ނަދީގެ ކުރެހުންތަކުގެ މަޢުރަޒު: ބޭޤަރާރުކަމުން ނުކުންނަ ރީތި
ހުރިހާ ކަމެއް ނިމެނީ ކަރުނައިންނެވެ. އޭނާ އެކަން ދަނެއެވެ.
ކުރެހުމާއި ޑިޒައިން: ޑޮސެއިން
13 ޖެނުއަރީ
ނަދީ ރަޗޭ އަށް ޚާއްޞަ ދެވަނަ މަޢުރަޒު، ގެލެރީ 350 ގައި ކުރިއަށްދާއިރު، އެތަން ފުރިބަންޑުންވަމުން ދަނީ މޮޅިވެރިކަމުގެ އަސަރުތަކަކުންނެވެ. މިކުރެހުންތަކުގައި އުފާވެރިކަމުގެ އެތިކޮޅުތަކެއް ތާށިވެގެންވޭ ތޯއްޗެކެވެ. ނަމަވެސް، އެފަދަ ނިޝާނެއް ހޯދާން އެދޭ މީހާ އެކަމަށް ފިސާރި ހިންމަތެއް ކުރާން ޖެހޭނެއެވެ. މުއްޓާއި ނުލުގެ ދޭތެރެތަކުން ފޭދިގެންދާ އައްޔާއި ބޮޅުތަކުގެ ތެރެއަށް ރަނގަޅަށް ވަދެ އިނދެގެން މެނުވީ އެފަދަ ނިޝާނެއްގެ ހިޔަނިވެސް ނުފެންނާނެއެވެ.
މީސްތަކުން ބުނެ އެޅެނީ މި ކުރެހުންތަކުގެ ވަށައިގެންވަނީ ހަމަޖެހުމާއި، ޙާލަތުގެ މައްޗަށް ފިކުރުކުރު ހިންގުމުގެ އިޙްސާސެކެވެ. އާނއެކެވެ. އެއީ ދޮގެއްވާ ނޫނެވެ. ގަނޑުގައި ކުރެހުންތެރިޔާ ރޮނގަކަށްފަހު ރޮނގެއް އަޅަމުންގޮސް، އާޚިރު މަންޒަރަށް ވާޞިލުވާން އެކުރި ރޭވުންތެރި މަސައްކަތް އިޙްސާސް ވާ ކަހަލައެވެ. ނަދީގެ ފެންކުލައިގެ ހުނަރުވެރިކަން ހާދަހާވާ މޮޅޭ ބުނުމަކީ ނާއިންޞާފެކެވެ. އޭނާގެ ކުރެހުންތެރިކަން ހެދޮބޮޑުވަމުން އައިތަން ދުށުމީ އުފަލެކޭ ދެންނެވުމަކީވެސް ނާއިންޞާފެކެވެ. ނަމަވެސް، އޮހި، އެތުރިގެންވާ ރޮނގުތަކުގެ ފަސްފަހަތުން އޮވެ ފައުޅުވަނީ މޮޅިވެރިކަމެވެ. ޚުދްމުޚްތާރުކަމާއެކު ވެރިވެގަންނަ މޮޅިވެރިކަމަކަށް ވުރެ، އޭނާގެ މަސައްކަތުގެ ބަހާއެއްގެ ގޮތުގައެވެ. ހަމަހިމޭން މޮޅިކަމެއްގެ ސާލެއްގައި އެމަސައްކަތްތައް ބެނދެވިފައި ވެއެވެ.
ނަދީއަށް ޚާއްޞަ އޭނާގެ ފުރަތަމަ މަޢުރަޒު ބޭއްވީވެސް މިތަނުގައެވެ. ދެ ދުވަސްވަރެއްގައި ނަމަވެސް، ނަދީގެ ދެ މަސައްކަތް މިތަނުން، އެއްތަންކުރިކަން ފާހަގަކުރުމަކީ ނެތްކަމެއް ނޫނެވެ.
ފުރަތަމަ މަޢުރަޒުގެ ކުރެހުންތަކާ އަޅާކިޔާއިރު، މިކުރެހުންތަކުގައި އަޅާފައިހުރި ރޮނގުތަކުން މާފުން އިޙްސާސެއް ރަމްޒުކޮށްދީދީ ހުރެއެވެ. ނަދީ އެވަނީ އެކި އައްޔާއި، ކުލައިގެ ފަނޑުގަދަމިން ތަޙްލީލުކޮށްފައެވެ. އެތައް އަހަރެއްގެ ކުރީގެ ވިސްނުމެއްގެ ރޮނގެއް ނަގައި، ކުރިއަށްދާން އޭނާ އަށް އެންމެ ރަނގަޅެކެވެ. އޭނާގެ ރީތި ކުރަހާ ފޮތަކީ މިކަމުގެ އަރާހުރި މުޤައްދަޞް މިސާލެކެވެ. ފެނުގެ ޢާލަމުގެ އެންމެ ކުދި ޒައްރުތައްވެސް އޭނާ ދެނެދަނެ ހުރި މިންވަރުގެ މައްޗަށް ކުރާ ފުރިހަމަވެގެންވީ ޙަޤީޤީ ދަލީލެކެވެ.
މިއީ ޒާތީ، ފައުޅުކުރުވަނިވި، އޭގެ ތެރެއަށް ގެއްލިގޮސް ހުސްވާގޮތް ހުރި މަޢުރަޒެކެވެ. ކުރެހުންތެރިކަމީ އަމިއްލައަށް އޭގެ ތެރެއަށް ގެއްލި ހުސްވުމުގެ މައްޗަށް ބިނާވެގެންވީ ފަންނެކެވެ: ތިމާ ދެކޭ ގޮތާއި، ފެންނަ ގޮތާއި އަދި ތިމާއަށް މުހިންމުވާ ކަންކަމުގެ މައްޗަށެވެ. ދުނިޔޭގެ އެއް ބަހާ ކަމަށްވާ ބައެއްގެ މައްޗަށް ނަދީގެ ނަޒަރު ހުއްޓިފައި ހުންނަތާ އަހަރުތަކެއް ވަނީއެވެ. އެންމެ ވިދަނީ ރާޅާއި ބާނި ފިހިން އޭނާ ޔައުމިއްޔާ ކުރަމުން ގޮސްފައިވާ ގޮތުންނެވެ. އެހެން ބައެއް ކުރެހުމުގައި ހިސާބެއްގެ ތާއްޓެއް ހުރިކަމަށް ބުނެވިދާނެއެވެ. ގޮނޑުދޮށުގައި ހުރި ކުޑަ ކުއްޖެކެވެ. އަތްތިލާގައިވާ ޑަޔަރީއެކެވެ. ލައިފް ރިންގެކެވެ. އެކުރެހުންތައް ދަޢުވަތު ދެނީ ތަޙްޤީޤީ ވިސްނުމަކަށެވެ. އެ ދައްކައިދޭ ޠަބީޢީ އެކަނިވެރިކަމުން، ގެއްލުމާއި މޮޅި އަމުދުން، މާބޮޑުކޮށް ފާޅުކޮށްދީދީ ހުރެއެވެ.
ބައެއް މީހުން ބުނަނީ މި ކުރެހުންތަކަކީ އުފެދިގެ ހެދިގެންވާ ގޮތާއި، އެއުފެދުމުގައިވާ އޮއްޓަރުގެ މައްޗަށް ނުވަތަ އެދެމެދުގައިވާ ފަރަގަށް ކޮށްފައިވާ ޚިޔާލުތަކުގެ ތަދުބީރެވެ. އެއް ޙާލަތުން އަނެއް ޙާލަތަށް ވާޞިލުވުމުގެ މަރުޙަލާއެވެ. ހިސާބު ޢިލްމުގައި ރާޅަކީ ވާން އޮތް ގޮތެއްގެ އަންދާޒާއެކެވެ. އޭގައި މިންތަކަކާއި އިންތަކެއް، ރޫރޫއެޅުންތަކަކާއި ބާރުމިނެއް ވެއެވެ. ޙަޤީޤީ ދުނިޔޭގައި ރާޅަކީ ރަށްރަށުގެ ވަށައިގެން ދައުރުވާ އެއްޗެކެވެ. އަހަރުމެންގެ ޙަޔާތުގެ ތެރެއިން ސަތަޙަޔާ ދިމާއަށް ކަޅިހިންގާލާ ތަންވަޅު ފެންނަ މަންޒަރެކެވެ. ބާރު ގަދަވެއެވެ. ބާރު ދެވައެވެ. ހިތަށް އަރާފައިބާ ގޮތާއި އެއްހަމައިގައި ބުގިސްވަމުންދާ މަސްތީ ނާނާއެކެވެ. އެރާޅަށް ކަޅިއެއް އެއްލާން ތަންވަޅެއް ލިބެނީ މި ރަށްގަނޑުގައި ތާށިވެފައި މިތިބަ މީހުން ކުރެން ކިތައް މީހުންނަށް ބާވައެވެ.
މިއާއެކު، މަޢުރަޒުގެ ބައެއް ކަމުގައި ހިމެނޭ އޯޑިއޯ-ވިޜުއަލް (އަޑާއިއެކު މަންޒަރު ދައްކުވައިދޭ) ބައި ތަޖުރިބާކޮށްލާން ހިތްގައިމު ނަމަވެސް، ކޮންމެހެން ހިމަނާން ބޭނުން ބައެއް ބާވައޭ ހިތަށް ގެނުވައެވެ. އެނުލާވެސް ފަރުޖެހުނީހެވެ.
އެހިސާބަށް ކުރުކޮށްފައި، ބުނާންޖެހެނީ މިކުރެހުންތަކުގައި އުފަލެއްވާނަމަ، އެ އުފާވަނީ މޮޅިވެރިކަމުގައި ޣަރަގުވެގެން ކަމެވެ. އޭގައި ނުތަނަވަސްކަމާއި ބަރުކަން އެލިގެންވެއެވެ. ވަގުތީކަމާއި ދެމިނޯޓުން ދުނިޔޭގައި ރަސްކަން ކުރެތެވެ. ރާޅަކީ އެކަމުގެ ޢަލަމާތެކެވެ. އަހަރެން ދެކޭގޮތުގައި މި މަޢުރަޒުގެ އެންމެ ފުން މައުނަވީ ޚިޔާލަކީ ކަމެއް/އެއްޗެއް ހަފަރާތަށް ފުޅާވެ، ފެތުރި ދިޔަސް، ހުލިވެ، ނިމި، ގެއްލިދަނީ ޒައްރަކަށްވެސް ނުފުދޭ ފަދަ ސަރާސަރު ގޮތެއްގައި ކަމެވެ. އެކަން ހިނގައިދާ ގޮތެވެ. އާދައިގެ ކަމެވެ. އެޙަޤީޤަތުގެ ވަރުހެސަކަން ކުރެހުންތެރިޔާ ބުރަހެލިކުރުވާފައި ވާ މިންވަރު ފެނެއެވެ. އަހަރުންގެ ކުޅަ މަސައްކަތްތަކަށް، އޭ މާޔޫސްކަމުގެ އަހުލުވެރިންނާއި، ގަދަފަދަވެރިން ބަލާށެވެ. ޝާޢިރަކު ލިޔުނެވެ. އޭގައި އިތުރުކަމެއް ނުވެއެވެ.
އަހަރުމެންގެ މައްސަލައަކީ މައްސަލައެއް އޮތުމެވެ. މައްސަލައިގައި ޙައްލެއް ނެތުމެވެ. ނުވަތަ އެ މައްސަލައިގެ ކުރިމަތީގައި ފިއްކަނޑައިގެންދާ ހާ ގިނަ ޙައްލުގެ މަގުތައް ހުރުމެވެ. ނަދީ ޚިޔާރުކޮށްފައި އެވަނީ ކުރެހުމެވެ. އެގޮތް އިޚްތިޔާރުކުރުމުގައި އޭނާ އެވަނީ ބޭޤަރާރުން ރީތިކޮށްފައެވެ. އޭގައި ބާވަތެއްގެ ޢިޝްޤެއް ވެއެވެ. މާކުރީ ޒަމާނަކަށް ނިސްބަތްވާންވީ ބާވަތުގެ ޢިޝްޤެކެވެ.
އާނއެކެވެ. ހުރިހާ ކަމެއް ނިމެނީ ކަރުނައިންނެވެ. އެހެނަސް، ރާޅުތަކުގެ ހުއްޓުމެއްނެތް ބާނިތަކުން ކުރެހުންތެރިޔާ އަދި އޭނާގެ ފައުޅުކުރުންތަކަށް ރިވެލި ކުރެއެވެ. އެހާ ރިވެތިކަމުގައި ވި ޔޫނާނީން ލައްކަ ހިތާމަޔާއި މޮޅިވެރިކަން ތަޙައްމަލުކޮށްފައި މެނުވީ ނުހުންނާނެ ތާއެވެ.