަންކަމުގެ ޙައްޤުގައި ވަކާލާތުކުރާ ފަރާތްތަކުން އަދަދުގެ ރެއިޑާމެދު ކަންބޮޑުވުން ފައުޅުކުރަމުން ދާއިރު, ސަރުކާރުން އެއްއަޑަކުން ކިޔަމުންދަނީ ރައްދުގައި އެއް ލަވައެކެވެ. އަންގާރަ ދުވަހުގެ މެންދުރުން އެނބުރި އިރު ގާތްގަނޑަކަށް ހުރިހާ ވަޒީރުންހެން ރައީސް ޑރ މުޢިއްޒުގެ ދިފާޢުގައި, އެމަނިކުފާނަށް ތާޢީދުކުރައްވާ ސޯޝަލް މީޑިޔާގައި ޕޯސްޓު ކުރައްވާފައިވެއެވެ. އެބޭބޭފުޅުންގެ ޕޯސްޓުތަކުގައިވަނީ އަބުރާއި ކަރާމާތުގެ ވާހަކައާއި, ދީނީ ރިޢާޔަތްކުރުންތަކާއި, ނޫސްވެރިކަމުގެ އަދި ޚިޔާލު ފައުޅުކުރުމުގެ ޙައްޤުގެ މިނިވަންކަމުގެ ހައްދުތަކާއި އިންތަކުގެ ވާހަކައެވެ.

އަދަދު ނޫހުން ބުނަނީ އެ ޕޯސްޓުތައް ކޮށްފައިވަނީ އެވަނީ ”މަތިން އަންގައިގެން,“ ”މަތިން ރާވައިގެން,“ ކަމަށެވެ. ”އަޅުގަނޑާއި އަޅުގަނޑުގެ ޢާއިލާ“ގެ ދިފާޢުގައި ބަސް ނުބުނަނީ ކީއްވެގެންތޯ އަންގާރަ ދުވަހުގެ ހެނދުނު ޕީއެންސީގެ ޕާލިމެންޓްރީ ގްރޫޕްގެގެ ޗެޓުގައި ރައީސް މުޢިއްޒު އެއްސެވިކަމުގައި ވެއެވެ. ޕީއެންސީ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާޙް ވިދާޅުވީ ފިޔަވަޅު އަޅާން ޕާލިމެންޓްރީ ގްރޫޕުން ތައްޔާރުވަމުންދާ ކަމަށެވެ. ރައީސް މުޢިއްޒުގެ ދިފާޢުގައި އަޑުއުފުލާން ކެބިނެޓް މިނިސްޓަރުންނާއި, ސަރުކާރު ޙިއްސާވާ ކުންފުނިތަކުގެ ވެރިންނާއި, އެހެނިހެން ސިޔާސީން ޢައްޔަނީންނަށް އަންގަމުންދާ ކަމަށް އަދަދު އިން ރިޕޯޓުކޮށްފައި ވެއެވެ.